جازعى كانيكۋلدا بالالارعا ارنالعان قانداي سپورتتىق ءىس-شارالار وتەدى
استانا. KAZINFORM - بيىل جازدا ەل اۋماعىندا بالالار سپورتىن ىلگەرىلەتۋ ماقساتىندا ءبىرقاتار اۋقىمدى ءىس-شارا وتكىزىلەدى. تولىعىراق تۋريزم جانە سپورت ۆيتسە-ءمينيسترى ەرجان ەركىنبايەۆ ايتىپ بەردى.
- جۇمىستىڭ كەلەسى باعىتى بالالار مەن جاس وسپىرىمدەردىڭ سپورتتىق الەۋەتىن دامىتۋ، سالاۋاتتى ءومىر سالتىن ناسيحاتتاۋ. جازعى دەمالىس كەزىندە بالالار مەن جاس وسپىرىمدەرگە ارنالعان پرەزيدەنت تەستتەرى، «KAPSHAGAI KIDS TROPHY» رەسپۋبليكالىق فۋتبول تۋرنيرى وتەدى. سونداي-اق اۋىل مەكتەپتەرى اراسىندا «اۋىل سپورتى» كەشەندى جارىستارى، اۋىل بالالارى اراسىندا فۋتبولدان «Halyk OPEN CUP» رەسپۋبليكالىق تۋرنيرى وتەدى. بالالاردىڭ بوس ۋاقىتى مەن سپورتتىق دايىندىعى ءۇشىن «قولجەتىمدى سپورت» جانە «اۋلا فيت» جوبالارى تابىستى ىسكە اسىرىلىپ جاتىر. مەملەكەتتىك سپورتتىق تاپسىرىس شەڭبەرىندە 7 مىڭنان استام سپورت سەكتسياسى جۇمىس ىستەيدى. وعان 250 مىڭنان استام بالالار مەن جاس وسپىرىمدەر تەگىن قاتىسادى. بۇل باعدارلاما جازعى دەمالىس كەزىندە جۇزەگە اسىرىلادى، - دەدى ەرجان ەركىنبايەۆ ۇكىمەت وتىرىسىندا.
سونداي-اق بارلىق وڭىردە بالالاردى قورعاۋ كۇنىنە (1-ماۋسىم) جانە سپورت كۇنىنە (18-تامىز) ارنالعان حالىق اراسىندا سپورتتىق-بۇقارالىق جانە ساۋىقتىرۋ ءىس-شارالارى وتەدى.
- سونىمەن قاتار جىل سايىن جالپى ءبىلىم بەرەتىن مەكتەپتەر اراسىندا 10 سپورت ءتۇرى بويىنشا ۇلتتىق مەكتەپ سپورت ليگاسى وتكىزىلەدى. بۇگىندە ەلىمىزدە جىل بويى 521 بالالار مەن جاسوسپىرىمدەر سپورت مەكتەبى جۇمىس ىستەيدى. وندا 406 مىڭنان استام بالا اينالىسادى. سونداي-اق جالپى سانى 6,5 مىڭنان استام بالانى قامتيتىن وليمپيادالىق رەزەرۆتەگى 14 وبلىستىق جانە 5 رەسپۋبليكالىق مامانداندىرىلعان مەكتەپ-ينتەرنات-كوللەدجى بار. اتالعان مەكەمەلەردىڭ تاربيەلەنۋشىلەرى ءۇشىن جازعى ۋاقىتتا سپورتتىق جانە سپورتتىق-ساۋىقتىرۋ لاگەرلەرى ۇيىمداستىرىلادى. ەرەكشە ءبىلىم بەرۋ قاجەتتىلىكتەرى بار بالالارعا ايرىقشا نازار اۋدارىلادى. بۇل باعىتتا مۇمكىندىگى شەكتەۋلى بالالار مەن جاسوسپىرىمدەردىڭ سپورتپەن شۇعىلدانۋعا، سالاۋاتتى ءومىر سالتىن ۇستانۋعا، ولاردىڭ سپورتتاعى تالانتىن دامىتۋعا ءارى ىنتاسىن ارتتىرۋعا ارنالعان ءىس-شارالار وتەدى، - دەيدى ول.
ونىڭ ايتۋىنشا، وسى جازدا ەرەكشە بالالارعا ارنالعان سپورتتىڭ 7 ءتۇرى بويىنشا «جۇلدىزاي» ۇلتتىق ينكليۋزيۆتى ويىندارىنىڭ وڭىرلىك ىرىكتەۋ جارىستارى جالعاسادى.
- ودان بولەك ۇلتتىق سپورت تۇرلەرى بويىنشا توعىزقۇمالاقتان «جاس ءۇمىت» رەسپۋبليكالىق تۋرنيرى، جامبى اتۋدان جاس وسپىرىمدەر اراسىنداعى قازاقستان رەسپۋبليكاسىنىڭ چەمپيوناتى، 2012-2013-جىلى تۋعان بالالار اراسىندا قازاق كۇرەسىنەن قازاقستان رەسپۋبليكاسىنىڭ بىرىنشىلىگى، جاس وسپىرىمدەر اراسىندا اسىق اتۋدان قازاقستان رەسپۋبليكاسىنىڭ چەمپيوناتى جوسپارلانعان. ءىس-شارالاردى وتكىزۋ كەزىندە بارلىق مۇددەلى تاراپپەن بىرلەسىپ قاتىسۋشىلاردىڭ قاۋىپسىزدىگىن قامتاماسىز ەتۋ ءۇشىن قاجەتتى شارالار قابىلدانادى. پرەزيدەنت اكىمشىلىگىنىڭ تاپسىرماسى اياسىندا جەرگىلىكتى اتقارۋشى ورگاندارمەن «بالالاردى اۆتوكولىكپەن تاسىمالداۋ قاۋىپسىزدىگى ەرەجەلەرىن ساقتاۋ» تاقىرىبىندا كەڭەس وتكىزىلدى. سپورت فەدەراتسيالارى مەن وڭىرلىك باسقارما مادەنيەت جانە سپورت سالاسىنداعى ۇيىمداردىڭ بالالاردى قاۋىپسىز تاسىمالداۋى بويىنشا سۋرەتتەردەن تۇراتىن ادىستەمەلىك ۇسىنىمدار جولدادى، - دەپ تولىقتىردى ە. ەركىنبايەۆ.
ايتا كەتەيىك، ەندى بالالاردى سپورت جارىستارىنا پوليتسيانىڭ سۇيەمەلدەۋىنسىز جىبەرۋگە تىيىم سالىنادى.
