جەدەل جاردەم قىزمەتى اكىمدىكتەردىڭ قۇزىرەتىنە بەرىلۋى مۇمكىن
استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا جەدەل جاردەم قىزمەتىن جەرگىلىكتى اتقارۋشى ورگانداردىڭ قۇزىرەتىنە بەرۋدى ۇسىندى.
- جەدەل جاردەمگە بايلانىستى پروبلەما جوق ەمەس، بار، وسى ورايدا كەلەسى جىلى بارلىق وبلىس جەرگىلىكتى بيۋجەت ەسەبىنەن ءتيىستى قاراجات ءبولىپ، جەدەل جاردەم كولىگى ماسەلەسىن شەشۋدى جوسپارلاپ وتىر. بىزدە تاعى ءبىر ۇسىنىس بار، جەدەل جاردەم قىزمەتىنىڭ ءتيىستى تاريفىن بەلگىلەپ، جەرگىلىكتى اتقارۋشى ورگاندارعا بەرۋ ماسەلەسى قارالۋدا، - دەدى اقمارال ءالنازاروۆا ماجىلىستە ءمامس جۇيەسى تۋرالى زاڭ جوباسىن تانىستىرۋ بارىسىندا ءماجىلىس دەپۋتاتتارىنىڭ ساۋالىنا جاۋاپ بەرە تۇرىپ.
ودان ءارى مينيستر جەدەل جاردەم قىزمەتىن ءوڭىر اكىمدىكتەرىنىڭ قۇزىرەتىنە بەرۋدىڭ سەبەبىن اتادى.
- كولىك، ينفراقۇرىلىم، اۆتوكولىكتەر تۇراعى ماسەلەلەرىن شەشۋ، بريگادالاردىڭ سانىن كوبەيتۋ جەرگىلىكتى اتقارۋشى ورگانداردىڭ قۇزىرەتىندە بولۋى كەرەك. قاراجات ءبولۋ، باسقا دا ماسەلەلەر تەز ارادا شەشىلەدى، - دەيدى ول.
بۇعان دەيىن اقمارال ءالنازاروۆا 2027-جىلدان باستاپ جەدەل جاردەم قىزمەتى بويىنشا جاڭا نورما ەنگىزىلەتىنىن مالىمدەگەن ەدى.
ودان بولەك دەنساۋلىق ساقتاۋ ءمينيسترى مەديتسينا سالاسىنا ينۆەستيتسيا قۇيعىسى كەلەتىن كاسىپكەرلەرگە جول اشىق ەكەنىن جەتكىزدى.
ايتا كەتەيىك، بۇگىن ماجىلىستە «مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى ءوتتى.
