جاپون حانشايىمى ايكو قىزىل كرەست ۇيىمىنداعى قىزمەتىنە كىرىستى

استانا. KAZINFORM - دۇيسەنبى كۇنى يمپەراتور نارۋحيتو مەن يمپەراتريتسا ماساكونىڭ جالعىز قىزى - جاپون حانشايىمى ايكو جاپونيانىڭ قىزىل كرەست ۇيىمىنداعى قىزمەتىنە كىرىستى، دەپ حابارلادى Kyodo News.

حانشايىم «ءوزى قىزىعۋشىلىق تانىتقان» ۇيىمعا قىزمەتكە ورنالاسۋعا نيەت ءبىلدىردى. ول ەرىكتىلەردى دايىندايتىن بولىمدە جۇمىس ىستەيدى. سونىمەن بىرگە يمپەراتور وتباسىنىڭ مۇشەسى رەتىندەگى رەسمي مىندەتتەرىن ورىنداۋدى جالعاستىرادى، دەپ حابارلادى يمپەراتور سارايى باسقارماسى.

«قوعامنىڭ جۇمىس ىستەيتىن مۇشەسى رەتىندە العاشقى قادامىمدى باستاعانىما قۋانىشتىمىن ءارى قوبالجىپ تا تۇرمىن»، - دەدى ول توكيوداعى قىزىل كرەست شتاب-پاتەرىندە جۋرناليستەرگە بەرگەن سۇحباتىندا.

حانشايىم دۇيسەنبىدەن باستاپ جۇمىسقا كىرىسكەن سەگىز جاڭا قىزمەتكەردىڭ ءبىرى. ول وتكەن ايدا گاكۋشيۋين ۋنيۆەرسيتەتىن ءبىتىردى، وندا جاپون ادەبيەتىن وقىدى.

«جۇمىسشى رەتىندەگى قوعامدىق ءومىرىم ەندى باستالىپ جاتسا دا، مەن جۇمىس ورتاسىنا تەز بەيىمدەلىپ، پايدالى بولۋعا تىرىسامىن»، - دەدى ول.

سول كۇنى يمپەراتور وتباسى Instagram-دا رەسمي اككاۋنت اشىپ، الەۋمەتتىك جەلىدە دەبيۋت جاسادى. بۇل قادام وتكەن جىلدىڭ ءساۋىر ايىندا باسقارما وتباسى تۋرالى اقپاراتتى حالىققا قالاي جاقسىراق اشۋ كەرەكتىگىن قاراستىرۋ ءۇشىن قوعاممەن بايلانىس ءبولىمىن قۇرعاننان كەيىن جاسالدى.

باسقارما وتباسى تۋرالى جاڭالىقتاردى بەلسەندى ۇسىنۋ كەيبىر سىنعا قارسى تۇرۋعا كومەكتەسەتىنىن ايتتى.

بۇرىنعى حانشايىم ماكو مەن كەي كومۋرونىڭ 2021 - جىلعى ۇيلەنۋ تويى جەلىدە ۇلكەن سىنعا ۇشىراعان ەدى.

اۆتور
ەركەجان سماعۇلوۆا