جازعى دەمالىس: بالالاردى اتا-اجەسىنە جىبەرۋ دۇرىس پا

استانا. KAZINFORM - بالالاردىڭ كوپتەن كۇتكەن جازعى دەمالىس ماۋسىمى باستالدى. 90 كۇندى ءتيىمدى وتكىزۋ ءۇشىن نە ىستەۋ كەرەك؟ ءۇش اي جازدا بالاعا نە ىستەگەن پايدالى؟ KazInform ءتىلشىسى انىقتاپ كوردى.

جاز باستالا سالا بالالار ءتۇرلى لاگەرلەرگە بارىپ، ۋاقىتىن كوڭىلدى وتكىزەدى. الايدا بۇل باقىت بارىنە بىردەي بۇيىرا بەرمەيدى. وتكەن جولى وقۋ-اعارتۋ مينيسترلىگى تاربيە جانە قوسىمشا ءبىلىم بەرۋ دەپارتامەنتىنىڭ باسقارما باسشىسى التاي راحىمبەرلين بيىل %92 وقۋشى لاگەرمەن قامتىلاتىنىن حابارلاعان ەدى.

- ەلىمىزدە جىل بويى جۇمىس ىستەيتىن 16 لاگەر بار. وندا 15 مىڭنان استام بالا قامتىلادى دەپ جوسپارلاپ وتىرمىز. سونىمەن قاتار، ءۇش اي جۇمىس ىستەيتىن 188 ماۋسىمدىق لاگەر بار. ول جەردە 160 مىڭنان استام بالا قابىلدانادى دەپ جوسپارلانعان. وعان قوسا، 10 مىڭنان استام مەكتەپ جانىنداعى لاگەرلەر وقۋشىلاردى قابىلدايدى، - دەيدى ول KazInform تىلشىسىنە بەرگەن سۇحباتىندا.

ال لاگەرگە بارمايتىن بالالار ۋاقىتتى قالاي وتكىزۋى كەرەك؟ بۇل ماسەلەدە اتا-انانىڭ ءرولى قانداي؟ بالالار پسيحولوگى جاۋاپ بەردى.

- جازعى دەمالىس كەزىندە اتا-انالار بالانىڭ كۇن ءتارتىبىن تولىق جوسپارلاپ تاستاۋعا تىرىسادى. ءبىراق بۇل كەزەڭ - بالا ءۇشىن ەركىندىك ۋاقىتى. دەمالىستى مىندەتكە اينالدىرۋ، ءومىرىن %100 جوسپارلاپ، بارلىق ۋاقىتىنا ارالاسا بەرۋ دۇرىس ەمەس. بالانىڭ ءوزى قالاعان ىسپەن اينالىسۋىنا، كەيدە ءتىپتى جاي عانا ءىشىنىڭ پىسۋىنا دا مۇمكىندىك بەرۋ كەرەك. ويتكەنى ءىش پىسۋ — شىعارماشىلىق پەن جاڭا قابىلەتتەردىڭ باستاۋى. ءىشى پىسقان ساتتە بالا وزىمەن تانىسادى. نەنى قالايتىنىن، قانداي ىسپەن اينالىسقىسى كەلەتىنىن تۇسىنەدى. بالانىڭ وزىمەن بولۋعا، ىشكى دۇنيەسىن تىڭداۋعا ۋاقىتى بولۋى ءتيىس. سونىمەن قاتار، كۇنى بويى قاراۋسىز قالعان بالا تەلەفونعا كىرىپ كەتۋى مۇمكىن. ءبىراق ونى تىم قاتتى باقىلاۋدا ۇستاۋ دا كەرى اسەر ەتەدى. سوندىقتان تەپە-تەڭدىكتى تابۋ - باستى قاعيدا، - دەيدى ءمولدىر توعجانوۆا.

ماماننىڭ ايتۋىنشا، جازعى دەمالىستى اۋىلدا وتكىزۋ - ەڭ پايدالى نۇسقا. سەبەبى، اۋىلدا بالانىڭ اعزاسىنا كەرەك ءبىرتالاي دارۋمەندى ويناپ ءجۇرىپ-اق سىڭىرۋگە بولادى، ءارى بالانىڭ پسيحيكاسىنا وڭ اسەر ەتەدى ەكەن.

- يدەال دەمالىس - كۇن ساۋلەسى، سۋ، تازا اۋا، توپىراق، جەمىس-جيدەك. وسىنداي ورتا بالا پسيحيكاسىنا وڭ اسەر ەتەدى. سوندىقتان بالانى اۋىلعا جىبەرۋ پايدالى. ءبىراق اتا- اجە تىم كوپ شەكتەۋ قويمايتىن، تەلەفوندا وتىرمايتىن بولسا عانا. كەيبىر اتا- انالار بالاسىن تەك وزدەرى عانا قاراي الادى دەپ ويلايدى. بۇل - انانىڭ شارشاپ، ەموتسيونالدىق كۇيزەلىسكە تۇسۋىنە سەبەپ بولادى، - دەيدى پسيحولوگ.

بالانى اتا-اجەسىنە جىبەرمەس بۇرىن، بۇل ناقتى كىمنىڭ قالاۋى ەكەنىن دە انىقتاپ العان ءجون. ويتكەنى پسيحولوگ اتا-انالار ءدال وسى ماسەلەدە ءجيى قاتەلىك جىبەرەتىنىن ايتادى.

- كەيدە بالانى اتا-اجەسىنە جىبەرۋ - بالانىڭ ەمەس، اتا-انانىڭ ىشكى ەموتسيالىق ماسەلەسىن شەشۋ جولى بولىپ كەتەدى. «مەنىڭ اتا- انام عوي، ولار رەنجىپ قالماسىن» دەگەن ويمەن اتا-انا ءوز بالاسىن «قۇربان» ەتەدى. ءبىراق بالانىڭ ءومىرى ەرەسەكتەردىڭ ەموتسيالىق قاقتىعىسىن شەشۋ قۇرالىنا اينالماۋى كەرەك، - دەيدى ول.

ايتا كەتەلىك بالالارعا قارجىلىق ساۋاتتىلىقتى ۇيرەتەتىن جاڭا مۋلتفيلم جارىق كورگەنى تۋرالى جازعان ەدىك.