جەكەمەنشىك مەكتەپتەردەگى ماسەلە قاراستىرىلىپ جاتىر - عاني بەيسەمبايەۆ

استانا. KAZINFORM - جەكەمەنشىك مەكتەپتەردەگى كەمشىلىكتەردى جويۋعا قاتىستى ءتيىستى ەرەجەنى قابىلداۋ جوسپارلانىپ وتىر. بۇل تۋرالى وقۋ-اعارتۋ ءمينيسترى عاني بەيسەمبايەۆ ءمالىم ەتتى.

بۇگىن پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر «جەكەمەنشىك مەكتەپتەردى قارجىلاندىرۋ نەگە كەشىگىپ جاتىر؟» دەگەن سۇراق قويىلدى.

- جەكەمەنشىك مەكتەپتەردى قارجىلاندىرۋ كەشىگىپ جاتقان جوق. بارلىعى بەرىلدى. قازىر تەك 2-3 وڭىردە عانا اقشانى بەرۋدەگى پروتسەستەردە جەكەمەنشىك مەكتەپتەردىڭ اكتىنى وتكىزۋگە قاتىستى كىدىرۋى بار ەكەنى باياندالدى، - دەدى ع. بەيسەمبايەۆ.

سونىمەن قاتار «ەگەر جەكەمەنشىك مەكتەپتە 200 بالادان كەم بولسا، ولار جابىلادى دەگەن اقپارات راس پا؟» دەپ سۇرادى تىلشىلەر.

- سوڭعى كەزدە مەملەكەتتىڭ قولداۋىنىڭ ارقاسىندا 20-30 بالا جيناپ الىپ، ەشقانداي ينۆەستيتسيا سالماي جۇمىس ىستەپ جاتقاندارى بار. نەگىزگى يدەيا - جەكە ينۆەستيتسيا ارقىلى مەكتەپ سالۋ، ينفراقۇرىلىمدى دامىتۋ. بايقاپ وتىرساق، 60-70 پايىزىندا ينۆەستيتسيا قۇيىلماعان، مەكتەپ سالىنباعان، ياعني لايىقتاپ العان عيماراتتا وقىتىپ وتىر. بۇل تۇرعىدا اتا-انالاردى الداماي، ساپالى ءبىلىم بەرۋ كەرەك. سوندىقتان وسى باعىتتا تارتىپكە كەلتىرەتىن ماسەلە بار. 200 بالا دەگەنىمىز، 8 سىنىپ جيىنتىعىن قۇرايدى. ال مەكتەپ 1-سىنىپتان 11-سىنىپقا دەيىن وقىتسا، «وقۋشىلار سانى تولىق پا؟» دەگەن سۇراق تۋىندايدى. جالپى، قازىر جەكەمەنشىك مەكتەپتەردەگى ماسەلەنى قاراستىرىپ جاتىرمىز، - دەدى مينيستر.

ەسكە سالساق، بيىل مامىر ايىندا جەكەمەنشىك مەكتەپتەرگە مەملەكەتتىك تاپسىرىس ورنالاستىرۋ قاعيدالارىنا وزگەرىس ەنگىزىلەتىنى ءمالىم بولدى.