جاساندى ينتەللەكتىنى قاۋىپسىز قولدانۋ تاقىرىبىندا تەگىن ونلاين كۋرس ىسكە قوسىلادى
استانا. KAZINFORM - بيىل تامىزدا «جاساندى ينتەللەكتىنى قاۋىپسىز جانە ءتيىمدى قولدانۋ» تاقىرىبىنداعى تەگىن ونلاين كۋرس ىسكە قوسىلادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
- وقۋ- اعارتۋ مينيسترلىگى 2025 -جىلدىڭ تامىز ايىندا وقۋشىلار، اتا-انالار جانە مۇعالىمدەر ءۇشىن «جاساندى ينتەللەكتىنى قاۋىپسىز جانە ءتيىمدى قولدانۋ» تاقىرىبىنداعى تەگىن ونلاين كۋرستى ىسكە قوسۋدى جوسپارلاپ وتىر. جوعارى وقۋ ورىندارىندا جاساندى ينتەللەكت باعىتىنداعى جاڭا ءبىلىم بەرۋ باعدارلامالارى ازىرلەنىپ، شەتەلدىك ۋنيۆەرسيتەتتەرمەن بىرلەسكەن جوبالار جۇزەگە اسىرىلىپ جاتىر، - دەدى ولجاس بەكتەنوۆ.
سونىمەن قاتار پرەمەر-مينيستر ۇكىمەت حالىقارالىق تاجىريبەنى ەسكەرە جانە ۇلتتىق ەرەكشەلىكتەر مەن قۇندىلىقتاردى ساقتاي وتىرىپ، ءبىلىم بەرۋ جۇيەسىنە جاساندى ينتەللەكت تەحنولوگيالارىن ءتيىمدى ءارى قاۋىپسىز ەنگىزۋدى جالعاستىراتىنىن ايتادى.
ايتا كەتەيىك، ەلىمىزدە سەگىز سالا بويىنشا ماماندار دايارلاۋ ءۇشىن ج ي قولداناتىن كاسىبي ستاندارت ازىرلەنىپ جاتىر.
سونىمەن قاتار ءبىلىم بەرۋ جۇيەسىنە جاساندى ينتەللەكت قۇرالدارىن ەنگىزۋدىڭ ۇلتتىق ساياساتى ازىرلەنەدى.
