جاسوسپىرىمدەردىڭ 10-12 پايىزى بەيتانىس اداممەن كەزدەسۋگە بارعان - زەرتتەۋ

استانا. KAZINFORM - ەلىمىزدە بالالار مەن جاسوسپىرىمدەر اراسىندا لگبت ناسيحاتىنا قاتىستى زەرتتەۋ مەن ساۋالناما جۇرگىزىلدى.

ونىڭ ناتيجەسىمەن وقۋ- اعارتۋ مينيسترلىگى بالالاردىڭ قۇقىعىن قورعاۋ كوميتەتىنىڭ ءتوراعاسى ناسىمجان وسپانوۆا ءبولىستى.

— بالالاردىڭ 4,2 پايىزى ەرەسەكتەرمەن ءبىر نەمەسە ەكى رەت سويلەسكەنىن ايتقان، ياعني مۇلدە تانىمايتىن ادامدارمەن سويلەسكەن. ءاربىر ونىنشى بالا ينتەرنەتتە ءوزىن جانە قاتارلاستارىن مازالايتىن، الاڭداتاتىن نارسە بار ەكەنىمەن تولىق كەلىسەدى. بالالاردىڭ 11,1 پايىزى فوتوسىن نەمەسە ۆيدەوسىن تانىمايتىن ادامعا جىبەرگەن. سونىمەن قاتار بالالاردىڭ تورتتەن ءبىرى جاعىمسىز تاجىريبەسى تۋرالى ەشكىمگە ايتپاعان، - دەدى ناسىمجان وسپانوۆا.

كوميتەت باسشىسىنىڭ مالىمدەۋىنشە، ەر بالالاردىڭ 12 پايىزى، ال قىزداردىڭ 10 پايىزى ينتەرنەتتە تانىسقان بەيتانىس اداممەن كەزدەسۋگە بارعانىن مويىنداعان.

— زەرتتەۋ ناتيجەسى بالالاردىڭ ايتارلىقتاي قاۋىپ-قاتەرگە ۇشىراۋ دەڭگەيىندە ەكەنىن كورسەتىپ وتىر. بالانىڭ تولىق قالىپتاسىپ ۇلگەرمەگەن ءالسىز پسيحيكاسى اقپاراتتىق شابۋىلعا توتەپ بەرە المايدى، - دەيدى ول.

ايتا كەتەيىك، بۇگىن ەلوردادا لگبت ناسيحاتتىڭ بالالار مەن جاسوسپىرىمدەرگە اسەرىن زەرتتەۋ ناتيجەسى تالقىلاندى. اتالعان شاراعا ساراپشىلار، عالىمدار، مەملەكەتتىك ورگاندار وكىلدەرى، دەپۋتاتتار مەن قوعامدىق ۇيىمدار وكىلدەرى قاتىستى.

بۇعان دەيىن قازاقستاندا لگبت ناسيحاتقا قىلمىستىق جاۋاپكەرشىلىك ەنگىزۋ ۇسىنىسى تۋرالى جازعان ەدىك.

سونداي- اق ءماجىلىس دەپۋتاتى ەدىل جاڭبىرشين لگبت ناسيحاتتىڭ 73 پايىزى الەۋمەتتىك جەلىدەن تاراپ جاتقانىن ايتىپ، دابىل قاقتى.