جەكە كومپانيا مەملەكەتكە وتاندىق ءونىم دەپ شەتەلدىك بۇيىم ساتقانى انىقتالدى
استانا. KAZINFORM – ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ ءماجىلىستىڭ جالپى وتىرىسىندا كەيبىر كومپانيالار وتاندىق ءونىم دەپ كورسەتىپ، شەتەلدىك بۇيىمدى مەملەكەتكە ەكى ەسە قىمبات باعامەن ساتىپ جاتقانىن ايتتى.
- ءوندىرىستىڭ لوكاليزاتسياسىنا جانە ينۆەستيتسيالىق مىندەتتەمەلەرگە مونيتورينگ جۇرگىزىلمەيدى. بۇل تالاپتاردى فورمالدى تۇردە ورىنداۋعا جانە جاعدايدى تەرىس پايدالانۋعا مۇمكىندىك جاسايدى. ماسەلەن، 2024 -جىلى «كازمەدپروم» سەرىكتەستىگى مەملەكەتكە 8 ميلليارد تەڭگەگە 62 ميلليون مەديتسينالىق قولعاپ جەتكىزگەن. الايدا بۇل قولعاپتاردىڭ كولەمى مەن سيپاتتامالارى كومپانيانىڭ سول كەزەڭدە تايلاندتان ساتىپ العان پارتياسىمەن سايكەس كەلەدى، - دەدى ءاليحان سمايىلوۆ
سونداي-اق سپيكەر بۇنداي سحەما يمپورتتىق تاۋارلاردى وتاندىق ونىممەن الماستىرۋ ساياساتىنىڭ ءمانىن جويىپ، مەملەكەتكە ۇلكەن زالال تيگىزەتىنىن اتاپ ءوتتى.
- بۇل جاعدايدا شەتەلدىك ءونىمدى وتاندىق ءونىم رەتىندە ساتۋ تاۋەكەلى بايقالادى. مەملەكەتكە ءونىم نارىقتاعى باعامەن سالىستىرعاندا 2 ەسە جوعارى باعامەن ساتىلعان. بۇل 5,3 ميلليارد تەڭگەگە بيۋدجەتتىك ارتىق شىعىن اكەلدى، - دەدى جوعارى اۋديتورلىق پالاتاسىنىڭ ءتوراعاسى.
ايتا كەتەيىك، فارماتسيەۆتيكا سالاسىندا 741 ميلليون تەڭگەنىڭ قارجىلىق بۇزۋشىلىعى انىقتالدى.
اۆتور
ەربول جانات
