جاپونيادا جاڭا وقۋ جىلى ساۋىردە باستالادى

استانا. KAZINFORM -جاڭا وقۋ جىلى بىزدىكىندەي 1-قىركۇيەكتە باستالمايتىن ەلدەر كوپ ەكەن. بۇل جىل مەزگىلدەرىنىڭ ەرەكشەلىگىمەن بايلانىستى، دەپ حابارلايدى 24kz.

مىسالى اۆستراليالىق وقۋشىلار كۇزدەن ەمەس، قىستان باستاپ وقيدى. ال جاپوندىق بالالار ساۋىردە جاڭا وقۋ جىلىنا كىرىسەدى. الداعى توپتاماعا نازار اۋدارايىق.

جاپوندىقتار ءۇشىن كوكتەم جاڭا ءومىردىڭ باستاۋى سانالادى. جىلدىڭ بۇل مەزگىلىندە ساكۋرا گۇلدەيدى، قارجى جىلى باستالادى. ال ساۋىردە بالالار جاڭا وقۋ جىلىنا كىرىسەدى. ول 3 كەزەڭگە بولىنگەن. العاشقىسى شىلدەگە دەيىن جالعاسىپ، بالالار جازعى دەمالىسقا كەتەدى. سوسىن قىركۇيەكتە باستالاتىن ەكىنشى سەمەستر جەلتوقساننىڭ سوڭىندا اياقتالادى دا، سوڭعى كەزەڭ قاڭتاردان ناۋرىزعا دەيىن سوزىلادى. مۇندا قىسقى جانە كوكتەمگى دەمالىس قىسقا. جازعىسىنىڭ ءوزى ءبىر ايدان استام ۋاقىتقا عانا جالعاسادى.

جاپونيادا مۇعالىمنىڭ مارتەبەسى جوعارى. ءبىراق جۇمىسى دا قاۋىرت. اپتاسىنا 50 ساعاتتان استام ۋاقىت ەڭبەك ەتەدى. بۇل - الەمدەگى ەڭ جوعارى كورسەتكىشتىڭ ءبىرى. جەرگىلىكتى مەكتەپتەردە وقۋشىلاردىڭ ءتارتىبى مەن سىرتقى كەلبەتىنە قاتىستى دا تالاپ قاتاڭ. مۇندا بالانى ەڭبەككە باۋلۋ تاربيەنىڭ ماڭىزدى بولىگى سانالادى. سوندىقتان وقۋشىلار سىنىپتاردى وزدەرى جيناپ، وزدەرى جۋادى.

وڭتۇستىك كورەيادا وقۋ جىلى 2 سەمەستردەن تۇرادى

ال، وڭتۇستىك كورەيادا جاڭا وقۋ جىلى ناۋرىزدا باستالادى. ول ەكى سەمەستردەن تۇرادى. ەلدىڭ ءبىلىم بەرۋ جۇيەسى ۇزدىكتەردىڭ قاتارىنا كىرەدى. بالالار ءتىپتى دەمالىستىڭ وزىندە قوسىمشا ساباقتارعا قاتىسادى. ولار جازدا بولاشاق ماماندىعىمەن بايلانىستى لاگەرلەرگە بارادى. سونىمەن قوسا، وڭتۇستىك كورەيادا «حاگۆون» دەگەن تۇسىنىك كەڭىنەن تاراعان. ول مەكتەپتەن كەيىنگى اقىلى دايىندىق مەكتەبى دەگەندى بىلدىرەدى. مۇندا رەپەتيتوردىڭ قىزمەتىنە جۇگىنەتىندەر كوپ.

مەملەكەت ءبىلىم بەرۋ جۇيەسىندە ءتۇرلى تەحنولوگيالاردى ەنگىزۋگە تىرىسادى. ءسويتىپ، كەلەر جىلدان باستاپ مەكتەپتەردە جاساندى ينتتەللەكت نەگىزىندەگى سيفرلىق وقۋلىقتار پايدا بولادى. ولار بالانىڭ وقۋ قابىلەتىن باعالاپ، مازمۇنىن ءار وقۋشىنىڭ مۇمكىندىگىنە قاراي بەيىمدەپ وتىرادى. تەحنولوگيا روبوتپەن جۇمىس ىستەيتىن ەلەكتروندى تاقتالارمەن جابدىقتالعان. نەيروجۇيە بالالاردىڭ سۇراقتارىنا جاۋاپ بەرىپ، ءتۇرلى تاپسىرمالاردى ورىنداي الادى.

اۆستراليادا بالانىڭ ءبىلىمىن باعالاۋ جۇيەسى وزگەشە

اۆستراليادا وقۋ جىلى قاڭتاردىڭ سوڭىندا نە اقپاننىڭ باسىندا باستالىپ، جەلتوقساننىڭ سوڭىندا اياقتالادى. ويتكەنى ماۋسىم، شىلدە مەن تامىز اۆستراليالىقتار ءۇشىن قىس ايلارى سانالادى. ال جاز كەرىسىنشە، جەلتوقساننان اقپانعا دەيىن جالعاسادى.

اۆستراليانىڭ ءبىلىم بەرۋ جۇيەسى ۇزدىكتەردىڭ قاتارىنا كىرەدى. جەرگىلىكتى مەكتەپتەردە ساباقتى قىزىعىراق وتكىزۋ ءۇشىن جاڭا ادىستەمەلەر قولدانىلادى. سوسىن مۇندا وقۋشىلاردىڭ ءبىلىمىن باعالاۋ جۇيەسى باسقالاردىكىنەن وزگەشەلەۋ. ءبىر دەگەن ماكسيمال بال، 5 كەرىسىنشە، ەڭ ناشار باعا دەگەندى بىلدىرەدى.