جاستاردى جات اعىمنان قالاي قورعايمىز - باس ءمۇفتيدىڭ جاۋابى
تاشكەنت. KAZINFORM - وزبەكستاندا «يسلام - بەيبىتشىلىك پەن ىزگىلىك ءدىنى» اتتى ءدىنباسىلاردىڭ حالىقارالىق فورۋمى ءوتىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
اتالعان ءىس-شاراعا 20 دان اسا ەلدەن كەلگەن باس مۇفتيلەر، عالىمدار مەن ۇستازدار قاتىسۋدا. ولار يسلام ءدىنىنىڭ تىنىشتىق پەن ىزگىلىككە ۇندەيتىن قاعيداسىن ناسيحاتتاۋعا قاتىستى وي-پىكىرىن ورتاعا سالىپ، ۇسىنىستار ازىرلەۋگە نيەتتى.
فورۋمعا قازاقستان تاراپىنان قاتىسىپ جاتقان باس ءمۇفتي ناۋرىزباي قاجى تاعان ۇلى يسلام ءدىنى جەرگىلىكتى حالىقتىڭ سالت-داستۇرىمەن بىتە قايناسىپ، سول ارقىلى ادامزاتتى اۋىزبىرشىلىككە شاقىرۋى ءتيىس ەكەنىن اتاپ ءوتتى.
«ءار قاتىسۋشى ءوز بايانداماسىندا يسلامنىڭ بەيبىتسۇيگىش ءدىن ەكەنىن، ونىڭ بىرلىككە شاقىراتىنىن ايتتى. تاياۋدا ءبىز استانا قالاسىندا حالىقارالىق فورۋم ۇيىمداستىردىق. ونىڭ بارىسىندا ءبىز ماڭىزدى قۇجاتتاردى قابىلدادىق. سونىڭ ءبىرى - «يسلام جەرگىلىكتى حالىقتىڭ ءداستۇرىن قولدايدى» دەگەن قۇجات. بۇل - يسلام ءدىنى ءار ەل تۇرعىندارىنىڭ عۇرپىن ساقتاۋدى قۇپتايتىنىن ايعاقتايدى»، - دەدى ناۋرىزباي قاجى تاعان ۇلى Kazinform ءتىلشىسىنىڭ ساۋالىنا جاۋاپ بەرە وتىرىپ.
وسى ورايدا باس ءمۇفتي جاستاردى جات ءدىني اعىمداردان قورعاۋدا نەگىزگە الىنۋى قاجەت قاعيداعا توقتالدى. بۇل باعىتتاعى قاتەرلەردىڭ الدىن الۋ ءۇشىن وسكەلەڭ ۇرپاق اتا-بابا سالعان سارا جولدان اداسپاۋى ءتيىس.
«يسلام ءدىنى حالقىمىزدىڭ سالت-داستۇرىمەن بىرىگىپ كەتتى دەپ ايتۋعا بولادى. سوندىقتان ءقازىر جاستاردى جات اعىمداردىڭ ىقپالىنان ساقتاۋ ءۇشىن اتا-بابامىزدىڭ جولىن بەرىك ۇستانۋ كەرەك. وسىلايشا، ءبىز قاتەردىڭ الدىن الامىز. قازىر اقپاراتتىق تەحنولوگيالار دامىعان زامان. وسىعان بايلانىستى زەرتتەلگەن، انىقتالعان شىنايى اقپاراتقا ەرۋىمىز كەرەك. ءبىزدىڭ اتا-بابامىز الەم مويىنداعان عالىمدار بولعان. تيىسىنشە، سولاردىڭ سارا جولىن ۇستانىپ، سالت-داستۇردەن اجىراماۋ ماڭىزدى»، - دەپ پىكىر ءبىلدىردى باس ءمۇفتي.
ق م د ب ءتوراعاسىنىڭ ايتۋىنشا، فورۋم قورىندىسى بويىنشا جان-جاقتى باعالاۋعا نەگىزدەلگەن تالداۋ جاسالىپ، ناقتى ۇسىنىستار ازىرلەۋ جوسپارلانىپ وتىر.
«ءىس-شاراعا قاتىسىپ جاتقان ءدىنباسىلاردىڭ بايانداماسى مەن ۇسىنىسى نەگىزىندە قورىتىندى جاسالادى. ونىڭ ىشىندە يسلام ءدىنىنىڭ بەيبىتشىلىك پەن تىنىشتىقتى ناسيحاتتايتىن سيپاتىنا ساي، ءتيىستى قۇجاتتار قابىلداۋ جوسپارلانعان»، - دەپ تۇيىندەدى ناۋرىزباي قاجى تاعان ۇلى.
قوسا كەتسەك، تاياۋدا سەنات ءتوراعاسى ماۋلەن اشىمبايەۆ جاس ءدىني كوشباسشىلاردى جالعان اقپاراتپەن بەلسەندى كۇرەسۋگە شاقىردى.
سونداي-اق، ەلوردادا الەمدىك جانە ءداستۇرلى دىندەر كوشباسشىلارى سەزىنىڭ ىزگى نيەت ەلشىلەرى ينستيتۋتى قۇرىلدى.
اۆتور
ءاليحان اسقار
