جەكە كۋالىك جوعالعان نەمەسە ۇرلانعان كەزدە نە ىستەۋ كەرەك؟
استانا. قازاقپارات - جەكە كۋالىك - 16 جاسقا تولعان ءاربىر قازاقستان رەسپۋبليكاسىنىڭ ازاماتى ءۇشىن نەگىزگى قۇجات. ەگەر ول جوعالعان نەمەسە ۇرلانعان جاعدايدا قالپىنا كەلتىرۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ كەز كەلگەن فيليالىنا جۇگىنۋ قاجەت.
جەكە كۋالىك جوعالعان نەمەسە ۇرلانعان كەزدە نە ىستەۋ كەرەك؟
كۋالىكتى قالپىنا كەلتىرۋ ءۇشىن مىنا قۇجاتتار قاجەت:
جوعالۋ ءمان-جايى كورسەتىلگەن جازباشا ءوتىنىش (ۇرلانعان جاعدايدا پوليتسيا بولىمىنەن بەرىلەتىن تالون)؛
مەملەكەتتىك باج سالىعىن تولەۋدەن بوساتىلاتىنىن راستايتىن قۇجات (بار بولعان جاعدايدا)؛
قازاقستان رەسپۋبليكاسى ازاماتىنىڭ پاسپورتى (ەگەر بولسا)؛
جاڭا جەكە كۋالىك الۋ ءۇشىن مەملەكەتتىك باج سالىعىن تولەۋ.
مەملەكەتتىك باج سالىعىن قالاي تولەۋگە بولادى؟
2025-جىلى مەملەكەتتىك باج سالىعىنىڭ كولەمى - 786,4 تەڭگە. ونى بانكتەردىڭ موبيلدى قوسىمشالارى ارقىلى نەمەسە «قازپوشتا» ا ق بولىمشەلەرىندە تولەۋگە بولادى.
نەنى ەسكەرۋ كەرەك؟
ەگەر جەكە كۋالىك ءبىر جىل ىشىندە ەكى رەتتەن كوپ جوعالسا، مەملەكەتتىك باج سالىعى 1 ا ە ك مولشەرىندە، ياعني 3932 تەڭگە بولادى.
ەسكە سالايىق، بۇعان دەيىن قازاقستاندىقتار ءتولقۇجاتىن ونلاين رەجيمدە الا الاتىنى حابارلاندى.
