جاساندى ينتەللەكت سۋدى كوپ «ىشەدى». نەگە؟
استانا. KAZINFORM – جاساندى ينتەللەكت (ج ي) باسەكەسى ءىرى تەحنولوگيالىق كومپانيالاردىڭ سۋدى بىرنەشە ەسە كوپ تۇتىنۋىنا الىپ كەلدى. ولارعا سونشا كوپ سۋ نە ءۇشىن كەرەك؟
Financial Times ءىرى تەحنولوگيالىق كومپانيالار سۋدى پايدالانۋدى ايتارلىقتاي ارتتىرعانىن جازدى. بۇل جاساندى ينتەللەكت جۇيەلەرىنىڭ قورشاعان ورتاعا تۇسىرەتىن سالماعىنىڭ تاعى ءبىر سالدارى ەكەنىن Aikyn.kz بريتاندىق قارجى باسىلىمىنا سۇيەنە وتىرىپ تۇسىندىرەدى.
2022 -جىلى Microsoft سۋدى تۇتىنۋدى 34 پايىزعا، Google بولسا 22 پايىزعا جانە Meta ءۇش پايىزعا ۇلعايتقان. بۇرىن بۇنداي جىلدام ءوسۋ بولماعانىن ساراپشىلار ايتۋدا. سۋ ءىرى تەحنولوگيالىق كومپانيالاردىڭ دەرەكتەر ورتالىقتارىن سالقىنداتۋ ءۇشىن كەرەك.
جاساندى ينتەللەكت تۋدىرعان دۇربەلەڭنىڭ تاعى ءبىر زياندى كورىنىسى وراسان زور قۋات كوزدەرىن تۇتىنۋ مەن تابيعي رەسۋرستارعا دەگەن ج ي-دىڭ قوماعايلىعىنان بايقالدى.
عالىمداردىڭ بولجامى بويىنشا، ج ي-گە سۇرانىس 2027 -جىلعا جەر استى نەمەسە جەر ءۇستى كوزدەرىنەن الىناتىن سۋدى پايدالانۋ كولەمىنىڭ ۇلعايۋىنا اكەلەدى. جي تۇتىناتىن سۋ كولەمى 2027 -جىلعا قاراي 4,2-6,6 ميلليارد تەكشە مەتردى قۇراۋى مۇمكىن. بۇل تۇتاس ۇلى بريتانيانىڭ جىل سايىن پايدالاناتىن كولەمىنىڭ جارتىسىنا جۋىعىنا تەڭ.
كاليفورنيا ۋنيۆەرسيتەتىنىڭ زەرتتەۋشىلەرى وسى اپتادا Nature جۋرنالىندا جاريالانعان ماقالادا «ج ي مودەلدەرىنىڭ جىلدام دامۋى تۇشى سۋ تاپشىلىعىن بارعان سايىن كۇشەيتەتىنىن، سۋ ينفراقۇرىلىمىنا توتەنشە سالماق سالاتىنىن» جاريالادى.
بۇل الاڭداۋشىلىق بىلتىردان بەرى ءوستى، ويتكەنى جەتەكشى تەحنولوگيالىق كومپانيالار ۇلكەن كولەمدەگى ءماتىن مەن دەرەكتەردى وڭدەۋگە، جاساۋعا قابىلەتتى ۇلكەن ءتىل ۇلگىلەرىندە جۇمىس ىستەيتىن گەنەراتيۆتى جاساندى ينتەللەكت ونىمدەرىن شىعارۋ ءۇشىن باسەكەلەسۋدە.
بۇل مودەلدەر جۇمىس ىستەۋ ءۇشىن وراسان زور ەسەپتەۋ قۋاتىن كەرەك ەتەدى، بۇل جابدىقتى سالقىنداتۋ ءۇشىن سۋدى پايدالاناتىن ۇلكەن سەرۆەرلىك فەرمالاردى قاجەت ەتۋدە. سۋدىڭ ءبىر بولىگى سالقىنداتۋ پروتسەسىندە بۋلانىپ كەتەدى، ال ءبىراز كولەمىن قايتا پايدالانۋعا بولادى.
سۋ مۇناي مەن گازدى ايداۋ نەمەسە جىلۋ ەلەكتر ستانسيالارىندا بۋ ءوندىرۋ سياقتى وتىن مەن ەلەكتر ەنەرگياسىنىڭ كوپشىلىگىندە قولدانىلادى. ول سونداي-اق گيدروەنەرگەتيكا ءۇشىن پايدالانىلاتىن سۋ وبەكتىلەرىندە دە كوپ كولەمدە بۋلانادى.
Microsoft, Google جانە Meta سياقتى تەحنولوگيالىق الپاۋىتتار 2030 -جىلعا قاراي وزدەرى پايدالاناتىن سۋدان كوبىرەك سۋدى تابيعي اينالىمعا قوسۋدى ماقسات ەتۋدە. مىسالى، اعىپ جاتقان سۋارۋ ينفراقۇرىلىمىن جاقسارتۋ نەمەسە سۋلى-باتپاقتى جۇيەلدى قالپىنا كەلتىرۋ جۇمىستارىن قارجىلاندىرۋ ارقىلى.
OpenAI ءوزىنىڭ ەڭ جەتىلدىرىلگەن GPT-4 مودەلىن وقىتۋ بارىسىندا ايوۆا شتاتىنداعى دەرەكتەر ورتالىعىندا وكرۋگتەگى سۋدىڭ 6 پايىزىن تۇتىنعان. كاليفورنيا ۋنيۆەرسيتەتىنىڭ اسسيستەنتى شاولەي رەن GPT-3 ەسكى ۇلگىسىندە جۇمىس ىستەيتىن تانىمال چات-بوتىنان 10-50 جاۋاپ الۋعا 500 م ل كولەمىندە سۋ قاجەت بولاتىنىن ەسەپتەگەن.
رەننىڭ ايتۋىنشا، GPT-4 كوپ پارامەترلەرگە يە بولدى جانە كوبىرەك ەنەرگيانى قاجەت ەتەدى، سوندىقتان ول سۋدى كوبىرەك تۇتىنۋى مۇمكىن. ال مودەلدىڭ قۋات تۇتىنۋى تۋرالى تولىق اقپاراتتى ازىرلەۋشى كومپانيا قۇپيا ساقتاۋدا.
اتاقتى وڭتۇستىك كاليفورنيا ۋنيۆەرسيتەتىنىڭ اننەنبەرگ مەكتەبىنىڭ زەرتتەۋشى-پروفەسسورى كەيت كروۋفورد: «وسى ماسەلە بويىنشا قوعام الدىندا اشىقتىق پەن كوبىرەك ەسەپ بەرۋسىز ج ي مودەلدەرىنىڭ قورشاعان ورتاعا اسەرىن تولىق باعالاۋ مۇمكىن ەمەس. جانە بۇل پلانەتانىڭ كوپتەگەن بولىكتەرى تەرەڭ جانە ۇزاققا سوزىلعان قۇرعاقشىلىقتى باستان كەشىرىپ جاتقان ۋاقىتتا ماڭىزدى جانە اۋىز سۋ ءقازىردىڭ وزىندە تاپشى رەسۋرس بولىپ تابىلادى».
پروفەسسوردىڭ ويىنشا، «گەنەراتيۆتى ج ي قۇرالدارىن پلانەتا قازىردىڭ وزىندە كليماتتىق داعدارىسقا تاپ بولعان كەزدە ولاردىڭ شىنايى اسەرىن بىلمەي، سوقىر تۇردە قولدانۋعا بولمايدى». بۇل ج ي-دىڭ قورشاعان ورتاعا تيگىزەتىن تاعى ءبىر كەرى سالدارى دەپ سانالادى.
