جاپونيا مەن ا ق ش اراسىنداعى تاريفتىك كەلىسسوزدەردە ىلگەرىلەۋ جوق - سيگەرۋ يسيبا
استانا. KAZINFORM - جاپونيا پرەمەر-ءمينيسترى سيگەرۋ يسيبا سەيسەنبى كۇنى كانادادا وتكەن G7 سامميتى اياسىندا ا ق ش پرەزيدەنتى دونالد ترامپپەن تاريف ماسەلەسى بويىنشا جۇرگىزىلگەن كەلىسسوزدەر بارىسىندا ىلگەرىلەۋگە قول جەتكىزىلمەگەنىن مالىمدەدى، دەپ جازادى شينحۋا.
«نيككەي» ىسكەرلىك گازەتىنىڭ مالىمەتىنشە، كەزدەسۋدەن كەيىن ۇكىمەت باسشىسى جۋرناليستەرگە ەكى ەل اراسىندا بۇل ماسەلەگە قاتىستى كوزقاراس ايىرماشىلىقتارى ءالى دە بار ەكەنىن جانە جان-جاقتى كەلىسىمگە قول جەتكىزىلمەگەنىن ايتتى.
ول جاپونيا مەن ا ق ش كەلىسسوزدەر بارىسىندا ايتارلىقتاي كۇش جۇمساعانىن جانە مينيسترلەرگە ديالوگتى جالعاستىرۋدى تاپسىرعانىن اتاپ ءوتتى. الايدا سيگەرۋ يسيبا كەلىسىمگە قاشان قول جەتكىزىلەتىنى تۋرالى ناقتى اقپارات بەرۋدەن باس تارتتى.
قازىرگى ۋاقىتتا جاپونيا ا ق ش تاراپىنان اۆتوموبيلدەر مەن ولاردىڭ قوسالقى بولشەكتەرىنە 25 پايىزدىق، ال بولات پەن اليۋمينييگە 50 پايىزدىق تاريفكە تاپ بولىپ وتىر. بۇعان دەيىن مينيسترلەر دەڭگەيىندە وتكەن كەلىسسوزدەر دە ايتارلىقتاي ناتيجە بەرگەن جوق.
ەسكە سالساق، ءساۋىر ايىندا پرەزيدەنت دونالد ترامپ ا ق ش-تىڭ بارلىق ساۋدا سەرىكتەستەرى ءۇشىن %10 تاريفتى جانە ءوزىنىڭ «امەريكا ءبىرىنشى كەزەكتە» اتتى باعدارلاماسى اياسىندا وزگە ونداعان مەملەكەتكە بارلىق سالانى قامتيتىن جوعارى باج سالىعىن ەنگىزۋدى قاراستىراتىن پاكەتىن ۇسىندى. ءتىزىمدى ا ق ش تاۋارلارىنا 67 پايىز ستاۆكا قويعان قىتاي باستاپ تۇر. بۇل ەلگە تاريف 34 پايىز بولدى. سونداي-اق تىزىمدە تايلاند، تايۆان، يندونەزيا، شۆەيتساريا، وڭتۇستىك افريكا، ءۇندىستان، وڭتۇستىك كورەيا، مالايزيا، ە و جانە باسقا ەلدەر بار.
