جەدەل جاردەم قىزمەتى مەن موبيلدى بريگادالار 1-مامىردان باستاپ ەكىگە ءبولىنىپ جۇمىس ىستەيدى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا 1-مامىردان باستاپ جەدەل جاردەم قىزمەتىنىڭ جاڭا جۇمىس ءتارتىبى قالاي ۇيىمداستىرىلاتىنىن ءتۇسىندىردى.

- «103» قوڭىراۋىنىڭ جۇمىس ءتارتىبى جەدەل قىزمەتتى قاجەت ەتەتىن ازاماتتار ءۇشىن ەشقانداي وزگەرمەيدى. تۇنگى ۋاقىتتا (ساعات 20.00-دەن ساعاتى 8.00-گە دەيىن - رەد. ) تەك قانا جەدەل جاردەم قىزمەتى بۇكىل قوڭىراۋلارعا 100 پايىز جاۋاپ بەرىپ، ءتيىستى كومەك كورسەتەدى. بۇگىندە 1-مامىرعا دەيىن ەمحانالار تاراپىنان جاردەم قىزمەتىن كورسەتەتىن بريگادالار بولعان. الايدا بۇل بريگادالار بارلىق ەمحانادا بار دەۋگە كەلمەيتىن. كوبىنەسە اۋتسورسينگكە بەرۋ ارقىلى بۇيرىقتى ورىنداپ ءجۇردى. بۇل جەدەل جاردەم قىزمەتىنە ۇلكەن سالماق ءتۇسىردى. ياعني، ءوزىنىڭ قىزمەتىمەن بىرگە ەمحانانىڭ قىزمەتىن دە اتقارىپ ءجۇردى. سالدارىنان جەدەل جاردەمنىڭ كەشىگۋى جيىلەدى. وسىعان بايلانىستى كۇندىزگى ۋاقىتتا (ساعات 8.00-دەن 20.00-گە دەيىن - رەد.) 4 ساناتقا جاتاتىن تۇرعىنداردان (سوزىلمالى اۋرۋى بار ناۋقاستار، دەنە قىزۋى كوتەرىلگەندەر، جۇكتى ايەلدەر مەن جاس بوسانعان انالار، ت. ب. - رەد. ) تۇسكەن شاقىرتۋلارعا ەمحانالار وزدەرى بارۋى كەرەك. ساعات 20.00-دەن كەيىن بۇكىل قوڭىراۋدى جەدەل جاردەم اتقارادى، - دەدى ول.

مينيستر ايتىپ وتىرعان موبيلدىك بريگادالار «35 مىڭ تۇرعىنعا 1 توپ» قاعيداتىمەن جاساقتالاتىن. 1-مامىرىنان باستاپ بۇل نورما 25 مىڭ تۇرعىنعا دەيىن ازايتىلماق. ياعني، 20 ميلليون حالىققا كەمىندە 800 موبيلدىك بريگادا قاجەت دەگەن ءسوز.

- 1-مامىردان باستاپ ەمحانالاردىڭ جانىنداعى 600 موبيلدىك بريگادا جۇمىسقا كىرىسۋگە دايىن تۇر. قالعان 200 بريگادا اۋتسورسينگ اياسىنداعى كەلىسىمشارت بويىنشا جۇمىسقا كىرىسەدى. ولارمەن ءتيىستى كەلىسىمشارتتار بەكىتىلگەن، - دەدى مينيستر.

جۋرناليست «25 مىڭ تۇرعىنعا ءبىر بريگادا» حالقى سيرەك قونىستانعان اۋدانداردا قالاي ۇيىمداستىرىلاتىنىن سۇرادى.

- مىسالى، شىعىس قازاقستاننىڭ كاتونقاراعاي اۋدانىندا 23 مىڭنان اساتىن تۇرعىن بار. 27 ەلدى مەكەنگە ءبىر بريگادا قالاي ۇلگەرەدى - دەدى باق وكىلى.

ۆەدومستۆو باسشىسى مۇنداي اۋدانداردىڭ ماسەلەسىن اۋتسورسينگ قۇرالى ارقىلى شەشۋ كوزدەلىپ وتىرعانىن ايتتى.

- اۋىلدىق ەلدى مەكەندەردە جەدەل جاردەم قىزمەتىمەن بىرگە اۋتسورسينگ بريگادالارى بۇرىنعىداي جۇمىس ىستەي بەرەدى. وسى جۇمىس ءبىر جولعا قويىلعاننان كەيىن باسقا دا قوسىمشا وزگەرىستەردى قاراستىرامىز، - دەدى اقمارال ءالنازاروۆا.

بۇعان دەيىن پاۆلودار اۋىلدارىندا قايتارىلعان اكتيۆتەر ەسەبىنەن امبۋلاتوريالار سالىناتىنىن جازعان ەدىك.

اۆتور

ەسىمجان ناقتىباي