جاساندى ينتەللەكت اسەرىنەن قانداي ماماندىقتار جويىلىپ كەتۋى مۇمكىن - ساراپشىلار پىكىرى
الماتى. KAZINFORM - الماتىدا جاساندى ينتەللەكت سالاسىنداعى AlmatyFair.ai كورمەسى ءوز جۇمىسىن باستادى. كورمە 30-ناۋرىزعا دەيىن جالعاسادى.
كورمەدە كومپانيالار جاساندى ينتەللەكتكە قاتىستى يننوۆاتسيالىق جوبالارى مەن زاماناۋي شەشىمدەرىن ۇسىناتىن ستارتاپتار اللەياسى بوي كوتەردى. ءىس-شارا بارىسىندا AI سالاسىنىڭ ماماندارى مەن ساراپشىلار جاساندى ينتەللەكتىنىڭ دامۋى اسەرىنەن قانداي ماماندىقتار جويىلىپ كەتۋى مۇمكىن ەكەنىن ايتتى.
ا ق ش پەن ۇلى بريتانيانىڭ قۇقىق قورعاۋ جانە بارلاۋ قىزمەتتەرى قولداناتىن Black Ice AI جوباسىنىڭ نەگىزىن قالاۋشىسى ەليسار نۇرماعامبەتوۆ ج ي كوپتەگەن سالادا ورتاشا مامانداردى باسىپ وزعانىن ايتتى.
- ءيا، قازىردىڭ وزىندە ورتاشا دەڭگەيدەگى پروگرامميست، ماركەتولوگ، زاڭگەرلەرگە قاراعاندا AI جۇمىستى جاقسىراق ىستەپ جاتىر. سوندىقتان بۇل سالالاردا جاپپاي اۆتوماتتاندىرۋعا كوشۋ بولۋى مۇمكىن. سونىمەن قاتار بولاشاقتا ءىرى كومپانيالار پروگرامميستەردىڭ سانىن كوبەيتكەنشە AI ارقىلى وتە ءتيىمدى جۇمىس ىستەيتىن شاعىن توپتار قۇرادى دەپ ويلايمىن. ال Jasper AI بۇگىنگى كۇنى ماركەتولوگتىڭ جۇمىسىنىڭ 50 پايىزىن اۆتوماتتاندىرا الادى. سوندىقتان بۇل بارلىق سالالارعا اسەر ەتىپ جاتىر، - دەدى ەليسار نۇرماعامبەتوۆ.
الماتى قالاسى جاستار ساياساتى باسقارماسىنىڭ باسشىسى ازيز قاجدانبەك قازىر Call-ورتالىقتىڭ وپەراتورى، كوپيرايتەر، مونتاج جاساۋشى سىندى ماماندىقتارعا سۇرانىس ازايىپ جاتقانىن اتاپ ءوتتى.
بۇل ماسەلەگە بايلانىستى «قازاق تەلەكوم» ا ق سيفرلىق بيزنەس ديۆيزيونىنىڭ باس ديرەكتورى ابىلايحان وسپانوۆ تا پىكىر ءبىلدىردى.
- ادامداردىڭ جۇمىس كۇشىن جاساندى ينتەللەكت الماستىرىپ جاتقان باستى جۇمىستاردىڭ ءبىرى - بايلانىس ورتالىقتارى. قازىر ادامدار بايلانىس ورتالىقتارىنا حابارلاسىپ، ولارعا جاۋاپ بەرىپ تۇرعان ءتىرى ادام نە جاساندى ينتەللەكت ەكەنىن اجىراتا المايدى. ودان كەيىن مونيتورينگ جۇرگىزەتىن مامانداردى ايتا الامىز. مىسالى، بىزدە جەلىلەردىڭ جۇمىسىن، اقاۋلارىن باقىلايتىن ادامداردىڭ جۇمىسى اۆتوماتتاندىرىلعان. بۇرىنعىداي 10-15 ادام ەمەس، قازىر داتچيكتەردى باقىلايتىن 1-2 مامان عانا وتىرادى، - دەدى ول.
سونداي-اق ابىلايحان وسپانوۆ ساتۋ مەنەدجەرى مەن اۋدارماشى ماماندىقتاردى الداعى ۋاقىتتا جويىلۋى مۇمكىن ەكەنىن اتاپ ءوتتى. ايتۋىنشا، قازىردىڭ وزىندە ولاردىڭ جۇمىسىن دا جاساندى ينتەللەكت ءتيىمدى ورىنداي الادى.
ال nFactorial مەكتەبىنىڭ نەگىزىن قالاۋشى ءارى ديرەكتورى ارمان سۇلەيمەنوۆ كوپتەگەن ماماندىق جويىلماسا دا، ءبىراز وزگەرىسكە تۇسەتىنىن ءتۇسىندىردى.
- تەحنولوگيانىڭ دامۋىمەن كەي ماماندىق جويىلىپ، ونىڭ ورنىنا باسقا ماماندىقتار پايدا بولىپ جاتادى. ال كەي جۇمىس ءتۇرى وزگەرە وتىرىپ ءوزىن ساقتاپ قالدى. مىسالى، جازۋشىلار قازىر دە بار. ولار بۇرىنعىداي جازۋ ماشيناسىمەن ەمەس، كومپيۋتەرمەن جۇمىس ىستەيدى. سمارتفونداردىڭ تاراۋىمەن ءبارىمىز فوتوگرافقا اينالدىق، ءبىراق كاسىبي فوتوگرافتاردىڭ جۇمىسى توقتاپ قالعان جوق. جاساندى ينتەللەكت دامۋىمەن ءبارى باسقاشا بولادى دەيىن دەسەك بولاشاقتى بولجاي المايمىز. سوندىقتان قازىر ءبىزدىڭ تاراپىمىزدان AI- ءدى شەتكە ىسىرىپ قويۋ - قاتەلىك بولادى، - دەدى ارمان سۇلەيمەنوۆ.
ەسكە سالايىق، بۇعان دەيىن جاسلان ماديەۆ جاساندى ينتەللەكت قازاقستانداعى جۇمىس ورىندارىن قانشالىقتى ازايتۋى مۇمكىن ەكەنىن ايتقان بولاتىن.
