جاساندى ساقال - ەزۋ تارتار
استانا. قازاقپارات. كۇيەۋى ايەلىنە: - تىڭداشى... ەرتەڭ... مەنىڭ دوسىمنىڭ ۇيلەنۋ تويى بولاتىن ەدى، سوعان بارساق دەيمىن، - دەپ قالادى.
- دوسىمنىڭ تويى دەيدى؟!. ءوي، ەرتەرەك نەعىپ ايتپايسىڭ! وعان نە كيەمىن؟ سىيلىقتى دا ەرتەرەك الۋ كەرەك ەدى!
- ءوي، «مەنىڭ دوسىمنىڭ ۇيلەنۋ تويى» دەگەن ەڭ ءتاۋىر كينو، سونىڭ اتى. مادەنيەتتەن، ونەردەن جۇرداي نەمە!
- جۇردايلىقتى قايتىپ ال! مادەنيەتتى، ونەرشىل بولا قالعانىن. وتكەندە «اققۋ كولىنە» بارامىز دەگەنىمدە، اتاقتى سپەكتاكلدەن ماقۇرىم نەمە، قارماعىڭدى قامداپ بالىققا دايىندالا باستاعان سەن ەمەس پە ەدىڭ!
* *
«جاڭا قازاق» گالەرەيانى ارالاپ ءجۇرىپ ۇستىنە شوقپىت شاپان كيگەن كەزبەنىڭ سۋرەتىنىڭ الدىندا ۇزاق كىدىرىپ بارىپ:
- قاتىرادى-ا! كيەرگە كيىمى جوق بولسا دا، ءوزىنىڭ سۋرەتىن سالدىرىپتى، - دەپ تاڭدانىس ءبىلدىرىپتى.
* *
سپەكتاكل كەزىندە جاساندى ساقالىنىڭ شەتى اجىراي باستاعانىن سەزگەن اكتەر سىر بىلدىرمەۋگە تىرىسىپ، جانىنداعى اكتريساعا:
- مەن قازىر كەلەمىن، قىمباتتىم. بىرەۋگە بارامىن دەپ ۋادە بەرىپ ەدىم، - دەپ ساحنادان شىعىپ كەتەدى.
ءبىراق، قاس قىلعاندا، گريمەر ورنىندا جوق ەكەن.
امال جوق، اكتەر ساحناعا جاساندى ساقالدى مۇلدە جۇلىپ الىپ تاستاپ، جىلميىپ ورالادى.
- كىمگە جولىقتىڭ، قىمباتتىم؟ - دەيدى ونىڭ ءتۇرىن كورىپ، نە ىستەرىن بىلمەي ابدىراپ تۇرعان اكتريسا.
- شاشتارازعا بارىپ، ساقالىمدى الدىردىم، - دەپتى سوندا اكتەر ساسپاستان.
بەرىك سادىر
