«جاسىل ەل» باعدارلاماسى: 14 جاستان اسقان استانالىقتار جۇمىس ىستەي الادى

استانا. KAZINFORM - استانادا 14 جاسقا تولعان بالالار دا رەسمي جۇمىس ىستەي الادى. بۇل تۋرالى «جاسىل ەل» جوبا جەتەكشىسىنىڭ ورىنباسارى Kazinform تىلشىسىنە بەرگەن سۇحباتىندا مالىمدەدى.

- «جاسىل ەل» جوباسى ەلدىڭ بارلىق وڭىرىندە جۇمىس ىستەيدى. جۇمىس ورىندارىنىڭ سانىن ءار اۋماقتىڭ اكىمدىگى بەلگىلەيدى. ولاردىڭ ەڭ ىرىلەرىنىڭ ءبىرى - استانا قالاسى. بيىل مۇندا 5200 دەن استام جاستى جۇمىسپەن قامتۋ ءۇشىن بوس ورىندار بەرىلدى. قازىرگى ۋاقىتتا 3 مىڭنان استام جاستار جۇمىس ىستەپ جاتىر. جازعى ماۋسىم جۇمىستارى مامىر ايىنان باستالىپ، تامىزدىڭ سوڭىنا دەيىن جالعاسادى. ەلورداداعى «جاسىل ەل» باعدارلاماسىنىڭ ەڭ باستى ەرەكشەلىگى - ءبىز جۇمىسقا 14 جاستان باستاپ 35 جاسقا دەيىنگى جاستاردى قابىلدايمىز. قازىر 3 مىڭنان استام «جاسىل ەل» ساربازدارىنىڭ 90 پايىزدان استامى - 14 جاستان ەندى اسقان بالالار. وسىلايشا جاستارىمىزدىڭ ساناسىندا ەكومادەنيەتتى قالىپتاستىرۋدى ماقسات ەتىپ وتىرمىز، - دەيدى اسىلبەك باقىتبەك ۇلى.

مامان 14 جاسقا تولعان بالالاردىڭ جۇمىسقا ورنالاسۋ ءۇشىن نە ىستەۋ كەرەگىن ءتۇسىندىردى.

- 16 جاسقا تولماعان جاستار قازاقستان رەسپۋبليكاسىنىڭ زاڭناماسىنا سايكەس 4 ساعاتتان ارتىق جۇمىس ىستەمەيدى. ولارعا جەڭىل جۇمىس بەرىلەدى. 16 دان اسقان جاستار اتا- اناسىنسىز كەلىپ، ءوتىنىش تولتىرا الادى. ال ودان كىشىلەرى مىندەتتى تۇردە اتا- اناسىمەن كەلۋى كەرەك. ولار تۋۋ تۋرالى كۋالىك، اتا- انالارىنىڭ قۇجاتتارى جانە سەنىمحاتىن الىپ كەلۋى قاجەت. سونىمەن قاتار الەۋمەتتىك وسال توپقا جاتاتىن بولسا، ونى دالەلدەيتىن انىقتامانى دا بىرگە الىپ كەلۋ كەرەك، - دەيدى «جاسىل ەل» جوبا جەتەكشىسىنىڭ ورىنباسارى.

«جاسىل ەل» جوباسى بويىنشا جۇمىس ىستەيتىن جاستار جالاقىدان بولەك ءتۇرلى مەرەكەلىك ءىس- شارالارعا تەگىن كىرە الادى ەكەن.

- قازىر وقۋشىلارىمىز قالا بويىنشا جۇمىس ىستەپ جاتىر. وزدەرى ءبىلىم الاتىن وقۋ ورىندارى مەن قالاداعى ساياباقتارداعى اعاشتارعا سۋ قۇيۋ، كوشەتتەرگە كۇتىم جاساۋ سياقتى جۇمىستارمەن اينالىسادى. ودان بولەك، جۇمىس كۇندەرى رەسپۋبليكا بويىنشا ءجۇرىپ جاتقان «تازا قازاقستان» اكسياسىنا دا اتسالىسىپ، بەلسەندىلىك تانىتادى. ءار شاراعا جۇزدەن استام «جاسىل ەل» ساربازىن شىعارىپ وتىرامىز. ولار پاركتەردە جۇمىسىن اياقتاعان سوڭ پيكنيكتەر ۇيىمداستىرىپ، الەۋمەتتىك جەلىگە ۆيدەولار تۇسىرەدى. ءبىز ەكوبەلسەندى جاستاردى تەك جۇمىسقا باۋلىپ قانا قويماي، ەلوردادا بولاتىن مەرەكەلىك ءىس- شارالارعا قاتىستىرۋعا تىرىسامىز. ءول ۇشىن بىزگە اكىمشىلىكتەن ارنايى بيلەتتەر بەرىلىپ وتىرادى، - دەيدى مامان.

«جاسىل ەل» جوباسىندا جۇمىس ىستەيتىن بالالاردىڭ جالاقىسى تىكەلەي ءوز شوتتارىنا تۇسەدى. باعدارلاما بۇل ءۇشىن دە تيىمدى جاعداي جاساعان.

- 14 جاستاعى بالالارعا جالاقى بەرۋ ءۇشىن قازاقستان رەسپۋبليكاسىندا ءبىر عانا بانك جۇمىس ىستەيدى. ءبىز سول بانكپەن كەلىسىپ، جۇمىسقا كەلگەن بالالارعا جەكە ەسەپشوت اشامىز. جالاقى جۇمىس ىستەگەن وقۋشىنىڭ شوتىنا تىكەلەي تۇسەدى. سونىمەن قاتار الەۋمەتتىك وسال توپتاعى بالالارعا باسىمدىق بەرەمىز. ولاردىڭ اتا- اناسى مەملەكەتتەن كومەك الادى. ەگەر وسى بالالار جۇمىس ىستەپ، ول اقشا اتا- انالاردىڭ ەسەپشوتىنا تۇسسە، مەملەكەتتەن قوسىمشا قاراستىرىلعان كومەكتى الا الماي قالادى. وسى ماسەلەنى بولدىرماۋ ماقساتىندا ءبىز 14 جاسقا تولعان بالالارعا جەكە ەسەپشوت اشىپ، جالاقىنى سوندا اۋدارۋدى ءجون كوردىك، - دەيدى اسىلبەك باقىتبەك ۇلى.

14 جاستان اسقان وقۋشىلار 1 اي قىزمەت ەتكەنى ءۇشىن 65 مىڭ تەڭگە جالاقى الادى. ال كامەلەت جاسقا تولىپ، ارنايى مەكەمەدە جۇمىس ىستەيتىن جاستاردىڭ جالاقىسى 200 مىڭ تەڭگەدەن اسادى.

- استانا قالاسى بويىنشا بىزبەن قۇرىلىس كومپانيالارى تىعىز جۇمىس ىستەيدى. ولار بىزدەن ءار ماۋسىمدا 100 دەن اسا جاستى جۇمىسقا قابىلدايدى. جاستار وندا كومەكشى جۇمىستارمەن اينالىسادى. ءول ۇشىن 160- 180 مىڭ تەڭگە جالاقى الادى. ودان بولەك، ءبىز تاعى 65 مىڭ تەڭگە ىنتالاندىرۋ سىياقىسىن بەرىپ، ارنايى فورمامەن قامتاماسىز ەتەمىز. بىزدە ىنتالاندىرۋ سىياقىسى - 1 ايعا 65 مىڭ تەڭگە، - دەيدى «جاسىل ەل» جوبا جەتەكشىسىنىڭ ورىنباسارى.

الايدا اسىلبەك باقىتبەك ۇلى «جاسىل ەل» باعدارلاماسى بويىنشا وقۋشىلارمەن كەلىسىمشارت تەك 1 ايعا جاسالاتىنىن ايتادى.

- ءبىز كوپتەگەن جاستارىمىزدى ەكوبەلسەندىلىككە باۋلۋ ءۇشىن ءار وقۋشىنى 1 ايعا عانا جۇمىسقا قابىلدايمىز. جۇمىسقا سۇرانىس وتە جوعارى. بىزگە جۇمىسقا تۇرۋ ماسەلەسى بويىنشا تىنىمسىز حاتتار كەلەدى. كەڭسەمىزگە كۇندە كەلەتىن اتا- انالاردىڭ دا سانى كوپ. بىزدە    5200 دەن استام بوس ورىن بولسا، وعان 30 مىڭنان استام سۇرانىس بار. سەبەبى استانادا 14 جاستان اسقان وقۋشىلار دا، ستۋدەنتتەر مەن جاستار دا وتە كوپ، - دەيدى ول.

ال «جاسىل ەل» جوباسىنىڭ قاتىسۋشىسى ءوزىنىڭ جۇمىس ىستەۋىنە اتا-اناسى قارسى بولماعانىن ايتادى. ونىڭ ايتۋىنشا، ءوز قاتارلاستارىمەن جۇمىس ىستەۋ قىزىقتى ەكەن.

- مەنىڭ اپكەم وتكەن جىلى وسى «جاسىل ەل» جوباسىندا جۇمىس ىستەدى. اپكەمە قاراپ قىزىعىپ، مەن دە جۇمىس ىستەگىم كەلدى. ءبىراق ول جەرگە 14 جاستان باستاپ الاتىن بولعاندىقتان، ءوزىمنىڭ 14 جاسقا تولعانىمدى كۇتىپ، بيىل Instagram جەلىسىندەگى پاراقشاسىنا جازدىم. ولار ماعان قاجەتتى قۇجاتتاردى جيناپ، كەلە بەرسەڭ بولادى دەدى. بارعان سوڭ مەنى جۇمىسقا قابىلداپ، ماۋسىم ايىنىڭ 2 سىنەن باستاپ جۇمىسقا كىرىسىپ كەتتىم. اتا-انام مەنى قولداپ، «وزىڭە ۇناسا، جۇمىس ىستەي بەر» دەدى. ءبىزدىڭ جۇمىس توبىمىز ەكىگە بولىنەدى. سولاي ەكى ساياباقتىڭ تازالىق جۇمىستارىمەن اينالىسامىز. ءبىر توپتا 100 شاقتى ادام بار. ولاردى ەكى جەتەكشى باقىلايدى. قازىر ءبىز ورتالىق ساياباقتا ارام شوپتەردى جۇلىپ، گۇلدەرگە، اعاشتارعا سۋ قۇيىپ، ادامدار تاستاپ كەتكەن قوقىستاردى جيناۋمەن اينالىسىپ جاتىرمىز، - دەيدى نۇراي دۇيسەنعالييەۆا.

ايتا كەتەيىك، وتكەن ايدا 5 مىڭنان اسا استانالىق جاس ەڭبەك ماۋسىمىن باستاعان ەدى.