جاياۋ ءجۇرۋدىڭ جاپونشا ءادىسى: دەنساۋلىققا قانداي پايداسى بار؟
جاپونيادان باستاۋ العان ەرەكشە جاياۋ ءجۇرۋ ءادىسى بۇگىندە الەمدىك دەنساۋلىق ساقتاۋ سالاسىنىڭ نازارىنا ىلىككەن تىڭ جاڭالىق. عالىمدار ءتيىمدى ءارى قولجەتىمدى دەپ باعالاعان بۇل ءتاسىل - «جاپونشا ءجۇرۋ» (نەمەسە ينتەرۆالدى ءجۇرىس) - قازىر TikTok جەلىسىندە كەڭىنەن تانىلىپ، #FitTok حەشتەگىمەن تارالىپ جاتىر. ال ونىڭ ارتىندا دەرەكتى زەرتتەۋلەر مەن ناقتى ناتيجەلەر جاتىر، - دەپ حابارلايدى Euronews.com.
جاپون عالىمدارى حيروشي نوسە مەن سيدزۋە ماسۋكي العاش رەت 2007 -جىلى بۇل ءادىستى ۇسىنعان. ولار 246 ەگدە جاستاعى ادامدى ءۇش توپقا ءبولىپ، ءبىر بولىگىنە مۇلدەم جۇرمەۋدى، ەكىنشىسىنە جاي ءجۇرىستى، ال ۇشىنشىسىنە ءۇش مينۋت جىلدام، ءۇش مينۋت باياۋ ءجۇرىستى اۋىستىرىپ وتىرۋدى تاپسىرعان. بۇل جاتتىعۋ اپتاسىنا 4-5 رەت، كۇنىنە 30 مينۋت ورىندالعان.
ناتيجەسىندە ينتەرۆالدى تاسىلمەن جۇرگەن ادامداردا اياق بۇلشىقەتتەرىنىڭ كۇشى ارتقان، قان قىسىمى تومەندەگەن، جالپى فيزيكالىق دايىندىق جاقسارعان. جاڭا زەرتتەۋلەر مۇنىمەن شەكتەلمەيدى: 700 دەن استام ادام قاتىسقان كەيىنگى زەرتتەۋ ينتەرۆالدى ءجۇرۋ كوگنيتيۆتى قابىلەتكە، ۇيقى ساپاسىنا، كۇيزەلىس دەڭگەيىنە وڭ اسەر ەتەتىنىن كورسەتكەن.
عىلىم نە دەيدى؟
ۇلى بريتانياداعى كيل ۋنيۆەرسيتەتىنىڭ فيزيولوگيا پروفەسسورى دجون باكلي بۇل ءتاسىلدى «ورگانيزمگە شامالى كۇشپەن قىسىم ءتۇسىرۋ ارقىلى بەيىمدەۋ» دەپ سيپاتتايدى. بۇل - سپورت عىلىمىندا كەڭىنەن تانىلعان «جۇكتەمە پرينتسيپى».
- ادامنىڭ دەنساۋلىعى تەك جۇرەك پەن وكپەنىڭ جۇمىسىنا ەمەس، بۇلشىقەتتەگى مەتابوليزمگە دە تىعىز بايلانىستى. قىسقا ۋاقىتتىق كۇش ءتۇسىرۋ ارقىلى ءبىز وسى مۇشەلەردىڭ جۇمىسىن جاقسارتامىز، - دەيدى ول.
جالپى، ادامنىڭ ەۆوليۋتسيالىق دامۋىنا ءتان قوزعالىس - قىسقا قارقىنمەن جۇگىرىپ، كەيىن ۇزاق ۋاقىت باياۋ قوزعالۋ. ياعني بۇل ءادىس تابيعي قوزعالىس ۇلگىسىنە جاقىن.
دەنساۋلىققا ناقتى قانداي پايداسى بار؟
جاپونشا ءجۇرۋ جۇرەك اۋرۋى، قانت ديابەتى، سەمىزدىك سياقتى زاماناۋي پروبلەمالارمەن كۇرەسۋگە كومەكتەسەدى. بۇل جاتتىعۋ قانداعى قانت دەڭگەيىن تومەندەتىپ، ارتەريالىق قىسىمدى رەتتەيدى، سونداي-اق جاتتىعۋدان كەيىنگى كالوريا شىعىنىن ارتتىرادى. اسىرەسە ينسۋلتتىڭ الدىن الۋدا ارتەريالىق قىسىمدى باقىلاۋدا ۇستاۋ ماڭىزدى.
بۇل ءتاسىل پسيحيكالىق دەنساۋلىققا دا وڭ ىقپال ەتەدى. جوعارى قارقىندى ساتتەردە ادامنىڭ نازارى سول ساتكە اۋىسادى، بۇل «ميني- مەديتاتسيا» اسەرىن بەرەدى. جاقىندا جاريالانعان شولۋدا جوعارى قارقىندى ينتەرۆالدى جاتتىعۋلار (HIIT) مازاسىزدىق دەڭگەيىن تومەندەتەتىنى دالەلدەنگەن.
جاپونشا ءجۇرۋ - كەز كەلگەن ادامعا قولجەتىمدى. كۇردەلى جابدىق قاجەت ەمەس، كەز كەلگەن جەردە جاساۋعا بولادى. سونىمەن قاتار، بۇل ءادىستى ۆەلوسپورتقا، جۇزۋگە نەمەسە كۇشتىك جاتتىعۋلارعا دا بەيىمدەۋگە بولادى.
قورىتىندى: TikTok-تاعى ترەندتىڭ بۇل جولى شىنايى عىلىمي نەگىزى بار. ەگەر دەنساۋلىعىڭىزدى نىعايتقىڭىز كەلسە، جاپون ادىسىمەن 30 مينۋت سەرۋەندەۋدى بۇگىننەن باستاپ كەتۋىڭىزگە بولادى.
