جاس عالىمدارعا پاتەر بەرىلدى

استانا. KAZINFORM - مەملەكەت باسشىسىنىڭ تاپسىرماسىنا سايكەس جاس عالىمدار جاڭا پاتەرگە يە بولدى. بۇل تۋرالى ق ر عىلىم جانە جوعارى ءبىلىم مينيسترلىگى ءمالىم ەتتى.

بۇگىن الماتىدا «عىلىم ورداسى» عيماراتىندا مەملەكەت باسشىسىنىڭ تاپسىرماسىمەن عالىمدارعا قولداۋ كورسەتۋ، ولاردىڭ الەۋمەتتىك مارتەبەسىن ارتتىرۋ جانە عىلىمعا جاس كادرلاردىڭ كەلۋىن ىنتالاندىرۋ ماقساتىندا ق ر عىلىم جانە جوعارى ءبىلىم ءمينيسترى ساياسات نۇربەك جانە ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ 9 جاس عالىمعا پاتەر سەرتيفيكاتتارىن سالتاناتتى تۇردە تابىستادى.

ق ر عىلىم جانە جوعارى ءبىلىم مينيسترلىگى 2024 -جىلعى مامىر ايىنان باستاپ باسپاناعا مۇقتاج جاس عالىمداردىڭ (40 جاسقا دەيىن قوسا العاندا) ءتىزىمىن قالىپتاستىرۋ بويىنشا جۇمىس جۇرگىزۋدە. الماتى قالاسىندا ورنالاسقان مەملەكەتتىك ورگاندارعا ۆەدومستۆولىق باعىنىستى عىلىمي ۇيىمدار مەن جوعارى وقۋ ورىندارىنان 300 گە جۋىق ءوتىنىم كەلىپ ءتۇستى.

پرەزيدەنتتىڭ تاپسىرماسىن ورىنداۋ ماقساتىندا الماتى قالاسىندا باسپانا بەرۋ ءۇشىن عىلىمي ۇيىمداردىڭ، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ جاس عالىمدارى ءۇشىن پاتەرلەردى ءبولۋ جونىندەگى كوميسسيا باسپاناعا مۇقتاج جاس عالىمداردىڭ كەزەكتى ءتىزىمىن ايقىندادى.

جاس عالىمدار كورسەتىلگەن قولداۋ ءۇشىن العىستارىن ءبىلدىردى. سونداي-اق ولار ەندى تۇرعىن ءۇي ماسەلەسىن شەشۋگە الاڭداماي، عىلىمي جۇمىستارعا كوبىرەك ۋاقىت بولە الاتىنىن ايتتى.

- بۇل -جاس عالىمدارعا ۇلكەن قولداۋ. جاستاردىڭ عىلىممەن اينالىسۋىن ىنتالاندىرۋعا باعىتتالعان وسى باعدارلامانىڭ ىسكە قوسىلعانىنا قۋانىشتىمىن. بۇل عىلىمدى ىلگەرىلەتۋ جولىنداعى ماڭىزدى قادام ەكەنىنە سەنىمدىمىز، - دەپ اتاپ ءوتتى بالجان نايمانوۆا، ج. جيەمبايەۆ اتىنداعى قازاق وسىمدىكتەردى قورعاۋ جانە كارانتين عىلىمي-زەرتتەۋ ينستيتۋتىنىڭ عىلىمي قىزمەتكەرى.

ق ر عىلىم جانە جوعارى ءبىلىم مينيسترلىگى بۇل جۇمىستى كەزەڭ-كەزەڭىمەن جۇرگىزۋدە. جاس عالىمدار سانىنىڭ ارتۋى عىلىمنىڭ دامۋىنا، عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋعا، سونداي-اق جاڭا ەكونوميكالىق كلاستەرلەر قۇرۋعا وڭ اسەر ەتەدى.

ايتا كەتەيىك، بۇعان دەيىن مەملەكەت باسشىسىنىڭ تاپسىرماسىمەن 42 جاس عالىم تۇرعىن ءۇي سەرتيفيكاتتارىن الدى. سونىمەن قاتار 2023 -جىلعى 19-قازاندا ق ر عىلىم جانە جوعارى ءبىلىم مينيسترلىگى مەن «وتباسى بانك» ا ق اراسىندا جاس عالىمدارعا 2023-2027-جىلدارعا ارنالعان جەڭىلدەتىلگەن كرەديت بەرۋ باعدارلاماسى بويىنشا ىنتىماقتاستىق تۋرالى كەلىسىمگە قول قويدى. قازىرگى ۋاقىتتا اتالعان باعدارلاما بويىنشا 290 جاس عالىم جەڭىلدىكپەن باسپانا الدى.