جەدەل جاردەم قانشا ۋاقىتتا كەلۋى كەرەك؟

استانا. قازاقپارات - جەدەل جاردەم كولىكتەرى ازاماتتاردىڭ شاقىرۋىنا قانشا ۋاقىتتا كەلۋى كەرەك؟ بۇل تۋرالى دەنساۋلىق ساقتاۋ مينيسترلىگىنىڭ  تىلشىگە جولداعان رەسمي ساۋالعا جاۋابىندا ايتىلعان.

جەدەل جاردەم قانشا ۋاقىتتا جەتۋى كەرەك؟
103 پۋلتىنە شاقىرتۋ تۇسكەننەن باستاپ جەدەل جاردەم بريگاداسى مىنا ۋاقىتتا جەتۋى قاجەت:

1-جەدەلدىلىك ساناتىنداعى شاقىرتۋلارعا ورتاشا ۋاقىت - 9 مينۋت
2-جەدەلدىلىك ساناتىنداعى شاقىرتۋلارعا ورتاشا ۋاقىت - 12,1 مينۋت
3-جەدەلدىلىك ساناتىنداعى شاقىرتۋلارعا ورتاشا ۋاقىت - 17,9 مينۋت
4-جەدەلدىلىك ساناتىنداعى شاقىرتۋلارعا ورتاشا ۋاقىت - 23,8 مينۋت.
ايتا كەتەيىك، ءبىرىنشى ساناتقا ومىرگە قاۋىپ توندىرەتىن جاعدايلار، جۇرەك توقتاۋى، اۋىر جاراقات، ينفاركت، ينسۋلت، ت. س. س. جاتسا، ەكىنشى ساناتقا قاۋىپتى، ءبىراق ءبىرشاما تۇراقتى جاعدايلار، ءۇشىنشى ساناتقا تۇراقتى، ءبىراق مەديتسينالىق كومەكتى قاجەت ەتەتىن جاعدايلار، ءتورتىنشى ساناتقا ومىرگە قاۋىپ توندىرمەيتىن جاعدايلار جاتادى.

قاي وڭىرلەردە جەدەل جاردەم كولىكتەرى كوپ كەشىگەدى؟
قازاقستاندا بيىلعى 10 ايدا 4,7 پايىز جاعدايدا جەدەل جاردەم كەشىگىپ جەتكەن.

دەنساۋلىق ساقتاۋ مينيسترلىگىنىڭ رەسمي جاۋابىنا سۇيەنسەك، 4-جەدەلدىلىك ساناتىنداعى شاقىرتۋلارعا جەدەل جاردەم ءجيى كەشىككەن. بۇل - ومىرگە قاۋىپ توندىرمەيتىن جاعدايلار.

«مۇنداي كەشىگۋلەر استانا، الماتى قالالارىندا جانە باتىس قازاقستان، الماتى وبلىستارىندا جوعارى. كەش جەتۋگە نەگىزگى سەبەپ - جەدەل جاردەم بريگاداسىنىڭ جۇكتەمەسى، ماۋسىمدىق اۋرۋلار كوبەيگەن كەزدە شاقىرتۋ دا كوبەيۋى»، - دەپ جازىلعان رەسمي جاۋاپتا.

اۋىل مەن قالادا ايىرماشىلىق بار ما؟
دەنساۋلىق ساقتاۋ مينيسترلىگىنىڭ اقپاراتى بويىنشا 2017 -جىلى جەدەل جاردەم قىزمەتى بىرىكتىرىلگەن. ونىڭ قۇرىلىمىنا وبلىستىق (قالالىق) ستانسيالار، اۋداندىق بولىمشەلەر جانە مەديتسينالىق اۆياتسيا بولىمشەلەرى كىرگەن.

«بۇل نورما اياسىندا وبلىس بويىنشا جەدەل جاردەم جۇمىسىن ءبىرىڭعاي ۇيلەستىرۋ، رەسۋرستاردى ءتيىمدى ءبولۋ، جادەل جاردەمنىڭ قالالىق جانە اۋداندىق بولىمشەلەرىن دارىلىك زاتتارمەن، مەديتسينالىق بۇيىمدارمەن تولىق قامتاماسىز ەتۋ، جەدەل جاردەم ماماندارىن حالىقارالىق ستاندارتتارعا (BLS ،ACLS ،PALS ،PhTLS) سايكەس پراكتيكالىق داعدىلارعا وقىتۋ كوزدەلەدى»، - دەپ جازىلعان جاۋاپتا.

سونداي-اق، مينيسترلىك مالىمەتىنشە، شاقىرۋلاردى قابىلداۋ، وڭدەۋ جونىندەگى ديسپەتچەر 103 پۋلتىنە تۇسكەن شاقىرۋدىڭ ناقتى مەكەنجايىن انىقتاپ، ناۋقاستىڭ دەرەكتەرىن راسىمدەپ، دەرەۋ GPS ناۆيگاتسيالىق جۇيەسى ارقىلى جانە جەدەل جاعدايدى ەسكەرە وتىرىپ، جاقىن ماڭداعى جەدەل جاردەم بريگاداسىن شاقىرادى.

«قازىر قالالىق، اۋىلدىق جەرلەردەگى تۇرعىندار ءۇشىن جەدەل جاردەم ساپاسى مەن قولجەتىمدىلىگىندە ايىرماشىلىقتار جوق»، - دەپ جازىلعان جاۋاپتا.

بيىل قانشا ادام جەدەل جاردەمگە شاعىمداندى؟
2024 -جىلعى 10 ايدىڭ قورىتىندىسى بويىنشا جەدەل جاردەم قىزمەتىنە 89 شاعىم تۇسكەن، ونىڭ ىشىندە قالادا 60,7 پايىز جانە اۋىلدىق جەرلەردە 39,3 پايىز.

ۆەدومستۆو ءتيىستى شاعىمدار بويىنشا تارتىپتىك جازالار، ەڭبەك شارتتارىن بۇزۋ، قىزمەتكەرلەردى قايتا وقىتۋ جانە اتتەستاتتاۋ سەكىلدى شارالار قولدانىلاتىنىن حابارلادى.

ەسكە سالايىق، بۇعان دەيىن ءماجىلىس دەپۋتاتى اسحات ايماعامبەتوۆ قازاقستاندا جەدەل جاردەمنىڭ وزىنە جەدەل جاردەم قاجەت ەكەنىن ايتتى. بۇل تۋرالى دەپۋتات كوميتەت وتىرىسىندا مالىمدەدى.