جەكە دەرەك دەگەن نە جانە ونى قالاي قورعاۋعا بولادى؟

استانا. قازاقپارات – ازاماتتىڭ جەكە دەرەكتەرى جەلىدە تاراپ كەتسە، جارناما اگەنتتىگى نە الاياقتاردان كەلەتىن قوڭىراۋ جيىلەيدى. سونداي-اق ەلەكتروندى پوشتاعا سپام حابارلاما، ءتۇرلى سىلتەمە كەلەتىن بولادى.

ال مۇنىڭ الدىن الۋ ءۇشىن نە ىستەۋ كەرەك؟ جەكە دەرەك تاراپ كەتكەننەن كەيىن نە ىستەۋگە بولادى؟ بۇل سۇراقتارعا SOC PS Cloud Services ساراپشىسى تەمىرلان ايمۋرزين جاۋاپ بەردى، دەپ حابارلايدى Halyq Uni.

جەكە دەرەك دەگەن نە؟

ماماننىڭ ايتۋىنشا، جەكە دەرەكتەردىڭ تاراۋى جىل وتكەن سايىن وزەكتى بولىپ بارادى. مۇنداي اقپاراتتىڭ تاراپ كەتۋىنە جەكە نە قوعامدىق ۇيىم عانا ەمەس، ادامي فاكتور دا اسەر ەتۋى مۇمكىن. ەگەر جەكە دەرەكتەر تاراپ كەتسە، جارناما بەرۋشىلەر مەن الاياقتار ءجيى حابارلاسۋى ابدەن مۇمكىن.

جەكە دەرەكتەر - كەز كەلگەن بەلگىلى ءبىر ادامدى تىكەلەي نەمەسە جاناما تۇردە تانىتاتىن اقپارات. سونىمەن ادامنىڭ جەكە دەرەگىنە نە كىرەدى:

اتى، تەگى، اكەسىنىڭ اتى؛

تۋعان كۇنى مەن تۋعان جەرى؛

ۇلتى، جىنىسى؛

كۋالاندىراتىن اقپارات (ج س ن، جەكە كۋالىك ءنومىرى)

زاڭدى مەكەنجايى، تۇرعىلىقتى جەرى؛

تەلەفون ءنومىرى؛

وتباسى جانە الەۋمەتتىك جاعدايى؛

جىلجىمالى جانە جىلجىمايتىن مۇلكىنىڭ بار-جوعى؛

ءبىلىمى، ماماندىعى، جۇمىس ورنى؛

كاسىبى جانە بيومەتريالىق دەربەس دەرەكتەرى؛

قارجى دەرەكتەرى.

وسى جەردە كورسەتىلگەن اقپارات الاياقتار ءۇشىن اسا ماڭىزدى. ولار قارجىلىق، جىلجىمالى جانە جىلجىمايتىن مۇلكى، كۋالاندىراتىن قۇجاتتارعا قىزىعۋشىلىق تانىتادى. سوندىقتان الەۋمەتتىك جەلىلەردە ءوزىڭىز تۋرالى اقپاراتتى جاريالاعان كەزدە مۇقيات بولىڭىز، قۇپيا دەرەكتەردى جاريالاماڭىز. مىسال كەلتىرە كەتسەم، جاستار كەز-كەلگەن جەتىستىككە جەتكەندە «كورىمدىك» العىسى كەلىپ، تەلەفون ءنومىرىن نەمەسە بانك شوتىن جاريالايدى. الاياقتار مۇنى دا پايداسىنا اسىرا الادى، - دەيدى تەمىرلان ايمۋرزين.

جەكە دەرەك تاراپ كەتسە...

ساراپشىنىڭ ايتۋىنشا، جەكە دەرەك تاراپ كەتسە، جارناما اگەنتتىگى نە الاياقتاردان كەلەتىن قوڭىراۋ جيىلەيدى. سونداي-اق ەلەكتروندى پوشتاعا سپام حابارلاما، ءتۇرلى سىلتەمە كەلەتىن بولادى.

الاياقتاردىڭ باستى ماقساتى - ازاماتتىڭ قاراجاتىن يەمدەنۋ. ءتۇرلى اڭگىمە ايتىپ، ادامدى اداستىرۋعا تىرىسادى. ولار «تابىسقا» جەتۋ ءۇشىن الەۋمەتتىك ينجەنەريانى ساۋاتتى پايدالانادى. ەگەر جەكە قۇجاتىڭىز تاراپ كەتسە، الاياقتار اتىڭىزدان نەسيە راسىمدەۋى دە مۇمكىن. بۇل جاعداي بىرنەشە رەت قايتالانىپ، ءسىزدىڭ اتىڭىزدان ءارتۇرلى شاعىن نەسيە الا الادى. شاعىن نەسيە بەرەتىن ۇيىمدارعا كىمگە نەسيە بەرىپ جاتقانى ماڭىزدى ەمەس، ويتكەنى كەيىن قارىزدى سىزگە تولەتەدى. مۇنداي جاعدايلاردا سوتتا جابىرلەنۋشى تاراپ ءجيى ۇتىلادى، سالدارىنان الاياق العان قارىزدى باسقا ادام تولەۋگە ءماجبۇر، - دەيدى مامان.

جەكە دەرەكتى قالاي قورعاۋعا بولادى؟

تەمىرلان ايمۋرزين جەكە دەرەكتەردىڭ تاراپ كەتۋىنە الدىمەن ازاماتتاردىڭ وزدەرى كىنالى ەكەنىن ايتادى.

ادامدار فيشينگ سايتقا كىرىپ نەمەسە زياندى باعدارلامانى جۇكتەپ، ءوز دەربەس دەرەكتەرىن زيانكەستەرگە جىبەرەدى. مەملەكەتتىك نەمەسە قوعامدىق ۇيىمداردان حالىقتىڭ دەربەس دەرەكتەرى تاراپ كەتۋى سيرەك كەزدەسەدى، - دەيدى ول.

ەگەر جەكە دەرەكتەر تاراپ كەتسە، ءبىرقاتار تالاپتى ورىنداعان ءجون:

Egov ارقىلى بانك پەن ميكروقارجى ۇيىمدارىنان نەسيە الۋدان ءوز ەركىڭىزبەن باس تارتۋعا ءوتىنىش بەرىڭىز؛

الاياقتاردىڭ سىزگە حابارلاساتىنىنا دايىن بولىڭىز. وتباسىڭىز بەن دوستارىڭىزدى الاياقتار حابارلاسۋى مۇمكىن ەكەنىن ەسكەرتىپ قويىڭىز؛

ەلەكتروندى پوشتاڭىز بەن الەۋمەتتىك جەلىگە كەلگەن سىلتەمەلەرگە مۇقيات بولىڭىز؛

ءتولقۇجات تاراپ كەتسە، قۇجاتتى اۋىستىرۋ كەرەك؛

ەگەر ۇيىمدا ادامداردىڭ جەكە دەرەكتەرى جاپپاي تاراپ كەتسە، «دەربەس دەرەكتەر جانە ولاردى قورعاۋ تۋرالى» 2013-جىلعى 21-مامىرداعى 94-V زاڭ بويىنشا زارداپ شەككەن ۇيىم سىزگە ول تۋرالى ەسكەرتۋى كەرەك جانە وتەماقى بەرۋى قاجەت؛

جەكە دەرەكتەر جەلىگە تاراعان جاعدايدا اقپاراتتىق قاۋىپسىزدىك كوميتەتىنە جازباشا تۇردە نەمەسە e-Otinish ارقىلى حابارلاسقان ءجون؛

زياندى باعدارلامالاردىڭ بار-جوعىن انتيۆيرۋس ارقىلى تەكسەرگەن ءجون.