جاس - كەدەرگى ەمەس: ش ق و-دا 50 جاستاعى ايەلدەردەن جۇكتىلىك انىقتالدى

وسكەمەن. KAZINFORM - شىعىس قازاقستان وبلىسىندا رەپرودۋكتيۆتى جاستاعى جوعارعى مەجەدەن اسقان ايەلدەردىڭ جۇكتىلىگى تىركەلىپ جاتىر.

وسىعان بايلانىستى ەكستراكورپورالدى ۇرىقتاندىرۋ (ە ك ۇ) پروتسەدۋراسىن جۇرگىزۋگە ارنالعان جاس شەگىن قايتا قاراۋ ماسەلەسى تالقىلانىپ جاتىر.

قازىرگى تاڭدا ايەلدەردىڭ فەرتيلدى (بالالى بولۋعا قابىلەتتى) جاسى رەسمي تۇردە 49 جاسپەن شەكتەلەدى. الايدا بۇعان دەيىن بۇل پروتسەدۋرانى 49 جاستان اسقان ايەلدەر دە قابىلداي الاتىن. 2025 -جىلدان باستاپ ە ك ۇ جاساتۋعا رۇقسات ەتىلەتىن جاستى 45 جاسپەن شەكتەۋ جوسپارلانىپ وتىر. سەبەبى بۇل جاستان كەيىن ايەلدەردىڭ دەنساۋلىعىنا بايلانىستى اسقىنۋ ءقاۋپى ايتارلىقتاي ارتادى.

- 45 جاستان كەيىن انا مەن بالا ومىرىنە تونەتىن قاۋىپ جوعارىلايدى. وتكەن جىلى ەكۇ ارقىلى 52 جاستاعى ايەل ءسابي ءسۇيدى. بيىل 47 جاستاعى ايەل تابيعي جولمەن بوساندى. قالاي بولعاندا دا، ءبىز ايەلدەردى تولىق مەديتسينالىق تەكسەرۋدەن وتۋگە، سوزىلمالى اۋرۋلارىن ەمدەۋگە جانە جۇكتىلىكتى الدىن الا جوسپارلاۋعا شاقىرامىز، - دەدى ش ق و باس رەپرودۋكتولوگى ناديرا سليامحانوۆا.

ەسكە سالساق، وسىعان دەيىن 25 ايەلدىڭ بىرەۋى عانا جۇكتىلىكتى ارنايى جوسپارلايتىندىعى حابارلانعان.

اۆتور

تالعاتجان مۇحامەتبەك ۇلى