جاساندى ينتەللەكت تۇجىرىمداماسىنىڭ جوباسى جاريالاندى

 استانا. KAZINFORM - «اشىق ن ق ا» پورتالىندا ەلىمىزدە جاساندى ينتەللەكتىنى دامىتۋدىڭ 2024-2029 -جىلدارعا ارنالعان تۇجىرىمداماسىنىڭ جوباسى جاريالاندى.

قۇجاتتى ازىرلەۋشى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى.

تۇجىرىمداما جوباسىنا سايكەس، قازاقستاندا سۋپەركومپيۋتەرلەر 2025 -جىلعا قاراي ىسكە قوسىلادى دەپ كۇتىلۋدە.

سونداي- اق، ۇلتتىق جاساندى ينتەللەكت پلاتفورماسىن قۇرۋ ۇسىنىلادى. ول 90 نان استام مەملەكەتتىك ورگاننىڭ اقپاراتتىق جۇيەلەرىنەن دەرەكتەر جينالعان Smart Data Ukimet بازاسىندا قۇرىلادى. ناتيجەسىندە جاساندى ينتەللەكت تەحنولوگيالارىن پايدالانا وتىرىپ ۇسىنىلاتىن مەملەكەتتىك قىزمەتتەر ۇلەسىنىڭ 2029 -جىلعا قاراي %20 عا ءوسۋى بولجانادى. 2029 -جىلعا قاراي جاساندى ينتەللەكت پلاتفورماسىندا جاسالعان كەم دەگەندە 25 جاساندى ينتەللەكت شەشىمى بولۋى كەرەك.

سونىمەن قاتار، جاساندى ينتەللەكت بويىنشا سەرتيفيكات بەرەتىن وقىتۋ كۋرسىن ازىرلەۋ جانە ول اشىق ءارى قولجەتىمدى بولماق. 2029 -جىلعا قاراي كەمىندە 80 مىڭ ادام جاساندى ينتەللەكت بويىنشا ءبىلىم الۋى كەرەك.

تۇجىرىمداماداعى ماڭىزدى باعىتتاردىڭ ءبىرى - نەيروندىق جەلىلەرگە نەگىزدەلگەن ۇلتتىق ءتىل مودەلىن ازىرلەپ، ەنگىزۋ.

«ۇلتتىق ءتىل مودەلىن ىسكە اسىرۋ جاساندى ينتەللەكت بويىنشا ءتۇرلى جوبالاردا قازاق ءتىلىن قولدانۋعا مۇمكىندىك بەرەدى، وسىلايشا شەتەلدىك سەرۆيستەرگە تاۋەلدىلىكتى ازايتادى. سونىمەن قوسا، اتالعان باعىت بويىنشا وتاندىق ساراپتاما جاساۋعا مۇمكىندىك بەرەدى، تسيفرلىق ورتادا ءوز مادەنيەتى مەن قۇندىلىقتارىن ساقتاۋعا ىقپال ەتىپ، ءبىر تىلدىك توپقا كىرەتىن تىلدىك مودەلدى دامىتۋعا سەرپىن بەرەدى»، - دەلىنگەن جاريالانعان قۇجات جوباسىندا.

مينيسترلىكتە جاساندى ينتەللەكت سالاسىندا ادام قۇقىقتارى مەن بوستاندىقتارىن ساقتاۋدى، جاساندى ينتەللەكتكە قاتىستى ساپاسىز شەشىمدەردىڭ سالدارىنان كەمسىتۋشىلىكتىڭ بارلىق تۇرىنە جول بەرمەۋدى، قازاقستاننىڭ ادامگەرشىلىك، رۋحاني جانە مادەني قۇندىلىقتارىنا سايكەستىكتى قامتاماسىز ەتۋدى كوزدەيتىن ادەپ ەرەجەلەرى قابىلدانۋى ءتيىس دەپ سانايدى.

قازىر جاساندى ينتەللەكت جۇيەلەرىنە نەمەسە روبوتتارعا سالىق سالۋدىڭ قاجەتى جوق. بۇل ارەكەتتى جۇزەگە اسىرۋ كومپانيالاردىڭ جاساندى ينتەللەكتتى ازىرلەۋ جانە ەنگىزۋ ءۇشىن نەعۇرلىم قولايلى جاعدايلار جاسالعان باسقا ەلدەردىڭ يۋريسديكتسيالارىنا كوشۋىنە اكەلۋى مۇمكىن.

«جاساندى ينتەللەكت ونىمدەرىن پايدالانۋ كەزىندە تۋىنداۋى مۇمكىن ادام قاۋىپسىزدىگىن قوزعايتىن تاۋەكەلدەردىڭ باقىلاۋىندا بولۋىن قامتاماسىز ەتۋ ءۇشىن ەلىمىزدە جاساندى ينتەللەكتتى رەتتەۋ جونىندەگى كوميسسيا قۇرىلاتىن بولادى. ونىڭ فۋنكتسياسىنا جاساندى ينتەللەكت قاۋىپسىزدىگى، ەتيكالىق نورمالاردى ساقتاۋ، نورماتيۆتىك- تەحنيكالىق جانە نورماتيۆتىك-قۇقىقتىق قۇجاتتارعا سايكەستىك، جاساندى ينتەللەكت ءونىمىن باعالاۋ جانە ونى قامتاماسىز ەتۋ كىرەدى. كوميسسيا قۇرامىنا ءتيىستى سالالار بويىنشا ساراپشىلار تارتىلادى. سونداي- اق كوميسسيا تۇراقتى نەگىزدە جاساندى ينتەللەكت تەحنولوگيالارى اكەلەتىن تاۋەكەلدەردى انىقتاۋ بويىنشا جۇمىس جۇرگىزەتىن بولادى»، - دەلىنگەن تۇجىرىمداما جوباسىندا.

اۆتور

داۋلەت ىزتىلەۋ