جاساندى ينتەللەكت بولاشاقتا ادامزاتقا قىزمەت ەتە مە الدە ءامىرىن جۇرگىزە مە
استانا. قازاقپارات - 2024-جىلى جاساندى ينتەللەكت (ج ي) دامۋدىڭ جاڭا ساتىسىنا كوتەرىلدى. تەحنوالىپتاردىڭ باسەكەلەستەگى جىلدان-جىلعا كۇشەيىپ، ادامزات بالاسىنا اڭگىمەلەسەتىن اۆتو، روبوت-كۇتۋشى سەكىلدى ادام سەنگىسىز اقىلدى ونىمدەردى سىيلاۋدا. الايدا جارماقتىڭ ەكى بەتى بولاتىنى سەكىلدى ج ي- ءدىڭ دە ەكى قىرى بار.
Kazinform ءتىلشىسى وسى تاقىرىپتى زەردەلەپ كوردى.
مۇمكىندىكتىڭ جاڭا كوكجيەگى
2024-جىلعى اۋىز تولتىرىپ ايتارلىق ناتيجە – ج ي- ءدىڭ جەتىلدىرىلىپ، ءماتىن، داۋىس، سۋرەت جانە ۆيدەونى بىرىكتىرە پايدالانۋ ارقىلى كونتەنت، اقپاراتتىق ءونىم جاساۋدى «ۇيرەنۋى» بولدى. Meta ،ByteDance ،Google جانە OpenAI سىندى جەتەكشى كورپوراتسيالار ج ي- ءدى جاي عانا قولايلى ەتىپ قويماي، ونى كۇندەلىكتى ءومىردىڭ سان ءتۇرلى سالالارىنا كىرىكتىرۋگە شىنداپ كىرىسكەن سىڭايلى.
شىلدە ايىندا Meta تۇتىنۋشىنىڭ سۇراۋىمەن جاڭا سۋرەت جاسايتىن جانە بار سۋرەتتى وڭدەيتىن ۆيرتۋالدى كومەكشىنىڭ جاڭارتىلعان نۇسقاسىن شىعاردى. بۇنى ج ي- ءدىڭ شىعارماشىلىق جۇمىسى دەسەك تە بولادى. مارك تسۋكەربەرگ جىل سوڭىنا قاراي Meta AI ەڭ كوپ سۇرانىسقا يە كومەكشىگە اينالاتىنىن ايتادى.
قىتايلىق TikTok-تىڭ ByteDance كومپانياسى دا قالىس قالار ەمەس. تامىز ايىندا جازعان ماتىنگە ساي ساپالى ۆيدەو جاساپ بەرەتىن Jimeng AI قوسىمشاسىن تانىستىردى.
OpenAI- دا دا ءدال وسىنداي Sora اتتى قوسىمشا بار. بۇلار كونتەنت جاساۋ ۇدەرىسىن جىلدامداتىپ، مەديايندۋستريا مۇمكىندىكتەرىن ارتتىرادى.
Jimeng AI ازىرشە تەك قىتايدا قولجەتىمدى جانە ونىڭ جاساپ بەرەتىن ۆيدەوسىنىڭ ۇزاقتىعى بىرنەشە سەكۋندتان اسپايدى. الايدا ByteDance بۇل قوسىمشانى TikTok-قا كىرىكتىرمەك. ولاي ەتسە، ۆيدەوكونتەنت سالاسىندا تاڭعاجايىپ وزگەرىس بولادى.
مامىر ايىندا OpenAI ءماتىن، اۋديو جانە سۋرەتپەن جۇمىس ىستەيتىن GPT-4o داۋىستىق كومەكشىسىن تانىستىردى.
Google بولسا، ج ي- مەن سەلبەسەتىن Project Astra مۋلتيمودالدىق كومەكشىسىن شىعاراتىنىن جاريالادى.
دەگەنمەن، جاساندى ينتەللەكت سالاسىنداعى يننوۆاتسيالاردىڭ قارقىندى دامۋى تەك تاڭدانىس تۋدىرىپ قانا قويماي، ءبىراز ادامنىڭ بويىنا قورقىنىش تا ۇيالاتادى. Kazinform بۇعان دەيىن جازعان الاياقتىق، قوعامدىق پىكىرگە مانيپۋلياتسيا جاساۋ جانە جالعان اقپاراتتىڭ كوپتەپ تارالۋى سياقتى قاۋىپ-قاتەرلەر كۇندەلىكتى ومىردە ءجيى كورىنىس تابا باستادى.
ج ي كۇندەلىكتى ومىرگە وزگەرىس اكەلدى
ج ي ءبىز كۇن سايىن قولداناتىن سمارتفون، تۇرمىستىق تەحنيكا جانە اۆتوموبيلدەرگە ەنگىزىلىپ، ءومىرىمىزدىڭ ءبىر بولىگىنە اينالىپ بارادى. 2024-جىلى Samsung ،Google جانە Apple سمارتفوندارى تاعى ءبىر تەحنولوگيالىق سەرپىلىس جاساپ، جاڭا فۋنكسيالار قوسىلدى.
Samsung جىل باسىندا شىعارعان Galaxy S24 مودەلىندە ج ي- ءدىڭ وزىق مۇمكىندىكتەرىن كورسەتتى. ونىڭ ىشىندە تەلەفونمەن سويلەسىپ تۇرعان ساتتە ىلەسپە اۋدارما جاساۋ، قۇجاتتى وڭاي جاساۋ ءۇشىن سويلەپ تۇرعان ءسوزىڭدى ماتىنگە اينالدىرۋ، ينتەللەكتۋالدى فوتورەداكتور جانە بىرەگەي اقپاراتتى ىزدەۋ فۋنكتسياسى بار.
ەندى ءبىر نىسان جايلى اقپارات الۋ ءۇشىن، ەكرانعا الىپ تۇرىپ، ساۋساقپەن دوڭگەلەتە سىزىپ قالساڭىز بولدى، ەشبىر سۇراۋ سالماي-اق سمارتفون ول جايلى اقپاراتتى تاۋىپ بەرەدى.
WWDC 2024 جازعى كونفەرەنسياسىندا Apple ءوزىنىڭ Apple Intelligence اتتى جاساندى ينتەللەكتىسىن تانىستىردى. Apple باس ديرەكتورى تيم كۋك جاڭا ءونىمدى «جاساندى ينتەللەكت شەڭبەرىنەن شىعاتىن» جەكەلەندىرىلگەن جانە ينتۋيتيۆتى تەحنولوگيا دەپ اتادى.
اۆتوموبيلدەردىڭ دە كۇننەن-كۇنگە «اقىلى» ارتىپ بارادى. مىسالى، Volkswagen ماۋسىم ايىندا ChatGPT- ءدى ءوزىنىڭ كولىكتەرىنە قوسىپ، اڭگىمەلەسۋ جانە داۋىس ارقىلى قىزمەتتەردى باسقارۋ مۇمكىندىگىن ەنگىزدى.
Mercedes-Benz بولسا، MBUX كومەكشىسى ارقىلى تاعى ءبىر دەڭگەدى باعىندىردى. كولىك ءوز يەسىنىڭ كوڭىلىن تابۋدى ابدەن مەڭگەرىپ الدى: تاڭەرتەڭ سول كۇنگى نەگىزگى جاڭالىقتاردى ۇسىنادى، كەشكە دەنەنى بوساتاتىن ماسساج باپتاۋىن قوسادى، ال كەزدەسۋگە كەشىگىپ بارا جاتسا، جاي عانا كولىكتە وتىرىپ-اق قوڭىراۋ شالۋعا مۇمكىندىگى بارىن ەسكە سالادى. بۇل دەگەنىڭىز ءار كيلومەترمەن استاسقان قامقورلىق ءارى جايلىلىق.
«اقىلدى ۇيلەر» قالاي دامىپ كەلەدى
جاساندى ينتەللەكت «اقىلدى ۇيلەردىڭ» دە اجىراماس بولىگىنە اينالىپ ۇلگەردى. گەنەراتيۆتىك ج ي جۇيەلەر ءۇيدى باسقارۋدى جاي عانا ىڭعايلى ەتىپ قويماي، قولدانۋشىعا نە قاجەت ەكەنىن بولجاۋ ارقىلى قۇرىلعىمەن بايلانىستى ينتۋيتيۆتىك دەڭگەيگە كوتەرەدى.
جىلدىڭ جاڭا ونىمدەرى تاڭعالدىرماي قويمايدى. Samsung كومپانياسى Ballie اتتى جاڭا روبوتتى تانىستىردى. ول ءۇيدى كۇزەتۋدەن باستاپ، كارى-قۇرتاڭ ادامدارعا كومەكتەسۋگە دەيىنگى قىزمەتتەردى كورسەتەدى. ال وعان ەنگىزىلگەن پروەكتسيالاۋشى تىپتەن جاڭا مۇمكىندىكتەر سىيلايدى.
ال LG كومپانياسى ۇسىنعان AI Agent كومەكشىسى ادامنىڭ كوڭىل-كۇيىن تانىپ، اڭگىمەگە تارتىپ، كەرەك بولسا تۇرمىستىق تەحنيكالاردى دا باسقارا الادى.
ەكىنشى جاعىنان العاندا «اقىلدى» كومەكشىلەردىڭ مۇمكىندىكتەرى ارتقان سايىن ادامنىڭ تاۋەلدىلىگى دە كۇشەيىپ كەلەدى. وسى ورايدا جي كۇندەلىكتى شارۋاسىن تىندىرىپ بەرۋ ارقىلى ادامداردى كىتاپ وقۋ، شىعارماشىلىقپەن اينالىسۋ سىندى داعدىلاردان ايىرماي ما دەگەن سۇراق تۋادى. ماسەلەن، جي كومەگىمەن فوتولاردى وڭدەۋ ءمىنسىز سۋرەتتەردى جاساۋعا مۇمكىندىك بەرگەنىمەن، ادامنىڭ وسى شىعارماشىلىق ۇدەرىسكە قاتىسۋىن توقتاتادى.
اۆتوماتتاندىرۋ مەن ادام اراسىنداعى «التىن ورتا»
ناۋرىز ايىندا ۇلىبريتانيانىڭ مەملەكەتتىك ساياساتتى زەرتتەۋ ينستيتۋتى ەلدە 8 ميلليون ازامات ماماندىعىنىڭ اۆتوماتتاندىرىلۋىنا بايلانىستى قيىن جاعدايعا تاپ بولۋى مۇمكىن ەكەندىگى جايلى بايانداما جاريالادى. قازىردىڭ وزىندە كوپيرايتەرلەر، گرافيكالىق ديزاينەرلەر جانە جەكە كومەكشىلەر تەحنولوگيالىق سەرپىلىستىڭ سالدارىن سەزىنۋدە. اۆتوماتتاندىرۋ تەك ەكونوميكا سالاسىمەن عانا شەكتەلمەيدى، ءبىلىم جانە قاۋىپسىزدىك سەكىلدى سالالارعا دا ەنىپ جاتىر.
كومپانيالار Amira ،Memrise جانە Dreambox سىندى پلاتفورمالار جاساۋ ارقىلى ءتىل، ماتەماتيكانى ۇيرەتۋ جانە باسقا دا دۇنيەلەرگە باۋلۋ ىستەرىن جەڭىلدەتۋ ءۇشىن ج ي- ءدى دەندەتىپ ەنگىزىپ جاتىر. الايدا وسى باستاما ءبىلىم بەرۋ نارىعىنان مۇعالىمدەردى ىعىستىرىپ شىعارسا نە بولادى؟
كيبەرقاۋىپسىزدىك سالاسىنىڭ ماماندارىن دا ج ي قورعانۋ سالاسىنان بولەك، شابۋىلداۋ سالاسىنا قولدانىلسا جاعداي قالاي بولادى دەگەن سۇراق مازالايدى.
«چاتەم-حاۋس» ساراپتامالىق ورتالىعى ۇيىمداستىرعان «كيبەركەڭىستىك 2024» كونفەرەنتسياسىندا جاھاندىق كيبەر-اليانس ۇكىمەتتىك ەمەس ۇيىمىنىڭ حالىقارالىق سەرىكتەستىك ديرەكتورى تەرري ۋيلسون الاياقتار ج ي- ءدى قولدانۋشىلاردىڭ جەكە اقپاراتتارىن الۋعا باعىتتالعان كۇردەلى فيشينگتىك شابۋىلداردى جۇزەگە اسىرۋ ءۇشىن پايدالانۋ قاۋپى بارىن اتاپ ءوتتى. بۇل ادامي فاكتورعا نەگىزدەلگەن شابۋىلدار جەكە پايدالانۋشىلارعا عانا ەمەس، سونىمەن قاتار تۇتاس ۇيىمدارعا دا قاۋىپ توندىرەدى.
سونىمەن قاتار ج ي- ءدىڭ قارقىندى دامۋى ەنەرگيا شىعىنىن ارتتىرادى، ويتكەنى كونتەنت جاساۋ اۋقىمدى ەسەپتەۋ رەسۋرستارىن پايدالانۋدى تالاپ ەتەدى. BBC حابارلاعانداي، گەنەراتيۆتى ج ي جۇيەلەرى باسقا باعدارلامالىق جاساقتامالارعا قاراعاندا 33 ەسە كوپ ەنەرگيا تۇتىنادى. 2026-جىلعا قاراي جي كومپانيالارى بۇكىل جاپونيا تۇتىناتىن ەنەرگيامەن پارا-پار ەلەكتر ەنەرگياسىن جۇمسايتىن بولادى، بۇل ءوز كەزەگىندە ەكولوگتەردىڭ الاڭداۋشىلىعىن تۋدىرادى.
بولاشاققا باعدار قانداي
ج ي حاوس تۋدىرۋ كوزى ەمەس، جاسامپازدىق قۇرالى بولىپ قالا بەرۋى ءۇشىن تەك تەحنولوگيالىق شەشىمدەر عانا ەمەس، سونىمەن قاتار ەتيكالىق جاۋاپكەرشىلىك قاجەت. «2001: عارىشتىق وديسسەيا» فيلمى («وديسسەيا» - كونە گرەك اقىنى گومەردىڭ جىرى، رەد.) جاساندى ينتەللەكتىنى باسقارۋ قولدان شىعىپ كەتكەن جاعدايدا نە بولاتىنىن ەسكەرتەتىندەي.
كينوكارتينادا ەكيپاجعا كومەكتەسۋ ءۇشىن جاسالعان HAL 9000 كومپيۋتەرى ادامداردى قاۋىپ دەپ ساناپ، ولاردى جويۋعا تىرىستى. بۇل جاساندى ينتەللەكتىنى سانالى تاسىلدەر ارقىلى دامىتپاسا، ونىڭ بىزگە قارسى شىعۋى مۇمكىن ەكەنىن قاپەرىمىزگە سالادى.
ايتا كەتەيىك، بۇعان دەيىن قازاقستان پرەزيدەنتىنە جاساندى ينتەللەكت سالاسىنداعى وتاندىق ازىرلەمەلەر تانىستىرىلعانىن جازعان بولاتىنبىز. ولاردىڭ اراسىندا كەن ورىندارىنىڭ سيفرلىق تەلنۇسقاسى، درونداردى باسقارۋ جانە وندىرىسكە ارنالعان روبوت-ءيت سەكىلدى يندۋستريالىق شەشىمدەر بار.
