جاساندى ينتەللەكتىنى ەنگىزۋدە كەمشىلىككە جول بەرمەۋ كەرەك - سەناتور
استانا. KAZINFORM - سوت جۇيەسى جانە قۇقىق قورعاۋ ورگاندارى قىزمەتىندە جاساندى ينتەللەكتىنى ەنگىزۋ قانشالىقتى قاۋىپسىز؟ ءتيىمدى مە؟ سول سياقتى سالا ماماندارىنىڭ جۇمىسىن قانشالىقتى جەڭىلدەتەدى؟ وسى جانە وزگە دە ساۋالعا سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى جونىندەگى كوميتەتىنىڭ ءتوراعاسى نۇرلان بەكنازاروۆ جاۋاپ بەردى.
- سۋديالاردىڭ IX سەزىندە مەملەكەت باسشىسى سوت راسىمدەرىن وڭايلاتۋ وتە ماڭىزدى، ال ونىڭ شەشىمىن تابۋ جولدارىنىڭ ىشىندە يننوۆاتسيالىق تەحنولوگيالار مەن جاساندى ينتەللەكتتى ەنگىزۋ ارقىلى مۇمكىن بولاتىنىنا نازار اۋداردى. بۇگىندە جاساندى ينتەللەكتتى ەنگىزۋ قۇقىق قورعاۋ سالاسىندا جانە سوت قىزمەتىنىڭ ساپاسىن ارتتىرۋعا ىقپال ەتەتىنى ءسوزسىز. مىسالى، جاساندى ينتەللەكت كەلەسىدەي سالالاردا قولدانىلۋى مۇمكىن، زاماناۋي جۇيەلەر ۇلكەن كولەمدەگى اقپاراتتى تەز وڭدەۋ جانە تالداۋ ارقىلى زاڭسىزدىقتاردى جىلدام انىقتاي الادى. ينتەللەكتۋالدى بەينەباقىلاۋ جانە بەينەلەردى تانۋ جۇيەلەرى ىزدەۋدە جۇرگەن قىلمىسكەرلەردىڭ ءتۇرىن، كولىك ءنومىرىن جانە كۇدىكتى زاتتاردى تانىپ، انىقتاپ بەرە الادى، - دەدى نۇرلان بەكنازاروۆ سەنات قابىرعاسىندا جاساندى ينتەللەكتىنى قۇقىق قورعاۋ ورگاندارى قىزمەتىندە قولدانۋ تاقىرىبىنا ارنالعان دوڭگەلەك ۇستەلدە.
سونداي-اق سەناتور جاساندى ينتەللەكتىنى سوت شەشىمىن قابىلداۋدا كومەك قۇرالى رەتىندە، ياعني سوت پروتسەسىن اۆتوماتتاندىرۋعا پايدالانۋ جاعىن ايتتى.
- جاساندى ينتەللەكت نەگىزىندەگى باعدارلامالىق كەشەندەر قۇقىق نورمالارىن جانە الدىڭعى سوت شەشىمدەرىن تالداپ، سۋديالارعا ۇقساس ىستەر بويىنشا ۇلگىلەردى تابۋعا كومەكتەسەدى، بۇل سوت تاجىريبەسىنىڭ بىركەلكىلىگىنە ىقپال ەتەدى جانە شەشىم شىعارۋدى تەزدەتەدى. جاساندى ينتەللەكت سوت ءىسىن جۇرگىزۋدىڭ ادەتتەگى ءراسىمدى اۆتوماتتاندىرۋعا مۇمكىندىك بەرەدى، كەلىپ تۇسكەن ىستەردى بولۋدەن جانە تالاپ-ارىزداردى ەلەكتروندىق قابىلداۋدان باستاپ ۇلگىلىك قۇجاتتاردى دايىنداۋعا دەيىن مۇمكىندىك بەرەدى، - دەيدى ول.
ونىڭ ايتۋىنشا، قازىر بارلىق سالادا جاساندى ينتەللەكت ەنگىزىلىپ جاتىر. ءبىراق قاۋىپسىزدىك تەتىكتەرىن ەستەن شىعارماۋ قاجەت.
- دەگەنمەن جاساندى ينتەللەكتتى ەنگىزۋ الدىندا ىقتيمال تاۋەكەلدەردى الدىن الا باعالاپ، ولشەپ ەنگىزۋ قاجەت. سوندىقتان جاساندى ينتەللەكتتى ەنگىزە وتىرىپ، ازاماتتاردىڭ كونستيتۋتسيالىق قۇقىعىنىڭ قاتاڭ ساقتالۋىن، جەكە دەرەكتەردى قورعاۋدى جانە الگوريتمدەردە قانداي دا ءبىر كەمشىلىككە جول بەرمەۋ كەرەك. ءبىز سيفرلىق يننوۆاتسيالاردى ەنگىزۋ قاجەت بولعان جاعدايدا زاڭنامالىق بازانى دا جەتىلدىرەمىز، - دەپ تولىقتىردى سەنات دەپۋتاتى.
قازىر سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى جونىندەگى كوميتەتىندە «جاساندى ينتەللەكت: ونىڭ تەحنولوگيالارىن قۇقىق قورعاۋ جانە سوت قىزمەتىنە ەنگىزۋ جانە قولدانۋ» تاقىرىبىندا دوڭگەلەك ۇستەل ءوتىپ جاتىر. جيىنعا سەنات دەپۋتاتتارى، قۇزىرلى ورگانداردىڭ وكىلدەرى مەن سالا ماماندارى قاتىستى.
جاڭا عانا ءماجىلىس جاساندى ينتەللەكت تۋرالى ءۇش زاڭنىڭ جوباسىن ماقۇلدادى.
