جاپونيادا «Twitter- دەگى كىسى ءولتىرۋشى» ءولىم جازاسىنا كەسىلدى
استانا. KAZINFORM - جاپونيادا جۇما كۇنى الەۋمەتتىك جەلى ارقىلى بايلانىس ورناتىپ، توعىز ادامدى ولتىرگەن ەر ادام ءولىم جازاسىنا كەسىلىپ، ۇكىم ورىندالدى، دەپ حابارلايدى ازەرتادج.
Reuters اگەنتتىگى بۇل جاپونيادا سوڭعى ءۇش جىلدا العاش رەت ورىندالعان ءولىم جازاسى ەكەنىن حابارلادى.
تاكاحيرو سيرايسي 2017 -جىلى توكيو ماڭىنداعى كاناگاۆا پرەفەكتۋراسىنداعى دزاما قالاسىنداعى پاتەرىندە سەگىز ايەل مەن ءبىر ەر ادامدى تۇنشىقتىرىپ ءولتىرىپ، دەنەلەرىن بولشەكتەپ تاستاعانى ءۇشىن ءولىم جازاسىنا كەسىلگەن ەدى. ول قۇرباندارىمەن الەۋمەتتىك جەلى ارقىلى بايلانىسقاندىقتان، ونى «Twitter- كىسى ءولتىرۋشى» دەپ اتاپ كەتكەن.
جاپونيانىڭ ادىلەت ءمينيسترى كەيسۋكە سۋدزۋكي سيرايسيدىڭ دارعا اسىلۋىنا رۇقسات بەرىپ، بۇل قىلمىستاردىڭ قوعامدا «ۇلكەن دۇربەلەڭ مەن شوك» تۋعىزعانىن ايتتى.
بۇل - 2022 -جىلعى شىلدەدە اكيحابارادا جاپپاي كىسى ولتىرگەن قىلمىسكەرگە قاتىستى ۇكىم ورىندالعاننان بەرگى العاشقى ءولىم جازاسى.
سونداي- اق بۇل - پرەمەر- مينيستر سيگەرۋ يسيبانىڭ وتكەن جىلدىڭ قازان ايىندا ۇكىمەت باسىنا كەلگەنىنەن كەيىن العاش رەت ءولىم جازاسىنىڭ ورىندالۋى.
- مۇنداي قاتىگەز قىلمىستار جالعاسىپ جاتقان كەزدە ءولىم جازاسىن جويۋعا بولمايدى، - دەدى مينيستر سۋدزۋكي باسپا ءسوز ءماسليحاتىندا.
ونىڭ ايتۋىنشا، قازىرگى تاڭدا جاپونيادا ءولىم جازاسىنا كەسىلگەن 105 تۇتقىن بار.
بۇدان بۇرىن ۆەتنام ءبىرقاتار قىلمىس ءۇشىن ءولىم جازاسىن الىپ تاستايتىنى حابارلاندى.
