جەمىس-جيدەكتەن ۋلانۋدان قالاي ساقتانعان دۇرىس

قىزىلوردا. KAZINFORM - جاز ايلارىندا قاۋىن-قاربىز جانە جەمىس-جيدەكتەن ۋلانۋ جاعدايى كەزدەسىپ جاتادى. ودان ساقتانۋ جولى قانداي؟ وسى ورايدا قىزىلوردا وبلىستىق سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ءابدىقايىموۆانىڭ كەڭەسىنە نازار اۋدارعان ەدىك.

«قاۋىن-قاربىزدى سەنىمدى جانە تەكسەرىلگەن ساتۋشىلاردان ساتىپ الۋعا كەڭەس بەرەمىز. ونى كولىك جولى بويىنان ساتىپ الۋدان اۋلاق بولعان دۇرىس. ويتكەنى جيدەكتەردىڭ بەتىنە گاز قالدىعى ءتۇسۋى مۇمكىن. ساۋدا نىساندارىندا ءونىمنىڭ ساپاسى مەن قاۋپسىزدىگىن راستايتىن قۇجاتتار بولۋى كەرەك. اتاپ ايتقاندا، ولاردىڭ قاتارىندا سايكەستىگى تۋرالى دەكلاراتسيا، فيتوسانيتاريالىق سەرتيفيكات بار»، - دەدى ءاليا ءابدىقايىموۆا.

ساتىپ العاننان كەيىن قاۋىن-قاربىزدى توڭازىتقىشتا، تازا، جابىق كونتەينەردە، باكتەريالاردىڭ كوبەيۋىنە جول بەرمەۋ ءۇشىن شيكى ونىمدەردەن بولەك ساقتاعان ابزال.

«زياندى توكسيندەردىڭ جينالۋىن جانە ىقتيمال ۋلانۋدى بولدىرماۋ ءۇشىن كەسىلگەن قاۋىن-قاربىزدى ءبىر كۇننەن ارتىق ساقتاماڭىز. ەگەردە ءسىز قاۋىن-قاربىزدى كەسكەن كەزدە ادەتتەن تىس ءيىستى، ءدامدى سەزىپ، قۇرامىنىڭ وزگەشەلىگىن بايقاساڭىز، ونى جەۋدەن باس تارتقانىڭىز دۇرىس. قاۋىن- قاربىزدى جەگەننەن كەيىن ءوزىڭىزدى جايسىز سەزىنىپ، ۋلانۋ بەلگىلەرىن بايقاساڭىز دەرەۋ دارىگەر كومەگىنە جۇگىنىڭىز. ءوزىن-ءوزى ەمدەۋگە بولمايدى»، - دەپ تولىقتىردى ءا. ءابدىقايىموۆا.

اۆتور

ءادىلجان ۇمبەت