جەكە سوت ورىنداۋشىلار اككرەديتاتسيادان وتۋگە مىندەتتەلەدى
استانا. KAZINFORM - پارلامەنت جەكە سوت ورىنداۋشىلاردى اككرەديتاتسيادان وتۋگە مىندەتتەيتىن زاڭ جوباسىن قاراپ جاتىر. بۇل تۋرالى پرەمەر-مينيستر ولجاس بەكتەنوۆ سەنات دەپۋتاتىنىڭ ساۋالىنا جولداعان جاۋاپتا ايتقان.
- ادىلەت مينيسترلىگى پارلامەنت دەپۋتاتتارىمەن بىرگە اتقارۋشىلىق ءىس جۇرگىزۋ مەحانيزمدەرىن جەتىلدىرۋگە، سونداي-اق جەكە سوت ورىنداۋشىلارىنىڭ زاڭسىز ارەكەتتەرى ءۇشىن جاۋاپكەرشىلىگىن كۇشەيتۋگە باعىتتالعان زاڭنامالىق تۇزەتۋلەر ازىرلەدى. اتاپ ايتقاندا، ۇسىنىلىپ وتىرعان زاڭنامالىق وزگەرىستەر جەكە سوت ورىنداۋشىسى قىزمەتىمەن اينالىسۋعا ليتسەنزيا الۋعا قويىلاتىن تالاپتاردى قاتاڭداتۋدى، وقۋدان (بىلىكتىلىگىن ارتتىرۋدان) ءوتۋ مەرزىمدەرىنىڭ كەزەڭدىلىگىن (3 جىلدان 2 جىلعا دەيىن) قىسقارتۋدى، جۇمىس ىستەپ جۇرگەن جەكە سوت ورىنداۋشىلارىن مىندەتتى اتتەستاتتاۋدى ەنگىزۋدى، قىزمەتتىك وكىلەتتىكتەرىن تەرىس پايدالانعانى ءۇشىن قاتاڭ سانكسيالار بەلگىلەۋدى، تارتىپتىك جازانى مەرزىمىنەن بۇرىن (6 ايعا دەيىن) الىپ تاستاۋدى جوققا شىعارۋدى، اكىمشىلىك شارالاردى قولدانۋدى، سوت ورىنداۋشىسىنىڭ ءىس-ارەكەتىنىڭ اشىقتىعىن قامتاماسىز ەتۋدى كوزدەيدى، - دەپ جازادى ولجاس بەكتەنوۆ.
سونداي-اق، پرەمەر-مينيستر جەكە سوت ورىنداۋشىلاردىڭ زاڭ بۇزۋ فاكتىلەرى بار ەكەنىن مويىنداعان.
- وسىعان بايلانىستى ادىلەت مينيسترلىگى باس پروكۋراتۋراسىنىڭ ۇسىنۋى بويىنشا جەكە سوت ورىنداۋشىلارىنا قاتىستى شارالار قابىلدادى (كىنالى تۇلعالار تارتىپتىك جاۋاپكەرشىلىككە تارتىلدى جانە ليتسەنزيالاردان ايرىلدى). كورسەتىلگەن شارالارمەن قاتار زاڭدىلىقتى ساقتاۋ مەن ۋاقتىلى شارالار قابىلداۋ تۇرعىسىنان جەكە سوت ورىنداۋشىلارىنىڭ قىزمەتىنە ۇنەمى قاشىقتان مونيتورينگ جۇرگىزىلەدى، - دەلىنگەن جاۋاپتا.
ەسكە سالساق، ءساۋىر ايىندا ماجىلىستە وتكەن ۇكىمەت ساعاتىندا سوت ورىنداۋشىلار «وتباسى بانك» سالىمشىلارىنان 3,4 ميلليارد تەڭگە جىمقىرعانى ءمالىم بولعان ەدى.
