جاپوندىق ايەل الەمدەگى ەڭ قارت ادام اتاندى

استانا. KAZINFORM - جاپونيانىڭ اسيا قالاسىنىڭ تۇرعىنى، 116 جاستاعى توميكو يتوكا الەمدەگى ەڭ قارت ادام اتاندى، دەپ حابارلايدى گيننەستىڭ رەكوردتار كىتابىنىڭ سايتى.

توميكو يتوكا يسپانيالىق 117 جاستاعى ماريا برانياس قايتىس بولعاننان كەيىن الەمدەگى ەڭ قارت ادام اتاندى.

توميكو ەلدىڭ حيوگو پرەفەكتۋراسىنا قاراستى اسيا قالاسىنداعى قارتتار ۇيىندە تۇرادى.

ءۇش اي بۇرىن توميكو ءوزىنىڭ 116 جاسىن تويلاپ، قالا مەرىنەن گۇل شوقتارى مەن تورت (وزىنە ۇناماعانىن مويىندادى) جانە قۇتتىقتاۋ قاعازىن الدى. قىزمەتكەرلەر ەستۋ قابىلەتىنىڭ بۇزىلۋىنا قاراماستان، ول انىق سويلەيتىنىن جانە ولارعا ۇنەمى العىس بىلدىرەتىنىن اتاپ ءوتتى.

20 جاسىندا تۇرمىسقا شىعىپ، ءتورت بالاسىن (ەكى قىز، ەكى ۇل) دۇنيەگە اكەلدى. نەمەرە، شوبەرەلەرى كوپ.

ەسكە سالا كەتسەك، 2023-جىلدىڭ جەلتوقسانىندا توميكو يتوكا 116 جاستاعى فۋسا تاتسۋمي قايتىس بولعاننان كەيىن جاپونياداعى ەڭ قارت ادام اتاندى.