جاپونيا پرەمەر-ءمينيسترى قازاقستانعا كەلمەيتىن بولدى
استانا. KAZINFORM - جاپونيا پرەمەر-ءمينيسترى فۋميو كيشيدا جۇماعا جوسپارلانعان قازاقستان، وزبەكستان جانە موڭعولياعا ءتورت كۇندىك ساپارىن توقتاتۋ مۇمكىندىگىن قاراستىرىپ جاتىر، دەپ جازادى Kyodo News.
بۇل شەشىم جاپونيانىڭ مەتەورولوگيالىق اگەنتتىگى نانكاي ايماعىندا جەر سىلكىنىسى بولۋى مۇمكىن ەكەنىن ەسكەرتكەننەن كەيىن قابىلدانعان. جاپونيانىڭ مەتەورولوگيالىق اگەنتتىگى بەيسەنبى كۇنى ەلدىڭ وڭتۇستىك- باتىسىندا بولعان 7,1 بالدىق جەر سىلكىنىسىنەن كەيىن بىرنەشە ساعات وتكەن سوڭ العاش رەت ەسكەرتۋ جاسادى.
اگەنتتىك مالىمەتىنشە، تىنىق مۇحيتىنىڭ وڭتۇستىك- باتىسىنان ورتالىق جاپونياعا دەيىنگى اۋماقتاردى قامتيتىن ۇلكەن جەر سىلكىنىسى قاۋپى ارتقان. ازىرگە زارداپ شەككەندەر تۋرالى اقپارات جوق. ءبىراق ايماقتا قوزعالىس شەكتەلدى. توكيو حالىقارالىق اۋەجايىندا رەيستەر كەيىنگە شەگەرىلىپ، 13 مىڭ جولاۋشى ساپارىنان قالدى. عالىمدار نانكاي ايماعىنا 8-9 بالدىق ءزىلزالا قاۋپى تونگەنىن ەسكەرتتى. جەر سىلكىنىسىنەن جاپونيانىڭ شىعىس جاعالاۋىنا بيىكتىگى 30 مەتردەن اساتىن سۋنامي تۇسەدى دەگەن بولجام بار.
بۇعان دەيىن مەملەكەت باسشىسى قاسىم-جومارت توقايەۆتىڭ شاقىرۋىمەن جاپونيا پرەمەر- ءمينيسترى فۋميو كيشيدا 9-10-تامىزدا قازاقستانعا رەسمي ساپارمەن كەلەتىنى حابارلانعان بولاتىن. سونىمەن بىرگە مارتەبەلى مەيمان استانادا وتەتىن «ورتالىق ازيا + جاپونيا» سامميتىنە قاتىسۋى كەرەك ەدى. جاپونياداعى توتەنشە جاعدايعا بايلانىستى كەلەلى كەڭەسكە پرەمەر-مينيستر ونلاين رەجيمدە قوسىلۋى مۇمكىن.
