جۇمىسشى ماماندىعىنىڭ جاڭا يدەولوگياسىن جاساپ جاتىرمىز - تامارا دۇيسەنوۆا
استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا جۇمىسشىلار ماماندىعى جىلىنىڭ ماڭىزىنا توقتالدى.
- فەستيۆالگە 200 گە جۋىق ءىرى، شاعىن جانە ورتا بيزنەس وكىلدەرى قاتىسىپ جاتىر. سونىمەن قاتار جوعارى وقۋ ورىندارى مەن كوللەدجدەر جانە عىلىمي زەرتتەۋ ينستيتۋتتارى قاتىسىپ وتىر. بەس كۇننىڭ ىشىندە يننوۆاتسيالىق سەسسيالار، حاكاتوندار وتكىزەدى. جۇمىسشى ماماندىعىنىڭ جاڭا يدەولوگياسىن جاساپ جاتىرمىز. جۇمىسشى ماماندىعىن ءبىز بارلىق ۋاقىتتا ەڭ تومەن ءونىمدى مامان دەپ ايتامىز، بۇگىن ولاي ەمەس. بۇگىندە جۇمىسشى مامان دەگەنىمىز - جاڭا تەحنولوگيامەن جۇمىس ىستەيتىن، زاماناۋي تەحنولوگيامەن جۇمىس ىستەيتىن كاسىپورىنداردى باسقاراتىن وپەراتور، تەحنيكتەر. سونىمەن قاتار درون جاساپ، جينايتىن ماماندار. ماماندىق تاڭداپ جۇرگەن، ماماندىعىن تاڭداپ قايدا بارىپ جۇمىس ىستەيمىن دەپ جۇرگەن جاستار وسى جۇمىسشىلار قالاسى ارقىلى جۇمىس ورنىن تابا الادى، - دەدى تامارا دۇيسەنوۆا ب ا ق وكىلدەرىنىڭ ساۋالىنا جاۋاپ بەرە تۇرىپ.
بۇگىن ەلوردادا جۇمىسشى ماماندىقتارىنىڭ فەستيۆالى باستالدى.
فەستيۆال اياسىندا بەس كۇن بويى سەمينارلار، مۇناي جانە ەنەرگەتيكا ونەركاسىبى تاقىرىپتارى بويىنشا حاكاتون، ماماندىقتار شەرۋى، بوس جۇمىس ورىندارى جارمەڭكەسى، ستارتاپتاردىڭ تۇساۋكەسەرى، ماشينا جاساۋ بويىنشا شەبەرلىك ساباقتارى، كونسەرت پەن حالىقارالىق اككرەديتتەلگەن كوللەدجدەردىڭ ترەنينگى سەكىلدى ءىس-شارالار وتەدى.
ايتا كەتەيىك، «جۇمىسشى ماماندىقتار قالاسى» فەستيۆالى كۇن سايىن ساعات 10:00-دەن 18:30-عا دەيىن استانا قالاسى ماڭگىلىك ەل داڭعىلى، 53/1-مەكەنجايى «EXPO» حالىقارالىق كورمە ورتالىعىندا ءوتىپ جاتىر.
ەسكە سالا كەتەيىك، وتكەن جىلى قىركۇيەكتە مەملەكەت باسشىسى قازاقستان حالقىنا ءداستۇرلى جولداۋىندا 2025 -جىلدى جۇمىسشى ماماندىقتارى جىلى دەپ جاريالاناتىنى تۋرالى حابارلاعان ەدى.
اۆتور
داۋلەت ىزتىلەۋ
