جاتتىقتىرۋشىلاردىڭ جالاقىسى رەتتەلمەگەن - تۋريزم ءمينيسترى

استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ «ۋادە» باعدارلاماسىنا بەرگەن سۇحباتىندا وليمپيادالار كەزىندە جىبەرىلگەن قاتەلىكتەردى اتاپ ءوتتى.

ونىڭ ىشىندە جاتتىقتىرۋشىلاردىڭ نە سەبەپتى وليمپيادالىق ەمەس سپورت تۇرلەرىن تاڭدايتىنىن ءتۇسىندىردى.

«جەرگىلىكتى مەنەدجەرلەر باسىم سپورت تۇرلەرىندە دۇرىس ينديكاتور قويماعان. ءبىرىنشى نازارعا وليمپيادا ما، ازيا ويىندارى ما، وليمپيادالىق ەمەس سپورت تۇرلەرى مە، ۇلتتىق سپورت تۇرلەرى مە، دەگەن فورماتتى قاراماعان. مىسالى، وليمپيادالىق ەمەس سپورت تۇرلەرى جاتتىقتىرۋشىلارىنىڭ جالاقىسى وليمپيادالىق سپورت تۇرلەرىنىڭ جاتتىقتىرۋشىلارىنىڭ جالاقىسىمەن بىردەي بولىپ كەتكەن»، - دەدى مينيستر.

سول سەبەپتى بۇگىن وليمپيادالىق سپورت تۇرلەرىنەن جاتتىقتىرۋشىلار اراسىندا باسەكەلەستىك تومەن ەكەنىن اتاپ ءوتتى.

«مىسالى وليمپيادالىق سپورت تۇرىندە 200 گە جۋىق مەملەكەتپەن تالاساسىز، ال وليمپيادالىق ەمەس سپورت تۇرىندە 10-15 مەملەكەتپەن تالاساسىز. قاي جەردە ناتيجە كورسەتۋ وڭاي؟ سونىمەن قاتار، وليمپيادالىق ەمەس سپورت تۇرىنەن جىلىنا ەكى رەت الەم چەمپيوناتى ءوتۋى مۇمكىن. سايكەسىنشە ولاردان بارىپ مەدالدى كوبىرەك جيناپ، پايىزدىق دەڭگەيگە كەلگەندە جاقسى كورسەتكىش كورسەتەدى. ناتيجەسىندە وليمپيادالىق ەمەس سپورت ءتۇرىنىڭ جاتتىقتىرۋشىسى 10 ەسە نەمەسە 15 ەسە ارتىق جالاقى الادى. سوندىقتان كوپ جاتتىقتىرۋشىلار وليمپيادالىق ەمەس سپورت تۇرلەرىنە اكسەنت قويعان. بۇل جاعداي جىلدار وتە كوبەيە بەرگەن»، - دەدى ەربول مىرزابوسىنوۆ.