جەكە دەرەكتەر قايدان تاراپ كەتكەنى جونىندە جورامال ايتىلدى
استانا. KAZINFORM - قازاقستاندا «قازاقستان تۇرعىندارى 2024» اتاۋىمەن تىركەلگەن جاڭا اۋقىمدى دەرەكقوردىڭ ينتەرنەت كەڭىستىگىنە تاراعانى انىقتالدى. بۇل تۋرالى TSARKA Group ۆيتسە-پرەزيدەنتى ەڭلىك ساتيەۆا مالىمدەدى.
ونىڭ ايتۋىنشا، قازىرگى ۋاقىتتا اشىق قولجەتىمدىلىككە 16302107 جازبا شىققان. بۇل سان ەلىمىزدىڭ جالپى حالقىنىڭ باسىم بولىگىن قامتيدى.
- بۇل جاي عانا ادامداردىڭ اتى-ءجونى ەمەس. جاريالانعان بازادا ازاماتتاردىڭ اسا ماڭىزدى دەربەس مالىمەتتەرى بار. اتاپ ايتقاندا، تەگى، اتى، اكەسىنىڭ اتى، جىنىسى، تۋعان كۇنى، جسن، ازاماتتىعى، ۇلتى، تۇرعىلىقتى مەكەنجايى، تىركەلۋ جانە تۇرۋ مەرزىمى، سونداي-اق ۇيالى، ءۇي جانە جۇمىس تەلەفوندارى كورسەتىلگەن، - دەپ جاۋاپ بەردى ەڭلىك ساتيەۆا اگەنتتىك تىلشىسىنە.
ونىڭ سوزىنشە، كەيبىر مالىمەتتەر مەديتسينالىق ۇيىمداردان، اتاپ ايتقاندا، ەمحانالار مەن ستوماتولوگيالىق مەكەمەلەردەن الىنعان بولۋى مۇمكىن. بۇل بازا ناقتى ءبىر ۇيىمنان تاراۋى دا مۇمكىن نەمەسە بىرنەشە اقپارات كوزىنەن جيناقتالعان اقپارات بولۋى ىقتيمال. بۇل دەرەكتەردى ج س ن- ءدى بىرىكتىرۋ ارقىلى تولىقتىرىلعان بولۋى مۇمكىن. ازىرگە دەرەككوز ناقتى انىقتالعان جوق. تەكسەرۋ جۇمىستارى جالعاسىپ جاتىر.
سونىمەن قاتار جەكە دەرەكتەردىڭ ىقتيمال تارالۋىنا بايلانىستى ازاماتتارعا رەسمي حابارلاما جىبەرىلگەننەن كەيىن، قانداي مالىمەتتەردىڭ ناقتى كومپرومەتاتسيالانعانىن Egov mobile قوسىمشاسىنداعى Nomad Guard سەرۆيسىنەن كورۋگە بولادى. بۇل تۋرالى Nomad Guard جوباسىنىڭ جەتەكشىسى رۋسلان تۋرگۋلدينوۆ مالىمدەدى.
- قازىرگى ۋاقىتتا اتالعان بازا سەرۆيستە كورسەتىلمەيدى. تەك رەسمي تۇردە push حابارلاما نەمەسە SMS تاراعاننان كەيىن عانا ازاماتتار ءوز دەرەكتەرىنە قاتىستى اقپاراتپەن تانىسا الادى. بۇل ازاماتتاردىڭ دەربەس مالىمەتتەرىن قورعاۋ جانە جالعان الاياقتىق ارەكەتتەردەن ساقتاندىرۋ ءۇشىن قاجەت، - دەدى جوبا جەتەكشىسى.
ونىڭ ايتۋىنشا، Nomad Guard - پايدالانۋشىلارعا جەكە دەرەكتەرىنىڭ قاۋىپسىزدىگىن باقىلاۋعا مۇمكىندىك بەرەتىن ارنايى سەرۆيس. جۇيە ازاماتتارعا ولاردىڭ مالىمەتتەرى تاراپ كەتكەن جاعدايدا دەر كەزىندە حابار بەرەدى.
ەسكە سالا كەتەيىك، بۇعان دەيىن سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن اقپاراتتىق قاۋىپسىزدىك كوميتەتى تاراپىنان تەكسەرىس باستالعانى تۋرالى حابارلادىق.
