جەكە مەنشىك ءدىني مەكتەپتەر پايدا بولىپ جاتقانى راس پا - مينيستر جاۋاپ بەردى
استانا. KAZINFORM - وقۋ-اعارتۋ ءمينيسترى عاني بەيسەمبايەۆ ۇكىمەت ۇيىندەگى باسپا ءسوز ءماسليحاتىندا بەلگىلى الەۋمەتتانۋشى تالعات جاقيانوۆتىڭ ەلدە جەكە مەنشىك ءدىني مەكتەپتەر پايدا بولىپ جاتقانى تۋرالى مالىمەتىن تەرىسكە شىعاردى.
- پرەزيدەنت جانىنداعى مەملەكەتتىك قىزمەت اكادەمياسى مەملەكەتتىك ساياسات ۇلتتىق مەكتەبىنىڭ ديرەكتورى تالعات جاقيانوۆ You Tube ارنالاردىڭ بىرىنە بەرگەن سۇحباتىندا ەلدەگى جەكە مەنشىك مەكتەپتەردىڭ كەيبىرى ءدىني سيپات الىپ بارا جاتقانىن، ءتىپتى كەيبىر جەكە مەنشىك بالاباقشالاردىڭ بالالارعا ءدىني كونتەنت ءسىڭىرىپ جاتقانىن ءمالىم ەتتى. ءسىزدىڭ ودان حابارىڭىز بار ما؟ اقپاراتتى راستايسىز با؟ - دەپ سۇرادى جۋرناليست.
ءمينيستردىڭ سوزىنشە، مۇنداي تەندەنتسياعا زاڭ جول بەرمەيدى.
- جالپى زاڭ بويىنشا ەشقانداي بەلگىلەنگەن ستاندارتتىڭ شەڭبەرىنەن تىس، ءوز بەتىنشە زاڭ بۇزۋعا مۇمكىندىك بەرىلمەگەن. سوندىقتان جەرگىلىكتى ورىندارداعى ساپانى قامتاماسىز ەتەتىن دەپارتامەنتتەر ۇنەمى، ءجيى باقىلاپ وتىرادى. زاڭ بۇزۋ بولعان جاعدايدا ءتيىستى شارالار قابىلدايدى. تاعى قايتالاپ ايتايىن، ەگەر وسى زاڭعا باعىنباۋ فاكتىلەرىن قوعام، جۋرناليستەر انىقتاعان جاعدايدا رەسمي مالىمەتىن بەرسەڭىزدەر، ءبىز ءتيىستى شارا قولدانىپ، زاڭ شەڭبەرىندە جۇمىس ىستەتۋگە بارلىق مۇمكىندىكتى قاراستىرامىز، - دەدى مينيستر.
سونداي-اق، ول الەۋمەتتانۋشىنىڭ مالىمدەمەسىن تەرىسكە شىعاردى.
- ول كىسىنىڭ مالىمدەمەسىن ەستىدىم. ءبىراق بىزدە كوپ جاعدايدا اقپاراتتى قاراپ وتىرامىز، شىندىققا جاناسپايتىن اقپارات وتە كوپ. بۇل ءبىزدى الاڭداتادى. ويتكەنى كوپ جاعدايدا ادامدار ءوزىنىڭ كوزقاراسىن ايتا سالادى. ول كەيىن ناقتى سايكەس كەلمەي جاتادى. ول اقپارات شىندىققا جاناسپايدى. ەگەر شىندىققا جاناسسا، ول كىسى ناقتى قاي مەكتەپتە ەكەنى تۋرالى اقپارات بەرسىن. ءتيىستى شارا قابىلدايمىز، - دەدى عاني بەيسەمبايەۆ.
