جاپونيادا جىلان پويىزدار قوزعالىسىن ەكى ساعاتقا توقتاتتى

استانا. KAZINFORM - جاپونياداعى توكيو مەن وساكا اراسىندا ادام ەڭ كوپ جۇرەتىن «سينكانسەن» جەلىسىندە جۇردەك پويىزدار قوزعالىسى ەلەكتر سىمدارىنا جىلان ورالىپ قالۋى سالدارىنان ءبىراز ۋاقىتقا توقتاپ قالدى، دەپ حابارلايدى BBC.

ۇزىندىعى ءبىر مەتر جىلان ەلەكتر تاراتۋ جەلىسىنە ورالىپ، ونى تۇيىقتاپ العان. حابارلامالارعا سايكەس، باعاناعا باۋىرىمەن جورعالاپ شىققان ول سىمدارمەن وتپەك بولىپ ولگەن.

وقيعا «مايبارا» مەن «گيفۋ- حاسيما» ستانسالارى اراسىندا سارسەنبى كۇنى كەشكى ساعات 17 شاماسىندا بولعان، دەپ حابارلايدى Kyodo.

جولاۋشىلاردىڭ ايتۋىنشا، پويىزداردا ەلەكتر جارىعى، ونىڭ ىشىندە شامدار مەن كونديتسيونەرلەر جۇمىس ىستەدى، ءبىراق پويىزداردىڭ ءوزى جۇرمەگەن.

Kyodo جازعانداي، توكيو ستانسالارىنىڭ بيلەت ساتاتىن اۆتوماتتارىندا ۇزىن-سونار كەزەك پايدا بولعان. پويىز قوزعالىسى كەشكى ساعات 19.00 شاماسىندا قالپىنا كەلتىرىلدى. جاپونيادا بىردەن ءتورت ۇلتتىق مەرەكەنى بىرىكتىرەتىن التىن اپتا ءوتىپ جاتىر، وسىعان بايلانىستى اۋەجايلار، ۆوكزالدار جانە باسقا دا كولىك توراپتارى ەرەكشە كۇشەيتىلگەن رەجيمدە جۇمىس ىستەپ كەلەدى.

«سينكانسەن» - جاپونيادا جوعارى جىلدامدىقتى تەمىرجول جەلىسى. توكيو مەن وساكا اراسىنداعى العاشقى جەلى 1964 -جىلى 1-قازاندا جازعى وليمپيادا ويىندارى قارساڭىندا اشىلدى.

اۆتور

زارينا تۋعانبايەۆا