جاپونيادا قوقىس جيناۋدان تۇڭعىش رەت حالىقارالىق جارىس ءوتتى

  .وعان الەمنىڭ تۇپكىر- تۇپكىرىنەن 21 ەلدىڭ وكىلدەرى قاتىستى. تازالىققا ەرەكشە ءمان بەرەتىن جاپوندار قوقىس جيناۋدى ەندى جارىسقا اينالدىرىپ، وسىلايشا الەم نازارىن جاھاندىق پروبلەماعا بۇرعىسى كەلەدى

الەم ەلدەرى تاجىريبەسىندە قالا كوشەلەرىنىڭ تازالىعىمەن ارنايى ساقشىلار اينالىسادى. ال كۇنشىعىس ەلىندە بۇل جۇمىس تۇرعىندارعا جۇكتەلگەن. ويتكەنى جەرگىلىكتى حالىق كوشەدە شاشىلعان قوقىس كورسە، دەرەۋ جاشىككە تاستاۋدى ادەتكە اينالدىرعان. بۇل - بۇرىننان بار ادەت. ەندى مىنە قوقىس جيناۋ سپورتقا اينالدى. بيىل تازالىق جارشىلارى الەم دەڭگەيىندە سايىس وتكىزۋدى قولعا الدى.

ميتسۋيۋكي ۋننو، سايىستى ۇيىمداستىرۋشى:

- چەمپيوناتتىڭ ماقساتى - تەڭىز جانە مۇحيتتاردى پلاستيكالىق قالدىقتاردان تازارتۋعا ادامداردىڭ قىزىعۋشىلىعىن وياتۋعا ءارى قورشاعان ورتانى تازا ۇستاۋعا ۇگىتتەۋ. سوندىقتان بۇل بايقاۋ قاتىسۋشىلاردىڭ اينالاسىن ايناداي ۇستاۋىنا، تابيعات جاناشىرى بولۋعا مۇمكىندىك بەرەدى.

الەم چەمپيونى اتانۋ ءۇشىن بار- جوعى 90 مينۋت ىشىندە كوپ مولشەردە قوقىس تەرۋ كەرەك. ءار توپ 3 كىسىدەن جاساقتالعان. ا ق ش، اۆستراليا، فرانسيا سىندى ءىرى دەرجاۆالار باق سىناعان بايگەدە ۇلى بريتانيا كومانداسى وزىق شىقتى. تۇماندى البيون توبى ءبىر جارىم ساعاتتا جاشىگىن 57 كەلىگە تولتىردى. ال جاپونيا ەكىنشى ورىنعا تۇراقتاسا، ا ق ش كومانداسى جۇلدەلى ءۇشىنشى ورىندى قانجىعاسىنا بايلادى.

سارا پەرري، سايىسقا قاتىسۋشى / ۇلى بريتانيا/:

- چەمپيوناتقا قاتىسۋ ارقىلى ءبىز دە «سپوگومي» سپورتىنىڭ دامۋىنا ءوز ۇلەسىمىزدى قوستىق. ءارى قوقىس جيناۋدى سپورت رەتىندە باعالاپ، جاپونيانىڭ مادەنيەتىمەن تانىسۋعا مۇمكىندىك الدىق. ەكولوگيالىق ورتانىڭ قانشالىقتى ماڭىزدى ەكەنىن سەزىنە بىلدىك. ءبىز ءۇشىن ۇلكەن تاجىريبە بولدى. چەمپيونات العاش رەت ۇيىمداستىرىلسا دا، قاتىسۋشىلاردىڭ العان اسەرى ايرىقشا. 2 كۇنگە سوزىلعان بايقاۋدا جەر- اناعا قۇرمەتىمىز ارتىپ، قورشاعان ورتاعا شىن جاناشىر بولۋدى ۇيرەندىك دەيدى اۆستراليادان كەلگەن قاتىسۋشى پەترا ۋيليامس.

پەترا ۋيليامس، سايىسقا قاتىسۋشى /اۆستراليا/:

- چەمپيونات ءبىزدى سىنادى، تاربيەلەدى، باستىسى جەر- انانى قادىرلەپ، پلانەتامىزدى قالدىقتاردان ساقتاۋعا ۇيرەتتى. جاپونيادان ۇلگى الارلىق تۇسىمىز كوپ. بايقاۋعا قاتىسۋ ارقىلى بۇل ەلدىڭ داستۇرىمەن، مادەنيەتىمەن جاقىنىراق تانىستىق. بايقاۋ بارىسىندا قاتىسۋشى كوماندالار باس- اياعى 550 كەلىگە جۋىق قوقىس جيناپ، تازالىقتىڭ تاماشا ۇلگىسىن كورسەتتى. ەندى بۇل سپورت كەڭ ەتەك جايىپ، الەم ەلدەرىندە دە تاجىريبەگە ەنسە ەكەن دەيدى ۇيىمداستىرۋشىلار. ال كەلەسى چەمپيوناتتى 2025 -جىلى تاعى دا توكيودا وتكىزۋ جوسپاردا بار.

www.24.kz