جايىق وزەنىنىڭ كاسپي تەڭىزىنە قۇيار ساعاسىن تەرەڭدەتۋ باستالدى
اتىراۋ. KAZINFORM - جايىق وزەنىنىڭ كاسپي تەڭىزىنە قۇيار ساعاسىنىڭ ءتۇبىن تەرەڭدەتۋ باستالدى.
اتىراۋ وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ ايتۋىنشا، وزەن ساعاسىن تەرەڭدەتۋ جەدەلدەتىلگەن تارتىپپەن جۇرگىزىلىپ جاتىر.
«ماقساتىمىز - جايىق وزەنىنىڭ سۋىن كاسپي تەڭىزىنە قۇيىلۋ اعىسىن ارتتىرۋ. قازىر وزەننىڭ تەڭىزگە قۇيار ساعاسى وتە تەرەڭ ەمەس. قازىرگى تەرەڭدىگى نەبارى - 40-50 سانتيمەتر، ەنى - 20 مەتر. تەرەڭدەتۋ جۇمىسى اياقتاعاننان كەيىن وزەن ساعاسىنىڭ تەرەڭدىگى 2 مەترگە دەيىن جەتەدى. بۇل وزەنگە كەلەتىن مول سۋدىڭ كاسپيگە قۇيىلۋ اعىسىن ارتتىرادى»، - دەدى نۇربەرگەن قۇسايىنوۆ.
ونىڭ ايتۋىنا قاراعاندا، وزەن ساعاسىن تازارتۋ، تەرەڭدەتۋ كەڭەيتۋ ءۇشىن ەكى ەكسكاۆاتور قولدانىلادى. سونداي-اق، الداعى ۋاقىتتا وسىنداي جۇمىستاردى اتقارۋعا تيىمدىلىگى جوعارى «امفيبيا» ەكسكاۆاتورى جۇمىسقا تارتىلادى.
ەسكە سالا كەتەلىك، بۇدان بۇرىن سەرىك شاپكەنوۆ جايىق وزەنىنىڭ سۋى اتىراۋ قالاسىنا قاي تۇستان كىرۋى مۇمكىن ەكەنىن ايتقان بولاتىن.
سونداي-اق، اتىراۋدا بەرەكە، المالى، بەسىكتى اۋىلدارىن سۋ باسۋى مۇمكىن ەكەنىن جازعان ەدىك.
