جۇمىس كۇشى تاپشى وڭىرلەرگە 2 مىڭنان استام ادام كوشىپ باردى

استانا. قازاقپارات - 2025 -جىلعى 1-شىلدەدەگى جاعداي بويىنشا ەرىكتى قونىس اۋدارۋ شەڭبەرىندە جۇمىس كۇشىنىڭ ۇتقىرلىعىن ارتتىرۋ ءۇشىن جۇمىس كۇشى ارتىق وڭىرلەردەن جۇمىس كۇشى تاپشى وڭىرلەرگە 2202 ادام، ونىڭ ىشىندە 1091 قانداس جانە 1111 قونىس اۋدارۋشى كوشىپ كەلدى.

بارلىق قونىس اۋدارۋشىعا مەملەكەتتىك قولداۋ شارالارى كورسەتىلدى. وسى جىلدىڭ سوڭىنا دەيىن 9653 ادامدى كوشىرۋ جوسپارلانىپ وتىر.

وڭىرلەر بويىنشا: پاۆلودار وبلىسىنا - 672 ادام، سولتۇستىك قازاقستان وبلىسىنا - 532 ادام، قوستاناي وبلىسىنا - 330 ادام، اقمولا وبلىسىنا - 215 ادام، شىعىس قازاقستان وبلىسىنا - 214 ادام، اباي وبلىسىنا - 145 ادام، اتىراۋ وبلىسىنا - 90 ادام، ۇلىتاۋ وبلىسىنا - 4 ادام قونىس اۋداردى.

قونىس تانۋ ايماقتارىنا كوشكەن قانداستارىمىز نەگىزىنەن وزبەكستاننان - 396 ادام، موڭعوليادان - 310 ادام، ق ح ر - 286 ادام، رەسەيدەن - 52 ادام، باسقا ەلدەردەن - 47 ادام كەلگەن.

ەڭبەككە قابىلەتتى جاستاعى 790 ادام كەلگەندەردىڭ ىشىنەن تۇراقتى جۇمىس ورىندارىنا 374 ادام جۇمىسقا ورنالاستىرىلدى، 10 ادام كاسىپكەرلىك قىزمەتپەن اينالىسادى.

قونىس اۋدارۋشىلار مەن كانداستار دەنساۋلىق ساقتاۋ، اۋىل شارۋاشىلىعى، ءبىلىم بەرۋ، ونەركاسىپ جانە ت. ب. سالالار بويىنشا جۇمىسقا ورنالاستى.

تامارا ايناددينوۆا قونىس اۋدارۋدىڭ ومىرىندەگى وڭ وزگەرىس بولعانىن اتاپ ءوتتى.

- مەن جامبىل وبلىسىنان تايىنشا اۋدانىنداعى كەللەروۆكا اۋىلىنا سوناۋ 2022 -جىلى كوشىپ كەلدىم. قونىس اۋدارۋعا ارنالعان وبلىستىق كۆوتاعا ەنگىزىلگەننەن كەيىن كوشىپ-قونۋ ءۇشىن قارجىلاي كومەك، سونداي-اق تۇرعىن ءۇيدى جالعا الۋ جانە كوممۋنالدىق قىزمەتتەرگە جۇمسالعان شىعىنداردى وتەۋ ءۇشىن سۋبسيديالار تۇرىندە مەملەكەتتىك قولداۋعا يە بولدىم، - دەدى ول.

تامارا ايناددينوۆا م. قوزىبايەۆ اتىنداعى سولتۇستىك قازاقستان ۋنيۆەرسيتەتىن حيميا ءپانىنىڭ ءمۇعالىمى ماماندىعى بويىنشا بىتىرگەن. جاڭا تۇرعىلىقتى جەرىنە كەلگەننەن كەيىن كەڭەس وداعىنىڭ باتىرى ي. م. بەرەجنوي اتىنداعى كەللەر ورتا مەكتەبىنە ماماندىعى بويىنشا جۇمىسقا ورنالاستى. ءقازىر بالاسىنا كۇتىم جاساۋ ءۇشىن دەكرەتتىك دەمالىستا.

- كوشۋگە شەشىم قابىلداعانىمىزعا، قونىس اۋدارۋشىلارعا جۇمىس تاۋىپ بەرۋگە كومەكتەسەتىن، العاشقى قارجىلىق كومەك كورسەتەتىن مەملەكەتتەن باعدارلاما بارىنا وتە قۋانىشتىمىن. مەن وسى جەردە وتباسىن قۇردىم، - دەيدى كەيىپكەرىمىز.

ەستەرىڭىزگە سالا كەتەيىك، ەرىكتى قونىس اۋدارۋ اياسىندا قونىس اۋدارۋشىلارعا مەملەكەتتىك قولداۋدىڭ مىناداي شارالارى ۇسىنىلادى:

- وتاعاسىنا جانە وتباسىنىڭ ءاربىر مۇشەسىنە 70 ا ە ك مولشەرىندە كوشۋگە ارنالعان ءبىر رەتتىك سۋبسيديا؛

- وتباسى مۇشەلەرى سانى مەن ەلدى مەكەنگە بايلانىستى 15 تەن 30 ا ە ك-كە دەيىنگى مولشەردە 12 اي ىشىندە تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە اي سايىنعى سۋبسيديالاۋ؛

- قىسقا مەرزىمدى كاسىپتىك وقىتۋعا جولداما؛

- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ؛

- ەكونوميكالىق ۇتقىرلىق سەرتيفيكاتتارىن بەرۋ.

بۇدان باسقا، ءوڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە تۇرعىن ۇيمەن قامتاماسىز ەتىلگەن جانە كەمىندە 2 جىل مەرزىمگە تۇراقتى جۇمىسقا قابىلدانعان ءاربىر قىزمەتكەر ءۇشىن 400 ا ە ك مولشەرىندە جۇمىسقا ورنالاسۋعا ءبىرجولعى سۋبسيديا بەرىلەدى.

ايتا كەتەلىك ەلدە دەموگرافيا جانە كوشى-قون سالاسىن رەتتەيتىن مەملەكەتتىك ورگان قۇرۋ ۇسىنىلعان ەدى.