جۇبايىنىڭ كەلىسىمىنسىز الىنعان نەسيە جويىلۋى مۇمكىن

ەلىمىزدە بانكتەر مەن ميكروقارجى ۇيىمدارى جۇبايىنىڭ كەلىسىمىنسىز راسىمدەلگەن تۇتىنۋشىلىق نەسيەلەردى نەمەسە ميكروكرەديتتەردى جويۋعا مىندەتتى بولادى.

ەگەر مۇنداي قارىز وتباسى مۇددەسى ءۇشىن الىنباعانى دالەلدەنسە، قارجى ۇيىمى نەسيە كەلىسىمشارتىن جارامسىز دەپ تانۋعا ءتيىس. بۇل تۋرالى قارجى نارىعىن رەتتەۋ جانە دامىتۋ اگەنتتىگى حابارلادى، دەپ جازادى Egemen.kz.

اگەنتتىك تۇسىندىرمەسىنە سۇيەنسەك، بۇل تالاپ وتباسىلىق مۇلىكتى قورعاۋعا جانە نەسيەنى تەرىس ماقساتتا راسىمدەۋگە جول بەرمەۋگە باعىتتالعان. قارىزدى ءبىر جۇباي ەكىنشىسىنىڭ كەلىسىمىنسىز الىپ، ونى وتباسى قاجەتىنە ەمەس، جەكە پايداسى ءۇشىن جۇمساعان جاعدايدا، بۇل زاڭ بۇزۋ بولىپ ەسەپتەلەدى. مۇندايدا ەكىنشى جۇباي نەسيەنى مويىنداۋدان باس تارتىپ، ونى زاڭسىز دەپ تانۋعا قۇقىلى.

«ەگەر ءسىز جۇبايىڭىزدىڭ سىزدەن جاسىرىن نەسيە العانىن بىلسەڭىز، ءبىرىنشى كەزەكتە بانكتەن نەمەسە ميكروقارجى ۇيىمىنان سول قارىز تۋرالى تولىق اقپارات سۇراتۋىڭىز كەرەك. بۇل ءۇشىن سىزگە نوتاريالدى سەنىمحات قاجەت بولۋى مۇمكىن. كەيىن نەسيە زاڭسىز دەپ تانىلۋى ءۇشىن رەسمي جازباشا ءوتىنىش جازىپ، قارجى ۇيىمىنا جولداۋ كەرەك. ەگەر بانك نەمەسە ميكروقارجى ۇيىمى ارىزىڭىزدى قاناعاتتاندىرماسا، ءسىز اگەنتتىككە نەمەسە بانك ومبۋدسمەنىنە شاعىمدانا الاسىز»، دەپ تۇسىندىرەدى وكىلەتتى ورگان.

ايتا كەتەيىك، بۇگىندە اگەنتتىك ءتيىستى زاڭناماعا وزگەرىستەر ەنگىزۋدى كوزدەپ وتىر. جاڭا جوباعا سايكەس، ەگەر تۇتىنۋشىلىق نەسيە سوماسى 1000 ايلىق ەسەپتىك كورسەتكىشتەن (شامامەن 3,9 ميلليون تەڭگە) اسسا، ونى راسىمدەۋ ءۇشىن جۇبايىنىڭ مىندەتتى كەلىسىمى قاجەت بولادى. تەك ەكى جاعدايدا عانا بۇل تالاپ قويىلمايدى: ەگەر جۇباي قارىزعا بىرگە كىرەتىن بولسا نەمەسە نەسيە بۇرىننان بار قارىزدى وتەۋ ءۇشىن سول بانكتەن الىنعان بولسا.

مۇنداي وزگەرىستەر ازاماتتاردىڭ قارجىلىق قاۋىپسىزدىگىن ارتتىرىپ، وتباسىلىق جاۋاپكەرشىلىكتى كۇشەيتۋگە باعىتتالعان.

egemen.kz