جاس ۇرپاققا وزىق ءارى مىقتى قازاقستاندى قالدىرۋ - پرەزيدەنت ۇلت الدىندا تۇرعان ستراتەگيالىق مىندەتتى اتادى

- بۇل - دۇنيە جۇزىندە وتە سيرەك كەزدەسەتىن قۇبىلىس. ەندى الداعى ۋاقىتتا دا ەلىمىزدىڭ ەگەمەندىگىن نىعايتۋىمىز كەرەك. بۇل - قازىرگى الەمدەگى بۇلىڭعىر احۋالدا ىشكى تۇراقتىلىقتى ساقتاي وتىرىپ، ءوسىپ-وركەندەۋ دەگەن ءسوز، - دەدى مەملەكەت باسشىسى قۇرىلتايدا ءوتىپ جاتقان جيىندا.

پرەزيدەنتتىڭ ايتۋىنشا، وسى جولدا بۇكىل قوعام، سونىڭ ىشىندە وتانشىل، بەلسەندى، ءبىلىمدى ازاماتتار قارقىندى ەڭبەك ەتۋى كەرەك.

- قۇرىلتاي دەپۋتاتتارىنا دا ءۇمىتىم زور. وسىنداي جاعدايدا مەملەكەتتىك اپپارات پەن قۇقىق قورعاۋ مەكەمەلەرىنىڭ ءرولى اسا ماڭىزدى ەكەنى بارشاڭىزعا تۇسىنىكتى. باسقاشا ايتقاندا، قازىرگى بۋىن وكىلدەرى، ياعني ءبىز كەلە جاتقان جاس ۇرپاقتارعا جوسپارلار مەن تۇجىرىمدار ەمەس، ەكونوميكاسى قۋاتتى جانە قارقىندى، جوعارى تەحنولوگيالارى دامىعان، ءبىلىم مەن عىلىمعا نەگىزدەلگەن، زاڭدى مويىندايتىن، جاسامپاز ءارى وزىق، گەوساياسي تۇرعىدان كۇشى مەن ىقپالى بار قازاقستاندى قالدىرۋىمىز كەرەك. بۇل - ۇلتىمىزدىڭ الدىندا تۇرعان ناعىز ستراتەگيالىق مىندەت، - دەدى قاسىم-جومارت توقايەۆ.

حالىقتى تولىققاندى الەۋمەتتىك ينفراقۇرىلىممەن قامتۋ كەرەك.

دەنساۋلىق ساقتاۋ، ءبىلىم بەرۋ، مادەنيەت جانە سپورت نىساندارىنا دەگەن قاجەتتىلىكتى دەرەۋ انىقتاپ، قۇرىلىس جۇمىستارىنا كىرىسۋ كەرەك. 

- ەلىمىز ۇدايى قارقىندى دامۋى ءۇشىن اۋقىمدى مىندەتتەردى ساپالى ءارى جەدەل ىسكە اسىرۋ وتە ماڭىزدى. ازاماتتارىمىز تولىققاندى الەۋمەتتىك ينفراقۇرىلىممەن قامتىلۋى كەرەك. بۇل - حالىقتىڭ تۇرمىس ساپاسىن كوتەرۋدىڭ ماڭىزدى شارتى. سوندىقتان باستى نازاردى ينفراقۇرىلىم قۇرۋ ىسىنە اۋدارامىز - دەدى ول.

سونىمەن قاتار مەملەكەت باسشىسى قازاقستان اۋقىمدى قۇرىلىس الاڭىنا اينالۋعا ءتيىس ەكەنىن بۇعان دەيىن دە ايتقانىن اتاپ ءوتتى. ونىڭ سوزىنشە، ماسەلە جەكەلەگەن جوبالارعا قاتىستى بولىپ وتىرعان جوق.

- جالپى، بارلىق ايماقتا جاپپاي قۇرىلىستى باستاپ، جانداندىرۋ قاجەت. ءبىرىنشى كەزەكتە، جان-جاقتى زەرتتەۋ جانە تالداۋ جۇرگىزىپ، وبلىستاردىڭ دەنساۋلىق ساقتاۋ، ءبىلىم بەرۋ، مادەنيەت جانە سپورت نىساندارىنا دەگەن قاجەتتىلىگىن ەگجەي-تەگجەي انىقتاۋ جۇمىسىن تەز ارادا تولىعىمەن ءبىتىرۋ كەرەك، - دەدى پرەزيدەنت.

ۇكىمەت قالا ينفراقۇرىلىمىنىڭ سيفرلىق سىڭارىن ازىرلەۋگە ءتيىس 

ءاربىر ءىرى قالانىڭ ۇكىمەت بەكىتكەن ناقتى ورتا جانە ۇزاق مەرزىمدەگى دامۋ جوسپارى بولۋعا ءتيىس. 

- ءبىز اۋىل-ايماقتاردى دامىتۋ ماسەلەسىن ءاردايىم ەرەكشە باقىلاۋدا ۇستايمىز. اۋىلداعى تۇرعىنداردىڭ لايىقتى ءومىر ءسۇرۋى ءۇشىن بارىنشا جاعداي جاساپ وتىرمىز. الايدا، قازىر ەكونوميكا، ءبىلىم مەن تەحنولوگيانىڭ تىرەگى دە، تالانتتاردى شىڭدايتىن دا نەگىزگى قالالار ەكەنىن اتاپ وتكەن ءجون. سايىپ كەلگەندە، قۋاتتى قالالار قۋاتتى ايماقتاردىڭ، ال قۋاتتى ايماقتار كۇشتى مەملەكەتتىڭ نەگىزىن قالايدى. سوندىقتان ءاربىر ءىرى قالانىڭ ۇكىمەت بەكىتكەن ناقتى ورتا جانە ۇزاق مەرزىمدەگى دامۋ جوسپارى بولۋعا ءتيىس، - دەدى مەملەكەت باسشىسى.

سونىمەن قاتار پرەزيدەنت قالا رەسۋرسىن ءتيىمدى باسقارۋ ءۇشىن ۇكىمەت اكىمدىكتەرمەن بىرلەسىپ، قالا ينفراقۇرىلىمىنىڭ سيفرلىق سىڭارىن كوپ ۇزاماي ازىرلەۋگە ءتيىس.

- قالالاردىڭ قاۋىپسىز، جايلى، كورىكتى بولۋىنا باسىمدىق، ياعني پريوريتەت رەتىندە قاراي وتىرىپ، بۇل ءىستى اسا ماڭىزدى مەملەكەتتىك مىندەت دەپ قابىلداۋ كەرەك. بۇل - «تازا قازاقستان» جالپى ۇلتتىق تۇجىرىمداماسىنا تولىق ساي كەلەتىن تالاپ. ەگەر قالا قارقىندى داميتىن بولسا، سول ءوڭىردىڭ ەكونوميكاسى دا وركەندەيدى، ادامي الەۋەتى دە ارتادى، - دەدى قاسىم-جومارت توقايەۆ.

بۇعان دەيىن مەملەكەت باسشىسى ەل ومىرىندەگى تاريحي وزگەرىستەردىڭ بارلىعى حالىقتىڭ كوز الدىندا بولىپ جاتقانىن ايتقان ەدى.