جاساندى ينتەللەكت جۇتىپ قويادى
جاساندى ينتەللەكت (ج ي) مەملەكەتتىك باسقارۋعا جانە ادامزات مادەنيەتىنە اسەر ەتۋدە بىرنەشە بەتبۇرىس جاساپ ۇلگەردى. نيۋ-يوركتەگى سامميتتە ج ي قاۋىپتەرى تالقىلادى.
ج ي شىعارماشىلىقتى قۇنسىزداندىرادى دەگەن قاۋىپ كۇشەيدى. يلليۋستراتسيا neilsahota.com سايتىنان الىندى. اۆتورلىعى:
ادامزات وركەنيەتىنىڭ وزگەرىستەر الدىندا تۇرعانىن Aikyn.kz وسى اپتادا وتكەن Axios كومپانياسى ۇيىمداستىرعان سامميتىنە سىلتەمە جاساي وتىرىپ، تالدايدى.
ساراپشىلار ادامزات وركەنيەتىندەگى بەتبۇرىستى كەزەڭ تۋرالى Axios كومپانياسى ۇيىمداستىرعان AI+ سامميتىندە (نيۋ-يورك، 4 -ماۋسىم) ايتقان. ونىڭ ءبىرىنشى كورىنىسى باعدارلامالىق قامتاماسىز ەتۋ سالاسىندا (كود جازۋ) ج ي-دىڭ ىقپالىنىڭ وسۋىنەن انىق بايقالدى. جاساندى ينتەللەكت باعدارلامالىق جاساقتاما يندۋسترياسىن تۇبەگەيلى وزگەرتۋدە. ەندى كومپانيالار ج ي-دىڭ ءوزىن دامىتۋ ءۇشىن ج ي قۇرالدارىن پايدالانا باستادى.
«بۇرىن ءبىز «باعدارلامالىق قامتاماسىز ەتۋ الەمدى جۇتىپ جاتىر» دەپ ايتاتىنبىز. ەندى جاساندى ينتەللەكت باعدارلامالىق جاساقتامانىڭ ءوزىن جۇتىپ جاتىر»، - دەيدى Snyk كيبەرقاۋىپسىزدىك كومپانياسىنىڭ تەحنيكالىق ديرەكتورى دەنني اللان.
ەكىنشى وزگەرىس. چات- بوتتار ادامدار اراسىنداعى ءوزارا ارەكەتتەسۋدى، كوممۋنيكاتسيانى وزگەرتۋدە. Boston Consulting Group كومپانياسىنىڭ باسقارۋشى ديرەكتورى ۆلاديمير لۋكيچ قىزمەتتەر چات-بوتتاردى كەلىسسوزدەر ءۇشىن قولداناتىنىن ايتادى. ول باس ديرەكتورلارمەن كەزدەسەر الدىندا، ولاردىڭ قانداي سۇراق قويۋى مۇمكىن ەكەنىن ج ي-دەن سۇرايدى. ءبىر قىزىعى، باس ديرەكتور سايىپ كەلگەندە ءدال وسى سۇراقتاردى كۇن تارتىبىنە شىعاراتىن بولعان.
ءۇشىنشى بەتبۇرىس. ۇكىمەت ج ي-مەن بايلانىستى تاۋەكەلدەردى شەكتەي الماۋى مۇمكىن. مىسالى، ترامپ اكىمشىلىگى مەن ا ق ش كونگرەسى ج ي-دى رەتتەۋدەن باس تارتقان. بۇل جاعداي قوعامدىق قاۋىپسىزدىككە قاتىستى الاڭداۋشىلىق تۋدىرۋدا.
نيۋ-يورك شتاتىنىڭ گۋبەرناتورى كەتي حوۋكۋل ا ق ش وكىلدەر پالاتاسى ماقۇلداعان ترامپتىڭ بيۋدجەتتىك زاڭ جوباسىنا نارازىلىق ءبىلدىردى. اتالعان زاڭ شتاتتارعا ج ي- ءدى رەتتەيتىن جاڭا ەرەجەلەر ەنگىزۋگە 10 جىلعا تىيىم سالۋدى كوزدەيدى.
«بۇعان جول بەرۋگە بولمايدى. ءبىراق مەن ۆاشينگتوننىڭ باعىتىن وزگەرتەتىنىنە ۇمىتتەنبەيمىن»، - دەيدى حوۋكۋل.
ءتورتىنشى بەتبۇرىس. ج ي شىعارماشىلىقتى قۇنسىزداندىرادى دەگەن قاۋىپ كۇشەيدى. ج ي ۇلگىلەرىن وقىتۋ ءۇشىن ونى جاساۋشىلار ادامزاتتىڭ شىعارماشىلىق مۇراسىنان جينالعان بارلىق «اشىق دەرەكتەردى» پايدالانعان. الايدا وسى دەرەكتەردى پايدالانۋعا كەلىسىم سۇراماۋ جانە اۆتورلارعا وتەماقى تولەمەۋ مادەني ۇلەسكە دەگەن قۇرمەتتىڭ تومەندەۋىنە الىپ كەلۋدە.
«ەگەر بۇل جاعداي وزگەرمەسە، ادامداردىڭ العا ۇمتىلۋعا، ۇزدىك بولۋعا، شىعارماشىلىققا جانە يدەيا تۋدىرۋعا دەگەن ەكونوميكالىق ىنتالارى جوعالادى»، - دەيدى كينورەجيسسەر، اكتەر دجوزەف گوردون- ليەۆيتت.
AI+ سامميتىندە ايتىلعان پىكىرلەر ج ي-دىڭ تەك تەحنولوگيا عانا ەمەس، الەۋمەتتىك، ەكونوميكالىق جانە مادەني فاكتور رەتىندە دە ۇلكەن ىقپالعا يە بولا باستاعانىن كورسەتتى. ول بيزنەستى وزگەرتەدى، ادامدار اراسىنداعى كوممۋنيكاتسيانى ترانسفورماتسيالايدى، مەملەكەتتىڭ رولىن قايتا قاراۋعا ءماجبۇر ەتەدى. بۇدان قورقۋ كەرەك پا، الدە قۋانعان دۇرىس پا؟!
