جازعى دەمالىستا بالالاردى مۋزەيلەرگە، تەاترلارعا، سپورت نىساندارىنا تەگىن اپارۋ ۇسىنىلدى
استانا. KAZINFORM - بۇگىن ۇكىمەتتە بالالاردىڭ جازعى دەمالىسىن ۇيىمداستىرۋ ماسەلەسى پىسىقتالدى جانە پرەمەر-مينيستر ولجاس بەكتەنوۆ دەمالىس ساپاسىن جاقسارتۋ جونىندە ءوز ۇسىنىمدارىن ايتتى.
«بالالاردى، ەڭ الدىمەن الەۋمەتتىك جاعىنان وسال ساناتتاعى بالالاردى جازعى دەمالىسپەن قامتۋ كەرەك. دەمالىس كەزەڭىندە بالالاردىڭ مۋزەيلەرگە، تەاترلارعا، قورىقتارعا، ۇلتتىق پاركتەر مەن سپورت وبەكتىلەرىنە تەگىن بارۋىن قامتاماسىز ەتۋ قاجەت»، - دەدى و. بەكتەنوۆ ۇكىمەت وتىرىسىندا.
سونىمەن بىرگە، پرەمەر- مينيستر اۋىل بالالارىنىڭ بوس ۋاقىتىنا ەرەكشە نازار اۋدارۋ كەرەگىن ايتۋدا. ولار ءۇشىن سپورت الاڭدارىن، دامىتۋ ورتالىقتارىن جابدىقتاپ، بوس ۋاقىتتاعى، مادەني ءىس-شارالاردى جانە باسقا دا شارالاردى ۇيىمداستىرۋ كەرەك.
«دەنساۋلىق ساقتاۋ مينيسترلىگى رۇقسات قۇجاتتارى جوق جازعى ساۋىقتىرۋ ۇيىمدارىنىڭ جۇمىس ىستەۋىنە جول بەرمەۋگە ءتيىس. بالالاردى تاماقتاندىرۋدىڭ ساپاسىن ۇنەمى سانيتاريالىق- ەپيدەميولوگيالىق باقىلاۋدا ۇستاۋ قاجەت»، - دەدى ول.
ال وقۋ- اعارتۋ مينيسترلىگى تۋريزم مينيسترلىگىمەن بىرگە ءار وبلىستان كەلەتىن بالالاردىڭ ەلىمىزدىڭ تانىمال تۋريستىك ايماقتارىنا، تاريحي- مادەني مۇرا وبەكتىلەرىنە بارۋى ءۇشىن اكىمدىكتەردىڭ ءوڭىرارالىق ءوزارا ءىس- قيمىلىن ۇيلەستىرۋى قاجەت.
بۇعان دەيىن پرەمەر- مينيستر بالالاردىڭ جازعى دەمالىسىن ۇيىمداستىرۋدى سىنعا العان ەدى.
سونداي- اق، بالالاردى لاگەرلەرمەن، ۇيىرمەلەرمەن، سەكسيالارمەن، ساۋىقتىرۋمەن قامتۋ بويىنشا ءبىرىڭعاي ەلەكتروندىق پلاتفورما قاجەت ەكەنى ايتىلدى.
