جۇمىس ىزدەۋ جەڭىلدەيدى: جاڭا جۇيە ىسكە قوسىلادى

استانا. KAZINFORM - قازاقستاندا جۇمىسپەن قامتۋ جۇيەسى جاڭارىپ، ازاماتتارعا جۇمىس تابۋدى جەڭىلدەتەتىن جاڭا ءتاسىل ەنگىزىلدى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقپايەۆ ورتالىق كوممۋنيكاتسيالار قىزمەتىندە وتكەن بريفينگىدە مالىمدەدى.

ونىڭ ايتۋىنشا، بۇگىندە جۇمىسپەن قامتۋعا قاتىستى بارلىق قىزمەت ەلەكتروندى فورماتقا كوشىرىلگەن. ەندى كەلەسى قادام - ازاماتتارعا جۇمىستى وزدىگىنەن ۇسىناتىن جاڭا جۇيەگە كوشۋ.

- جاڭا ءتاسىل بويىنشا مەملەكەت ازاماتتىڭ ءوتىنىش بەرۋىن كۇتپەيدى. جۇيە ادامنىڭ ءبىلىمى، ماماندىعى مەن ەڭبەك تاجىريبەسىنە قاراي لايىقتى جۇمىس نۇسقالارىن ءوزى ۇسىنادى، - دەدى ول.

ۆيتسە-ءمينيستردىڭ سوزىنشە، بۇل جۇيە ناقتى ۋاقىت رەجيمىندە جۇمىس ىستەيدى. ازاماتتىڭ دەرەكتەرى تالدانىپ، سوعان سايكەس بوس جۇمىس ورىندارى ۇسىنىلادى.

- ەگەر ادام جۇمىسىنان ايىرىلسا، ول ءوتىنىش بەرمەي-اق، جۇيە وعان جاڭا جۇمىس نۇسقالارىن جولدايدى. بۇل جۇمىسپەن قامتۋ پروتسەسىن جەدەلدەتەدى، - دەدى باحتيار جازىقپايەۆ.

سونىمەن قاتار ينتەرنەت ارقىلى جۇمىس ىستەيتىن ازاماتتار دا وسى جۇيەگە قوسىلىپ جاتىر. قازىر مۇنداي پلاتفورمالار ارقىلى 395 مىڭنان استام ادام ەڭبەك ەتەدى.

- وسى باعىتتا زەينەتاقى، الەۋمەتتىك جانە مەديتسينالىق ساقتاندىرۋعا 10,7 ميلليارد تەڭگەدەن استام قاراجات اۋدارىلدى. بۇل ازاماتتاردىڭ الەۋمەتتىك قورعالۋىن كۇشەيتەدى، - دەدى ول.

بۇدان بولەك، ستۋدەنتتەردىڭ وندىرىستىك تاجىريبەسى دە تولىق سيفرلىق فورماتقا كوشىرىلدى. ەندى بارلىق پروتسەسس ونلاين جۇرگىزىلەدى. قازىر جۇيەدە 17 مىڭنان استام ستۋدەنت تىركەلىپ، شامامەن 6 مىڭ ەلەكتروندىق كەلىسىمشارت جاسالعان.

ۆيتسە-ءمينيستردىڭ ايتۋىنشا، جاڭا جۇيە جۇمىس تابۋدى جەڭىلدەتىپ قانا قويماي، ەڭبەك نارىعىن اشىق ءارى ءتيىمدى ەتۋگە مۇمكىندىك بەرەدى.

ايتا كەتەيىك، 2026-جىلعى 1-ناۋرىزداعى جاعداي بويىنشا جۇمىسپەن قامتۋ شارالارى ارقىلى 39,9 مىڭ قازاقستاندىق تۇراقتى جۇمىسقا ورنالاستىرىلدى.