جاس دارىندار تۋرالى «دارا» دەرەكتى فيلمى جارىققا شىعادى
استانا. KAZINFORM - پرەزيدەنت تەلەراديوكەشەنى ەلىمىزدى الەمگە ايگىلى ەتىپ جۇرگەن جاس دارىندار تۋرالى دەرەكتى فيلم ءتۇسىردى. ول Jibek Joly تەلەارناسىندا بۇگىن ساعات 12:45 تە كورسەتىلەدى.
پرەزيدەنت تەلەراديوكەشەنى دايىنداعان «دارا» دەرەكتى فيلمىندە ءپان وليمپيادالارى مەن روبوتوتەحنيكا جارىستارىنان الەمدىك دەڭگەيدە جۇلدەگەر اتانىپ جۇرگەن جاس دارىندار تۋرالى ايتىلادى. سونىمەن قاتار قازاقستاندى تانىمال ەتكەن وليمپيادا جانە جارىس جەڭىمپازدارىنىڭ اتا-انالارى، جەتەكشىلەرى جانە ساراپشى-عالىمدار سۇحبات بەرەدى.
قازاق تىلىندەگى دەرەكتى فيلمنىڭ ۇزاقتىعى - 13:23 مينۋت.
ايتا كەتەيىك، بيىل قازاقستاندىق دارىندى جاستار الەمنىڭ ءتۇرلى ەلىندە وتكەن پاندىك وليمپيادالاردا 26 مەدال يەلەنىپ، ەل ابىرويىن اسقاقتاتتى.
ەسكە سالا كەتسەك، مەملەكەت باسشىسى 3-قازاندا بارلىق دەڭگەيدەگى ءماسليحات دەپۋتاتتارىنىڭ II رەسپۋبليكالىق فورۋمىندا بالالار مەن جاسوسپىرىمدەر اراسىندا ەل ىشىندەگى شىنايى قاھارمانداردى ناسيحاتتاۋ قاجەتتىگىن باسا ايتقان ەدى.
«ءبىزدىڭ وقۋشىلار ماتەماتيكادان، فيزيكادان جانە باسقا دا پاندەردەن وتكەن وليمپيادالاردا جوعارى ناتيجەگە قول جەتكىزىپ ءجۇر. وسىنداي تالانتتى بالالاردى قولداپ، ولاردىڭ ۇستازدارىن ىنتالاندىرۋ كەرەك»، - دەدى پرەزيدەنت.
سونداي- اق بيىل قىركۇيەكتە قازاقستاندىق وقۋشىلار روبوتوتەحنيكادان ءۇش دۇركىن الەم چەمپيونى اتاندى.
قازاندا مەملەكەتتىك كەڭەسشى ەرلان قارين پرەزيدەنت تاپسىرماسىنا سايكەس حالىقارالىق ءپان وليمپيادالارىنىڭ جەڭىمپازدارى مەن جۇلدەگەرلەرىن قابىلدادى.
