جۇك تاسىمالداۋعا قازاقستان تەمىر جولىنىڭ قۋاتى جەتپەي جاتىر

استانا. KAZINFORM - كولىك ءمينيسترى مارات قارابايەۆ «قازاقستان تەمىر جولى» كومپانياسى تاسىمالداۋ كەزىندە قانداي جۇككە باسىمدىق بەرەتىنىن ايتتى.

«قازىرگى ۋاقىتتا قازاقستان تەمىر جولى كومپانياسىنىڭ جۇك تاسىمالداۋعا قۋاتى جەتپەي جاتىر. جىلدان-جىلعا جۇكتىڭ كولەمى دە، اينالىمى دا ارتىپ كەلەدى. مىسالى، بىلتىر جۇك كولەمى رەكوردتىق 297 ميلليون تونناعا جەتتى. جۇك اينالىمى دا 7 پايىزعا ءوستى. بۇرىن قۋاتى جەتىپ تۇرعان كەزدە تاسىمالداناتىن جۇكتىڭ 20 پايىزى نەگىزگى جوسپار بويىنشا كەلىسىلەتىن. ياعني، ايدىڭ باسىندا، قالعان 80 پايىزى ايدىڭ سوڭىندا قوسىمشا كەلىسىلەتىن ەدى. ال قازىر قۋات جەتپەگەن سوڭ ءبارىن نەگىزگى جوسپار بويىنشا كەلىسىمگە اۋىستىردىق»، - دەدى مينيستر سەناتتىڭ جالپى وتىرىسىندا دەپۋتاتتاردىڭ ساۋالىنا وراي.

ونىڭ اتاپ وتۋىنشە، قازىرگى ۋاقىتتاي ءار ايدىڭ 14 ىنە دەيىن تاسىمالداناتىن جۇكتىڭ 80 پايىزى نەگىزگى جوسپار بويىنشا كەلىسىلىپ وتىرادى.

«بىلتىر 164 ميلليون توننا ىشكى جۇكتى تاسىمالداۋعا كەلىسىم بەرىلگەن. ياعني، ىشكى جۇك تاسامالداۋعا باسىمدىق بەرىلىپ وتىر. ەكىنشى - وتاندىق وندىرۋشىلەردىڭ ەكسپورتتقا جونەلتەتىن تاۋارلارى. بۇل - 85 ميلليون توننا، ياعني 9 پايىزعا ارتىپ وتىر. ءۇشىنشى، ترانزيتتىك جۇككە باسىمدىق بەرىلەدى. ول 18 پايىزعا ارتىپ، 27 ميلليون تونناعا جەتتى. ودان كەيىن يمپورت جۇگىنە باسىمدىق جاسالادى»، - دەدى مارات قارابايەۆ.