جاپونيادا ناقتى جالاقى ەكىنشى جىل قاتارىنان تومەندەپ جاتىر

توكيو. KAZINFORM - جاپونياداعى ناقتى جالاقى 2023 -جىلى 2,5 پايىزعا تومەندەدى، بۇعان ينفلياتسيا ءوسىمى سەبەپ بولدى. بۇل رەتتە ءۇي شارۋاشىلىعىنىڭ شىعىندارى سوڭعى ءۇش جىلدا العاش رەت قىسقاردى، دەپ حابارلايدى Kyodo News.

بۇل - ەلدە جالاقىنىڭ 2014 -جىلدان بەرى (ول كەزدە 2,8 پايىزعا تومەندەگەن) ەڭ كۇرت تومەندەۋى بولدى.

بۇل جاعداي ەل پرەمەر-ءمينيسترى فۋميو كيسيدانىڭ باعا ءوسىمىنىڭ ورنىن وتەي الاتىن جالاقىنى كوتەرۋ تۋرالى بىرنەشە رەت ۇندەۋ سالعانىنا قاراماستان بولىپ وتىر.

جاپونيانىڭ دەنساۋلىق ساقتاۋ، ەڭبەك جانە الەۋمەتتىك قامتاماسىز ەتۋ مينيسترلىگىنىڭ الدىن الا ەسەبىنشە، اتاۋلى جالاقى ايىنا 1,2 پايىز ءوسىپ، 329859 يەن (2200 دوللار) بولدى.

ناقتى جالاقىنىڭ تومەندەۋى ءتىپتى ءىرى جاپوندىق كومپانيالار ايلىقتى وتكەن جىلى ورتا ەسەپپەن 3,99 پايىز ارتتىرسا دا جالعاسىپ جاتىر.

«قولايلى ەكونوميكالىق تسيكلدىڭ ارقاسىندا ادامداردىڭ ءومىرىن جاقسارتۋ ءۇشىن ناقتى جالاقى كوتەرىلۋى كەرەك. ءبىز جالاقىنىڭ كوتەرىلۋى ايماقتىق اۋداندارعا، شاعىن جانە ورتا بيزنەسكە تارالاتىنداي سەرپىن جاساۋعا تىرىسامىز»، - دەدى ەڭبەك ءمينيسترى كەيدزو تاكەمي.

سونداي-اق، ەلدەگى ءۇي شارۋاشىلىعىنىڭ ورتاشا شىعىندارى 2023 -جىلى وتكەن جىلمەن سالىستىرعاندا 2,6 پايىزعا تومەندەدى، بۇعان ادامدار باعانىڭ ءوسۋى جاعدايىندا بىلىمگە، ازىق-تۇلىككە جانە تۇرمىستىق تاۋارلارعا جۇمسالاتىن شىعىنداردى قىسقارتۋى سەبەپ بولعان.