20:06, 02 - مامىر 2025 | GMT +5
جاپونيا ا ق ش- قا قىسىم كورسەتۋگە دايار
استانا. قازاقپارات – ا ق ش مەملەكەتتىك قارىزىنىڭ ۇلكەن بولىگى جاپونياعا تيەسىلى. توكيو مۇنى اق ءۇي اكىمشىلىگىمەن باج سالىعى بويىنشا كەلىسسوزدە قىسىم تەتىگى رەتىندە قولدانۋعا دايار.
بۇل تۋرالى ەلدىڭ قارجى ءمينيسترى كاتسۋنوبۋ كاتو جەرگىلىكتى تەلەارنالاردىڭ بىرىنە بەرگەن سۇحباتى بارىسىندا مالىمدەدى. ونىڭ ايتۋىنشا، امەريكانىڭ جاپونياعا قارىزى 1 تريلليون دوللاردان اسادى. توكيو وسى سومادا قۇراما شتاتتارى ۇكىمەتىنىڭ قۇندى قاعازدارىنا يەلىك ەتەدى. وتكەن ايدا دونالد ترامپ الەمنىڭ 185 ەلىنە باج سالىعىن كوتەردى. ىزىنشە نارىقتا ا ق ش- تىڭ مەملەكەتتىك وبليگاتسيالارى جاپپاي ساتىلدى. سول كەزدە ساراپشىلار: «مۇنىڭ ارتىندا توكيو تۇر»، - دەگەن بولجام ايتتى.
