جاس جىگىت ءۇيىڭدى جوندەپ بەرەم دەپ تۇرعىنداردىڭ 13 ميلليون تەڭگەسىن قالتاسىنا باسقان
تاراز قالالىق پوليتسيا باسقارماسىنا وبلىس ورتالىعىنىڭ بىرنەشە تۇرعىنى ارىزدانعان، دەپ حابارلايدى Kazinform.
تۇرعىنداردىڭ ايتۋىنشا، قۇرىلىس كومپانياسىنىڭ ديرەكتورى ۇيلەرىنە جوندەۋ جۇمىسىن جاسايمىن دەپ جالپى كولەمى 13 ميلليون 620 مىڭ تەڭگەسىن الداپ يەمدەنىپ كەتكەن.
«اتالعان دەرەك بويىنشا ق ر قىلمىستىق كودەكسىنىڭ 190-بابى 3-بولىگى 4-تارماعىمەن سوتقا دەيىنگى تەرگەۋ باستالدى. باپقا سايكەس، كۇدىكتىگە بىرنەشە رەت الاياقتىق جاساعانى ءۇشىن مۇلكى تاركىلەنىپ، 3 جىلدان 7 جىلعا دەيىن باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ جازاسى كوزدەلگەن»، - دەلىنگەن وبلىستىق پوليتسيا دەپارتامەنتى باسپا ءسوز قىزمەتىنىڭ رەليزىندە.
پوليتسيا قىزمەتكەرلەرى جەدەل ىزدەستىرۋ جۇمىسىنىڭ ناتيجەسىندە وسى قىلمىسقا قاتىسى بار 25 جاستاعى تاراز قالاسىنىڭ تۇرعىنىن ۇستادى.
ەر ادام كىناسىن تولىق مويىنداپ، قاماۋعا الىندى.
سونداي-اق، كۇدىكتىنىڭ وسىعان ۇقساس باسقا دا قىلمىستارعا قاتىسى بار-جوعى انىقتالىپ جاتىر.
قازىرگى ۋاقىتتا سوتقا دەيىنگى تەرگەۋ امالدارى ءجۇرىپ جاتىر.
بۇعان دەيىن تاراز قالالىق قۇرىلىس ءبولىمىنىڭ باسشىسى ءۇش جىلعا سوتتالعانىن جازعان بولاتىنبىز.
