جۇمباقتاسقا شىعۋعا تىيىم سالىنۋى مۇمكىن
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ بۋراباي تابيعي پاركىنىڭ باسشىلىعىنا تۋريستەردىڭ جۇمباقتاسقا شىعۋىنا تىيىم سالۋدى ۇسىناتىنىن ايتتى.
ۇكىمەت وتىرىسىنان كەيىن وتكەن باسپا ءسوز ءماسليحاتىندا جۋرناليست كەيبىرەۋلەر جۇمباقتاسقا قۇرمەتپەن قارامايتىنىن ايتىپ، تاستىڭ ۇستىنە اياق باسۋعا تىيىم سالۋدى ۇسىندى.
«نەگىزى وتە ورىندى ۇسىنىس. ءوزىم دە كورىپ ءجۇرمىن. قازىر تاسقا دەيىن ءجۇزىپ بارىپ، ۇستىنە شىعۋعا تىيىم جوق. ءبىراق ول تاستارعا جازۋ جازىپ، تاڭبا قالدىرۋعا تىيىم سالىنعان. سونىڭ وزىندە تۋريستەردىڭ كوبەيگەنىنە بايلانىستى بۇل ورىندى ۇسىنىس دەپ ويلايمىن. بۇل تاسقا شىعۋعا تىيىم سالعان دۇرىس شىعار. مەن بۋراباي ۇلتتىق پاركىندەگىلەرمەن سويلەسەمىن. بۇل پارك پرەزيدەنت ءىس باسقارماسىنا قارايدى. ءسىز ايتقان ۇسىنىستى ايتىپ كورەمىن. وتە ورىندى ۇسىنىس»، - دەدى ەرلان نىسانبايەۆ.
اۆتور
ەسىمجان ناقتىباي
