جاپونيا شەتەلدىكتەرگە قاتىستى ماسەلەلەردى شەشۋ ءۇشىن ارنايى ورگان قۇردى
استانا. KAZINFORM - جاپونيا ۇكىمەتى جەرگىلىكتى تۇرعىندار مەن شەتەلدىكتەردىڭ ۇيلەسىمدى ءومىر ءسۇرۋىن قامتاماسىز ەتۋ ءۇشىن جاڭا كەڭسە قۇردى، دەپ حابارلايدى NHK World-Japan.
اتالعان كەڭسە مينيسترلەر كابينەتى حاتشىلىعىنىڭ قۇرامىنا كىرەدى جانە ونىڭ قۇرامىندا كابينەت، ادىلەت مينيسترلىگى مەن باسقا دا ۆەدومستۆولاردىڭ وكىلدەرى بار. كەڭسەنىڭ رەسمي اشىلۋ سالتاناتى سەيسەنبى كۇنى پرەمەر-مينيستر كەڭسەسىندە ءوتتى.
پرەمەر-مينيستر سيگەرۋ يسيبا جاپونيانىڭ تۋۋ كورسەتكىشىنىڭ تومەندەۋىمەن، حالىقتىڭ قارتايۋى مەن سانىنىڭ ازايۋىمەن بەتپە-بەت كەلىپ وتىرعانىن ايتتى. سوندىقتان دا ول شەتەلدىك ەڭبەك ميگرانتتارىن تارتۋ مەن تۋريستەردىڭ ەل ىشىندەگى شىعىنىن ارتتىرۋ ارقىلى سىرتقى رەسۋرستاردى ءتيىمدى يگەرۋ قاجەت ەكەنىن جەتكىزدى.
سونداي-اق يسيبا كەيبىر شەتەلدىكتەردىڭ قىلمىستىق ارەكەتتەرى، تارتىپكە ساي ەمەس مىنەز-قۇلقى مەن جۇيەلەردى تەرىس پايدالانۋى جاپون قوعامىندا الاڭداۋشىلىق پەن ادىلەتسىزدىك سەزىمىن تۋدىرىپ وتىرعانىن ايتتى.
ونىڭ ايتۋىنشا، ۇكىمەتتىڭ ماڭىزدى مىندەتى - ەرەجەلەردى ساقتامايتىندارعا قاتاڭ شارالار قولدانۋ جانە قازىرگى جاعدايعا سايكەس كەلمەيتىن جۇيەلەر مەن شارالاردى قايتا قاراۋ.
پرەمەر جاڭا كەڭسە قىزمەتكەرلەرىنە شەتەلدىكتەردىڭ الاڭ تۋدىرعان ارەكەتتەرىن زەردەلەۋدى جانە ءتۇرلى جۇيەلەردى قايتا قاراۋدى تاپسىردى.
ايتا كەتەيىك، 2024-جىلى جاپونيادا تۋعان بالالاردىڭ سانى وتكەن جىلمەن سالىستىرعاندا 5,7 پايىزعا تومەندەپ، 686061 بالانى قۇرادى.
بۇعان دەيىن جاپونيادا 60 جاستان اسقان اجەلەردى «جالعا الۋ» قىزمەتى تانىمال بولىپ كەلە جاتقانىن جازعان ەدىك.
